Zombie Reddy Telugu Movie Review, Rating {3/5} – జాంబీ రెడ్డి సినిమా రివ్యూ, రేటింగ్ {3/5}

0
29


వినోదం కోసం కథ రాయడం వేరు.. కథ చెప్తూ వినోదాన్ని పంచడం వేరు. ఈ ప్రాసెస్‌లో ఉత్కంఠ కలిగించే వినోదభరిత సన్నివేషాలు ఎదురైతే ప్రేక్షకుడికి మంచి అనుభూతి. జాంబీరెడ్డి చిత్రం ఈకోవకు చెందినదే.

హాలీవుడ్‌లో జాంబీ అనేది చాలా ఫేమస్ సక్సెస్‌ఫుల్ జానర్. తెలుగులో తొలిసారిగా ఈ జాంబీలతో ప్రయోగం చేసి.. తన విలక్షణత మరింత పదును పెట్టాడు యువ టాలెండెడ్ దర్శకుడు ప్రశాంత్ వర్మ.

బాంబీరెడ్డి.. ఇదేం పేరురా బాబూ.. మన తెలుగు వాళ్లకి కనెక్ట్ అవుతుందా? అనే సందేహాలు చాలామందిలో. కానీ.. తెలుగు వాళ్లకు కనెక్ట్ కావాలనే.. తెలుగు నేటివిటీకి ఈ జాంబీల దగ్గర చేస్తూ రాయలసీమ ఫ్యాక్షన్, కరోనా వ్యాక్సిన్‌తో ముడిపెట్టి ఆసక్తికరంగా మలిచాడు దర్శకుడు.

జాంబీ అంటే బతికి ఉండే క్రూరమైన శవాలు.. మనుషుల్ని చంపుకుతుంటూ నరమేధం సృష్టించేవి. హాలీవుడ్‌లో ఇలాంటి జాంబీలే కనిపిస్తుంటాయి. ఇలాంటి భయంకరమైన జాంబీలను తెలుగు జనాలకు పరిచయం చేయడమే పెద్ద టాస్క్. ఇంచుమించు హారర్ చిత్రాల్లో ఉండే దెయ్యాల మాదిరిగానే ఇవి ఉండటంతో పెద్దగా కొత్తదనం అనిపించదు. కథ మొత్తం జాంబీల చుట్టూనే అనుకుంటే సెపరేట్ ఆడియన్స్‌కి మాత్రమే ఈ సినిమా పరిమితం అయ్యేది.

కానీ.. ‘జాంబీ’లను క్రూరంగా చూపిస్తూనే రాయల సీమ ఫ్యాక్షన్ కథతో మెలిపెట్టి… కామెడీ పండించాడు దర్శకుడు. ఇదేదో జాంబీ కథ ఎలా ఉంటుందో ఏంటో అనే కన్ఫ్యూజన్ లేకుండా తెలుగు నేటివిటీకి అనుగుణంగా కాన్సెప్ట్‌ని క్లియర్ కట్‌గా చూపించగలిగాడు. మొత్తం కథని కరోనా వ్యాక్సిన్‌తో ముడిపెట్టి గమ్మత్తైన ట్విస్ట్ పెట్టాడు.

ప్రపంచాన్ని గడగడలాడిస్తున్న కరోనాకు అందరికంటే ముందు వ్యాక్సిన్ తానే కనిపెట్టాలనుకునే ఓ సైంటిస్ట్ స్వార్ధపూరిత ఆలోచనతో ‘జాంబి’ కథ పురుడుపోసుకుంటుంది. అయితే డైరెక్ట్‌గా మనుషులపై ప్రయోగం చేయడం.. ఆ వ్యాక్సిన్ వికటించి వాళ్లు జాంబిలుగా మారిపోతుంటారు. ఈ జాంబీల కారణంగా రాయసీమలోని కర్నూల్ ప్రాంతంలోని రెండు ఊర్లు జనం మొత్తం బాధితులు అవుతారు.

అలాంటి పరిస్థితుల్లో వీడియో గేమ్ డిజైనర్ మారియో (తేజ సజ్జా) తన బృందంతో కలిసి ఈ ‘జాంబి’లకు ఎలా చెక్ పెట్టాడు.. తిరిగి వాళ్లను మనుషులుగా మార్చగలిగాడు? అసలు మారియో కర్నూల్ వెళ్లడానికి కారణం ఏంటి? అక్కడ ఫ్యాక్షనిస్ట్‌లకు మారియోకి లింక్ ఏంటన్నదే మిగతా కథ.

ప్రధాని మోడీ లాక్ డౌన్ ప్రకటించే సన్నివేశంతో ‘జాంబీ రెడ్డి’ సినిమా కథను మొదలు పెట్టాడు దర్శకుడు. ఏదో జాంబీ కథ అన్నాడు.. ఇదేంటి ఫ్యాక్షన్ గొడవలు.. కత్తులు బాంబులు ఏంటి అనుకునేలోపు.. అసలు కథని మధ్య మధ్యలో టచ్ చేస్తూ ఆసక్తికలిగించాడు.

జాంబీల రాక‌కి క‌రోనా వ్యాక్సిన్‌కి లింక్ కన్వెన్సింగ్‌గా ఉండేలా చూసుకున్నాడు దర్శకుడు. ఇక ఇంటర్వెల్ బ్యాంగ్ సినిమాకే హైలైట్. జాంబీల రాకతో స్లోగా సాగుతున్న కథ పుంజుకుంటుంది. బాంబీలను భయంకరంగా చూపిస్తూనే తమాషాలు చేయించారు.

హీరోగా తేజ సజ్జా తొలి చిత్రంతోనే పెద్ద ప్రయోగం చేశాడు. ఈ కథకు హీరో పర్ఫెక్ట్ సెలెక్షన్ అనేట్టుగానే చేశాడు. కామెడీతో పాటు హీరోయిజం కూడా చూపించగిలిగాడు. యాక్షన్, ఎమోషనల్, ఛేజింగ్ సీన్లతో పరిణిత ఉన్న నటనను చూపించాడు.

హీరోయిన్ ఆనంది పాత్రను ఆసక్తికరంగా మలిచారు. రొమాన్స్, సాంగ్స్ లాంటివి ఈ సినిమాలో కనిపించవు కాబట్టి.. పెర్ఫామెన్స్‌కి స్కోప్ ఉన్న పాత్రలో మెప్పించింది ఆనంది. ఆమె పాత్రను ప్రజెంట్ చేసిన తీరు.. సర్ ప్రైజింగ్‌గా అనిపిస్తుంది. మరో హీరోయిన్ దక్షా నాగర్కర్ పాత్రకి కూడా మంచి స్కోప్ ఉంది. హీరోయిన్స్ అంటే పాటల్లో ఎక్కువ స్కోప్ ఉంటుంది.. కానీ ఈ సినిమాల్లో ఈ ఇద్దరు హీరోయిన్లకు ఫైట్‌, యాక్షన్ ఎపిసోడ్‌లో ప్రాధాన్యత కల్పించారు.

కసిరెడ్డిగా జబర్దస్త్ శ్రీను అదరగొట్టాడు.. ఇక కళ్యాణ్ పాత్రలో హీరోకి స్నేహితుడిగా నటించిన ఆర్జే హేమంత్‌కి కెరియర్‌లోనే బెస్ట్ సినిమా పడింది. ఈ కథ మలుపుతిరిగేది ఇతని క్యారెక్టర్‌తోనే. పెళ్లి, శోభనం, జాంబీ పెళ్లి కూతురుతో ఫన్నీ సీన్లు బాగా పేలాయి. ఇక బిగ్ బాస్ ఫేమ్ కిరీటికి మంచి పాత్ర దక్కింది. థర్టీ ఇయర్ ఇండస్ట్రీ పృథ్వీ‌ని రెండు చేతులు పోగొట్టుకున్న రాయలసీన ఫ్యాక్షనిస్ట్‌గా చూపించి నవ్వులు పంచారు. హీరో పేరెంట్స్‌గా హర్షవర్ధన్, సన బాగా సెట్ అయ్యారు. కామెడీ పండించాడు. బిగ్ బాస్ హరితేజ డిఫరెంట్ క్యారెక్టర్‌లో కనిపించింది.

ఇక క్లైమాక్స్ విషయానికి వస్తే.. అంత కన్వెన్సింగ్‌గా అనిపించడు. రొటీన్ ముగింపు ఇచ్చాడేమో అనిపిస్తుంది. చివరికి జాంబీలను అంతం చేసే శక్తి దైవానికి మాత్రమే ఉందనేట్టుగా ముగింపు ఇవ్వడంలో లాజిక్ లేదు. కీలకమైన సన్నివేషాలతో పాటు బోరింగ్ అనిపించే సీన్లు కూడా ఇందులో ఉన్నాయి. హీరో హీరోయిన్ల వెంట జాంబీలు వెంటపడే సన్నివేశం.. దాదాపు 20 నిమిషాలు పాటు ఉండటంతో బోరింగ్‌గా అనిపిస్తుంది.

టెక్నికల్ పరంగా ఈ సినిమా విజువలైజేషన్ కథా నేపథ్యానికి పర్ఫెక్ట్ అనేట్టుగా ఉంటాయి. జాంబీలతో భయపెట్టించాడు సినిమాటోగ్రాఫర్. కెమెరా, ఆర్ట్ డిపార్ట్‌మెంట్ కష్టం స్క్రీన్‌పై కనిపిస్తూనే ఉంటుంది. జాంబీ జానర్ మూవీకి బ్యాగ్రౌండ్ మ్యూజిక్ ప్రాణం అనే చెప్పాలి.. రాబర్ట్ నేపథ్య సంగీతం సినిమాకి ప్లస్ అయ్యింది. హారర్ ఫ్లేవర్ కనిపించేలా ఆర్ ఆర్‌తో భయపెట్టాడు రాబర్ట్. ‘గో కరోనా.. సాంగ్‌ కూడా బాగుంది.

మొత్తంగా ‘జాంబీ రెడ్డి’ తెలుగు ప్రేక్షకులకు కొత్త అనుభూతి.. హాలీవుడ్ జాంబీలకు అలవాటు పడ్డ వాళ్లకి ఓస్ ఇంతేనా? అనిపించవచ్చు కానీ.. కామన్ ఆడియన్స్‌కి టాలీవుడ్ ‘జాంబీ’లు మాత్రం మంచి టైం పాస్. పిల్లలు కూడా బాగా ఎంజాయ్ చేస్తారు. దర్శకుడు ప్రశాంత్ వర్మ కొత్త ప్రయత్నానికి ప్రశంసలు దక్కుతాయి.

LEAVE A REPLY

Please enter your comment!
Please enter your name here