us on new farm laws in india: సాగు చట్టాలను స్వాగతిస్తూనే రైతుల ఆందోళనపై అమెరికా ఆసక్తికర వ్యాఖ్యలు – us interesting comments about new farm laws and farmers protest

0
21


ప్రధానాంశాలు:

  • సాగు చట్టాలపై రైతుల పోరుకు అంతర్జాతీయ గుర్తింపు.
  • శాంతియుతంగా చేపట్టిన ఆందోళనలపై ప్రశంసలు.
  • వ్యవసాయ చట్టాలపై అమెరికా ఆసక్తికర వ్యాఖ్యలు.

కేంద్రం తీసుకొచ్చిన వ్యవసాయ చట్టాలకు వ్యతిరేకంగా రైతులు చేపట్టిన ఆందోళనలపై అగ్రరాజ్యం అమెరికా స్పందించింది. శాంతియుత నిరసనలు అభివృద్ధి చెందుతున్న ప్రజాస్వామ్యానికి ముఖ్య లక్షణమని వ్యాఖ్యానించిన అమెరికా.., భారత మార్కెట్ సామర్థ్యాన్ని మెరుగుపరిచే, ప్రైవేటు రంగ పెట్టుబడులను ఆకర్షించే చర్యలను స్వాగతిస్తున్నట్లు పేర్కొంది. భారత్‌లోని రైతుల ఆందోళనలపై అడిగిన ప్రశ్నకు యూఎస్ విదేశాంగ శాఖ ఈ మేరకు సమాధానం ఇచ్చింది. అంతేకాదు, రైతులు, కేంద్రం మధ్య ఉన్న వివాదాలను చర్చల ద్వారా పరిష్కరించుకోవాలని సూచించింది.

శాంతియుత ఆందోళనలు అభివృద్ధి చెందుతున్న ప్రజాస్వామ్యానికి నిదర్శనం.. భారత సుప్రీంకోర్టు ఇదే విషయాన్ని స్పష్టం చేసింది అని అమెరికా విదేశాంగ శాఖ అధికారులు వ్యాఖ్యానించారు. కాగా, రైతుల ఆందోళనలపై అంతర్జాతీయ సెలబ్రిటీలు చేస్తున్న ట్వీట్లపై భారత్ బుధవారం తీవ్ర అసహనం వ్యక్తం చేసిన విషయం తెలిసిందే.

సెలబ్రిటీలు చేసిన ట్వీట్లకు ఏమాత్రం కచ్చితత్వం లేదని, అవి బాధ్యతారాహిత్యమైనవని ఈ మేరకు విదేశాంగ శాఖ బుధవారం ఓ ప్రకటన విడుదల చేసింది. వ్యవసాయ చట్టాలను వ్యతిరేకిస్తూ కొన్ని సమూహాలకు చెందిన రైతులు, కొన్ని ప్రాంతాల్లో మాత్రమే ఆందోళన చేస్తున్నారని, వివిధ వర్గాలు, పార్లమెంట్‌లో విస్తృతంగా చర్చించిన తర్వాతే వాటిని చట్టంగా తీసుకొచ్చినట్టు భారత్ ప్రకటించింది. కొత్త చట్టాలతో రైతులకు ప్రయోజనం ఉంటుందని ఈ సందర్భంగా విదేశాంగ శాఖ పునరుద్ఘాటించింది.

ఇదిలా ఉండగా, పలువురు అమెరికా ప్రజాప్రతినిధులు రైతుల ఉద్యమానికి మద్దుతు తెలియజేశారు. ‘భారతదేశంలో కొత్త వ్యవసాయ సంస్కరణ చట్టాలను నిరసిస్తూ శాంతియుతంగా ఆందోళన చేస్తున్నవారిపై తీసుకున్న చర్యల గురించి నేను ఆందోళన చెందుతున్నాను’ అని కాంగ్రెస్ సభ్యురాలు హాలే స్టీవెన్స్ అన్నారు. భారత ప్రభుత్వం, రైతు సంఘాలు ప్రతినిధులు చర్చలు ద్వారా ఈ సమస్యను పరిష్కరించుకోవాలని ఆమె ఒక ప్రకటనలో పేర్కొన్నారు.

‘నేను ఈ పరిస్థితిని నిశితంగా పర్యవేక్షిస్తూ ఉంటాను.. ఈ అంశంపై దేశవ్యాప్తంగా ఉన్న ప్రతినిధులు పరస్పరం చర్చించుకోవడం చాలా విలువైనది.. వారి దృక్పథాన్ని వ్యక్తం చేయడానికి వచ్చిన అందరినీ అభినందిస్తున్నాను’ అని అన్నారు. అలాగే తమ జీవనం కోసం ఆందోళన చేస్తున్న రైతులకు తన సంఘీభావం తెలుపుతున్నట్టు ఇల్హాన్ ఒమర్ అనే మరో సభ్యురాలు పేర్కొన్నారు.

LEAVE A REPLY

Please enter your comment!
Please enter your name here