West Bengal budget: రైతు బంధు సాయం పెంపు.. ఎన్నికల ముందు పలు కీలక నిర్ణయాలు – bengal budget 2021-22 highlights: cm mamata banerjee key announcements ahead of assembly elections

0
28


త్వరలో అసెంబ్లీ ఎన్నికలు జరుగనున్న నేపథ్యంలో పశ్చిమ బెంగాల్ ముఖ్యమంత్రి మమతా బెనర్జీ ఆ రాష్ట్ర ప్రజలపై వరాల జల్లు కురిపించారు. బడ్జెట్‌లో అనేక తాయిలాలను ప్రకటించారు. రైతులకు పెట్టుబడి సాయం కింద ఇచ్చే నగదు మొత్తాన్ని పెంచారు. ప్రస్తుతం దీని కింద రూ.5 వేలు అందజేస్తుండగా.. ఈ మొత్తాన్ని రూ.6 వేలకు పెంచారు. బెంగాల్‌లో ఈ పథకాన్ని క్రిషక్ బంధు (Krishak Bandhu) పేరుతో అమలు చేస్తున్నారు. తెలంగాణ ప్రభుత్వం ప్రవేశపెట్టిన రైతు బంధు పథకం స్ఫూర్తితో బెంగాల్‌లో క్రిషక్ బంధు ప్రవేశపెట్టారు.

పశ్చిమ బెంగాల్‌ బడ్జెట్‌ సమావేశాలు శుక్రవారం (ఫిబ్రవరి 5) ప్రారంభమయ్యాయి. త్వరలో అసెంబ్లీ ఎన్నికలు జరుగనున్న నేపథ్యంలో మధ్యంతర బడ్జెట్‌ (ఓటాన్ అకౌంట్)ను ప్రవేశపెట్టారు. ఆర్థిక మంత్రి అమిత్ మిత్ర ఆస్పత్రిలో చికిత్స పొందుతుండటంతో సీఎం మమతా బెనర్జీ ఈ బడ్జెట్‌ను అసెంబ్లీలో ప్రవేశపెట్టి ప్రసంగించారు.

జూన్ 21 వరకు రాష్ట్రంలో అన్ని రకాల రోడ్డు ట్యాక్స్‌లను రద్దు చేస్తున్నట్లు సీఎం మమత ప్రకటించారు. ఉచిత రేషన్ బియ్యం పంపిణీ కార్యక్రమాన్ని జూన్ 21 వరకు కొనసాగిస్తామని తెలిపారు. 1.5 లక్షల మంది శరణార్థులకు దశలవారీగా భూ పంపిణీ చేయనున్నట్లు ప్రకటించారు. 45 లక్షల నిర్మాణ రంగ, రవాణా రంగ కార్మికులకు నెలకు రూ.1000 చొప్పున భృతి అందించనున్నట్లు తెలిపారు.

‘జువశక్తి‘ అనే కొత్త పథకాన్ని ప్రకటించారు. ఇందులో భాగంగా ప్రతి మూడేళ్లకు గాను 10 వేల మంది విద్యార్థులను ఎంపిక చేసి ప్రభుత్వ రంగ సంస్థల్లో పనిచేయడానికి అవకాశం (ఇంటర్న్‌షిప్) కల్పించనున్నట్లు తెలిపారు. తద్వారా వారిలో పని నైపుణ్యాలను మెరుగు పరిచేందుకు ప్రోత్సహించనున్నట్లు సీఎం మమత వివరించారు.

పేదలకు తక్కువ ధరకు ఆహారం అందించే పథకం కోసం రూ.100 కోట్లు కేటాయించారు. పలు కొత్త రోడ్లు, వంతెనల నిర్మాణాలకు సంబంధించిన ప్రాజెక్టులకు ప్రత్యేక నిధులు కేటాయించారు. మొత్తం 29,96,88 కోట్ల రూపాయలతో బడ్జెట్ ప్రవేశపెట్టారు.

రూ.1500 కోట్లతో ఎస్సీ, ఎస్టీ వర్గాలకు 20 లక్షల పక్కా గృహాలు నిర్మించి ఇస్తామని సీఎం మమతా బెనర్జీ హామీ ఇచ్చారు. రూ.10 కోట్ల వ్యయంతో కోల్‌కతా పోలీస్ ఫోర్స్‌లో నేతాజీ బెటాలియన్ ఏర్పాటు చేస్తామని చెప్పారు. 9 లక్షల మంది విద్యార్థులకు ట్యాబ్స్ ఇవ్వనున్నట్లు ప్రకటించారు.

అసెంబ్లీ బడ్జెట్‌ ప్రారంభ సమావేశానికి గవర్నర్‌ను ఆహ్వానించకుండా సీఎం మమతా బెనర్జీ మరో సంచలనానికి తెర తీశారు. ఈ అంశంపై బీజేపీ ఎమ్మెల్యేలు సభలో నిరసన తెలిపారు. మమతా బెనర్జీ తీరును తప్పుబడుతూ బీజేపీతో పాటు కాంగ్రెస్‌, వామపక్ష సభ్యులు కూడా సభ నుంచి వాకౌట్‌ చేశారు. ‘నాపై విశ్వాసం ఉంచండి. నేను మీకు అంకితభావంతో నిస్వార్థ సేవలు అందిస్తా’ అంటూ రవీంద్రనాథ్‌ ఠాగూర్‌ కవితతో మమతా బెనర్జీ తన బడ్జెట్‌ ప్రసంగాన్ని ముగించడం విశేషం.

LEAVE A REPLY

Please enter your comment!
Please enter your name here