WHO on corona patient zero: కోవిడ్ మూలాలపై దర్యాప్తు.. తొలి జీరో పేషేంట్‌ విషయంలో డబ్ల్యూ‌హెచ్ఓ సంచలన వ్యాఖ్యలు – probe on for coronavirus origin, who says we may never find patient zero

0
24


ప్రపంచ సంక్షోభానికి కారణమైన కరోనా వైరస్‌ మహమ్మారి పుట్టుపూర్వోత్తరాలపై డబ్ల్యూహెచ్ఓ ఆధ్వర్యంలో స్వతంత్ర దర్యాప్తు ప్రారంభమైంది. ఇందుకోసం డబ్ల్యూహెచ్ఓ నిపుణుల బృందం గురువారం వుహాన్‌కు చేరుకుంది. ఈ నేపథ్యంలోనే, కరోనా సోకిన తొలి వ్యక్తి ‘పేషెంట్‌ జీరో’ను కనుక్కోవడం అసాధ్యమేనని ప్రపంచ ఆరోగ్య సంస్థ సంచలన ప్రకటన చేసింది. పేషెంట్‌ జీరోను ప్రపంచం ఎన్నటికీ కనుక్కోకపోవచ్చని ఆ సంస్థ వ్యాధుల విభాగం అధిపతి మారయా వ్యాన్‌ కోర్కోవ్‌ అభిప్రాయపడ్డారు.

కరోనా మూలాలపై శోధనకు పది మందితో కూడిన నిపుణుల బృందం వుహాన్‌లో అడుగుపెట్టిన సమయంలోనే డబ్ల్యూహెచ్‌ఓ ఈ విధంగా స్పందించడం గమనార్హం. అయితే, సుదీర్ఘ కాలం తర్వాత దర్యాప్తు బృందానికి చైనా అనుమతించడంపైనా అంతర్జాతీయ సమాజం నుంచి తీవ్ర విమర్శలు వ్యక్తమవుతున్నాయి. కోవిడ్-19పై దర్యాప్తునకు చైనా తొలినుంచి మోకాలడ్డుతున్న విషయం తెలిసిందే.

డబ్ల్యూహెచ్ఓ ప్రధాన కార్యాలయంలో శుక్రవారం అత్యవసర కమిటీ సమావేశమయ్యింది. ఈ సందర్భంగా కొత్తరకం కరోనా స్ట్రెయిన్ బయటపడుతోన్నందున ప్రపంచ దేశాలను అప్రమత్తం చేసింది. కొత్త వేరియంట్‌లను ఎదుర్కోడానికి కరోనా వైరస్‌ సీక్వేన్సింగ్‌ను చేపట్టాలని పిలుపునిచ్చింది. అయితే, జెనెటిక్‌ కోడ్‌ సీక్వెన్సింగ్‌ విశ్లేషించడం అన్ని దేశాలకు సాధ్యం కాకపోవచ్చని అభిప్రాయపడింది. అలాగే, కొన్ని దేశాల నుంచి వచ్చేవారికి టీకా తీసుకున్నట్లు ఆధారాలు చూపించాలని కోరడాన్ని డబ్ల్యూహెచ్‌ఓ తీవ్రంగా వ్యతిరేకించింది.

ప్రస్తుతం కొన్ని దేశాల్లోనే వ్యాక్సినేషన్ ప్రక్రియ మొదలైందని, రాబోయే100 రోజుల్లో అన్ని దేశాల్లో ప్రారంభమవ్వాలని ఆకాంక్షించింది. ప్రపంచవ్యాప్తంగా అన్ని దేశాలకు వ్యాక్సిన్‌ సమానంగా అందేలా చూడాలని డబ్ల్యూహెచ్‌ఓ డైరెక్టర్‌ జనరల్‌ టెడ్రోస్‌ అధ్నామ్‌ ఘ్యాబ్రియేసస్‌ అభిప్రాయపడ్డారు. ‘జన్యు వైవిధ్యాలను పరిష్కరించడానికి ఎక్కువ శాస్త్రీయ సహకారంతో పాటు జన్యు శ్రేణి, డేటాను ప్రపంచ దేశాలు పరస్పరం పంచుకుని, సహకరించకోవాలి’ అని పిలుపునిచ్చింది.

మహమ్మారి నివారించే ప్రయత్నంలో భాగంగా భౌగోళికంగా, రాజకీయంగా తటస్థంగా ఉండటానికి కొత్త వేరియంట్‌లకు పేరు పెట్టడానికి ప్రామాణికమైన వ్యవస్థను తీసుకురావాలని డబ్ల్యూహెచ్ఓ కమిటీ సూచించింది. తొలుత లండన్‌లో కొత్త స్ట్రెయిన్ గుర్తించగా.. అది దాదాపు 50 దేశాలకు విస్తరించింది. అలాగే దక్షిణాఫ్రికాలోనూ మరో కొత్తరకం స్ట్రెయిన్ గుర్తించారు. తాజాగా, బ్రెజిల్‌లోని అమెజాన్ ప్రాంతంలో మరో కొత్త వేరియంట్ బయటపడింది.

అమెజాన్ రాష్ట్ర రాజధాని మనౌస్‌లో పరిస్థితి దారుణంగా ఉంది. ఆస్పత్రులన్నీ కరోనా రోగులతో నిండిపోయాయి. ‘పరిస్థితి ఇలాగే కొనసాగితే, అమెజాన్‌ ప్రాంతం ఏప్రిల్, మే నెలల్లో తలెత్తబోయే విపత్తును ఊహించలేం, భారీ ఉపద్రవాన్ని చూడబోతున్నాం’ అని డబ్ల్యూహెచ్‌ఓ అత్యవసర విభాగం అధిపతి మైక్ ర్యాన్ హెచ్చరించారు.

LEAVE A REPLY

Please enter your comment!
Please enter your name here