Uttarakhand tragedy: ప్రాణాలపై ఆశ వదిలేశారు.. కానీ, ఒక్క ఫోన్ కాల్ 12 మందిని కాపాడింది – uttarakhand glacier burst: here is how a phone call saved 12 lives from tapovan tunnel

0
21


మెరుపు వరదలు.. ఒక్కసారిగా జలప్రళయం.. క్షణాల్లో చుట్టేసిన నీరు.. తప్పించుకునే మార్గమే లేదు. అసలు ఏం జరిగిందో కూడా తెలియదు. దేవభూమిగా పేరు పొందిన ఉత్తరాఖండ్‌లో ఆదివారం (ఫిబ్రవరి 7) మధ్యాహ్నం చోటు చేసుకున్న జలవిలయమిది. ఈ ప్రమాదంలో 203 మంది గల్లంతయ్యారు. విద్యుత్ ప్రాజెక్టు వద్ద పనిచేస్తున్న కూలీలు, సిబ్బంది క్షణాల్లో కొట్టుకుపోయారు. కొంత మంది సొరంగాలలో చిక్కుకుపోయారు.

‘భారీ శబ్దం వినిపించింది. టన్నెల్ నుంచి వచ్చేయాలంటూ పైనుంచి అరుపులు వినిపించాయి. ఆ తర్వాత వరద ముంచెత్తింది. టన్నెల్‌లోకి వరద నీరు, బురద చేరింది. ఇక బయటపడే మార్గమే లేదు. మేం ప్రాణాలపై ఆశలు వదిలేసుకున్నాం..’ ఉత్తరాఖండ్ ఘటన నుంచి బయటపడి ఆస్పత్రిలో చికిత్స పొందుతున్న ఓ బాధితుడు చెప్పిన మాటలివి.

కానీ, మొత్తానికి ఏదో అద్భుతం జరిగింది. ఆ టన్నెల్ చిక్కుకున్న 12 మంది సురక్షితంగా బయటకు వచ్చారు. ఒక్క ఫోన్ కాల్ వారందరినీ కాపాడింది.

చమోలీలోని తపోవన్‌ సొరంగంలో 12 మంది కార్మికులు చిక్కుకుపోయారు. వారంతా ప్రాణ భయంతో ఆందోళనలో ఉన్నారు. అలాంటి కష్ట సమయంలో వారిలో ఒక కార్మికుడి ఫోన్‌కు సిగ్నల్‌ లభించింది. వెంటనే అతడు తన మేనేజర్‌కు ఫోన్ చేసి సమాచారం ఇచ్చాడు. ఆ మేనేజర్ వెంటనే స్థానిక అధికారుల వద్దకు పరుగెత్తుకెళ్లాడు. ఆ తర్వాత ఐటీబీపీ (ఇండో టిబెటన్‌ బోర్డర్‌ పోలీసులు) రంగంలోకి దిగారు.

తపోవన్ సొరంగం ఉపరితలం నుంచి చాకచక్యంగా చిన్న రంధ్రం ఏర్పాటు చేసి 12 మంది కార్మికులను బయటకు తీసుకొచ్చారు. అంతకుముందు వారు 7 గంటల పాటు ఆ టన్నెల్ చిక్కుకొని ప్రాణభయంతో బిక్కుబిక్కుమంటూ గడిపారు. ‘జోర్ లాగాకే హైస్సా..’ అంటూ కార్మికులను ఐటీబీపీ సిబ్బంది తాళ్లలో లాగుతున్న దృశ్యాలు సోషల్ మీడియాలో వైరల్ అవుతున్నాయి.

‘మేం 300 మీటర్ల లోతులో ఉన్నాం. మేం స్పందించే లోపే నీరు, బురద మమ్మల్ని నెట్టేశాయి. ప్రాణాలపై ఆశలు వదిలేసుకున్నాం. అప్పుడు ఒక వైపు నుంచి గాలి, వెలుతురు రావడం గమనించాం. అప్పుడు కాస్త ఊపిరి పీల్చుకున్నాం’ ఆ సొరంగం నుంచి బటయపడ్డ లాల్‌బహదూర్, బసంత్ అనే కార్మికులు చెప్పారు.

తపోవన్ సొరంగంతో పాటు మరికొన్ని సొరంగాల్లో చాలా మంది కార్మికులు చిక్కుకున్నారు. వారిని కాపాడటానికి సహాయక చర్యలు కొనసాగుతున్నాయి. ఈ ప్రమాదంలో మొత్తం 203 మంది గల్లంతవగా.. ఇప్పటివరకు 20 మృతదేహాలను వెలికితీశారు. ఉత్తరాఖండ్ ముఖ్యమంత్రి రూ.20 కోట్ల పరిహారాన్ని విడుదల చేశారు.

కార్మికులతో పాటు ఆ ప్రాంతంలో కట్టెలు ఏరుకోవడానికి వచ్చిన వారు, పశువులను మేపడానికి వచ్చిన వారు కూడా గల్లంతై ఉంటారని అధికారులు భావిస్తున్నారు. మరోవైపు.. ఈ వరదలతో అనేక ప్రాంతాల్లోని వంతెనలు ధ్వంసమయ్యాయి. దీంతో 13 గ్రామాలకు బాహ్య ప్రపంచంతో సంబంధాలు తెగిపోయాయి. ఆ గ్రామాల్లోని ప్రజలందరికీ అధికారులు హెలికాఫ్టర్ల ద్వారా ఆహారాన్ని అందిస్తున్నారు.

LEAVE A REPLY

Please enter your comment!
Please enter your name here