Uppena Movie Review, Rating {3/5} – ఉప్పెన సినిమా రివ్యూ, రేటింగ్ {3/5}

0
28


పెద్దింటి అమ్మాయిని పేదింటి అబ్బాయి ప్రేమించడం అనేది పాతబడిపోయిన మేటరే.. కులం, మతం, ఆస్తి, అంతస్తు ఇవన్నీ ప్రేమకు కథా వస్తువులే.. ఈ వ్యత్యాసాల నేపథ్యంలో వందల కొద్దీ ప్రేమకథలు పుట్టుకొచ్చాయి.. వస్తూనే ఉన్నాయి. కానీ వాటిలో మనసుని హత్తుకుని సహజత్వానికి దగ్గరగా ఉండే ప్రేమ కథలు అప్పుడప్పుడూ మాత్రమే వస్తుంటాయి. సముద్రమంత ప్రేమను.. కులం, పరువు అనే ఎన్ని ‘ఉప్పెన’లొచ్చినా ఆపలేవని చెప్పే ప్రేమకథే ఈ ‘ఉప్పెన’ సినిమా.

జాలయ్య కొడుకు జమీందారు రాయణం గారి అల్లుడు అవుతాడంటే జాలయ్య ఎందుకు వద్దంటాడు.. కానీ రాయణం గారి అల్లుడు జాలయ్య కొడుకు ఎలా అవుతాడు? అన్న ప్రశ్నలో నుంచి వచ్చిన పెయిన్‌ఫుల్ ప్రేమకథా చిత్రం ‘ఉప్పెన’. ఉప్పాడ తీరంలో మత్స్యకారుడు జాలయ్య కొడుకు ఆశి (వైష్ణవ్ తేజ్). ఆ ఊరి జమీందారు రాయణం (విజయ్ సేతుపతి) కూతురే సంగీత అలియాస్ బేబమ్మ (కృతి శెట్టి). ఆశి, బేబమ్మలు తొలిచూపులోనే ప్రేమలో పడతారు. ముత్తాతలు, తాతలు పెంచి పోషించిన 130 సంవత్సరాల పరువు 18 ఏళ్ల కూతురు వల్ల పోతుంటే.. కాపాడుకోలేక పోయిన రాయణం ఎలాంటి జుగుప్సాకరమైన నిర్ణయం తీసుకున్నాడన్నదే ‘ఉప్పెన’ సినిమా.

ప్రేమ అనేది బ్రహ్మ పదార్థమే కానీ.. వడ్డించే విధానం కుదిరితే అర్థవంతంగానే ఉంటుంది. ఇక ప్రేమకథలు అంతే.. ఎటు నుంచి ఎటు తీసుకుని వెళ్లినా కథా నేపథ్యం మాత్రం ఇద్దరి మధ్య ప్రేమ, సంఘర్షణలే. వాటిని ఎంత బాగా చూపించారనేదే ముఖ్యం. హీరో వైష్ణవ్ తేజ్, హీరోయిన్ కృతి శెట్టి, దర్శకుడు బుచ్చిబాబు సానా ఈ ముగ్గురికీ తొలి చిత్రం ‘ఉప్పెన’. కానీ కొత్త దర్శకుడు.. కొత్త హీరో.. కొత్త హీరోయిన్ అనే ఫీల్ ఎక్కడా కనిపించదు.

స్వచ్ఛమైన సముద్రపు గాలి అంత స్వచ్ఛంగా అందమైన ప్రేమ కథను అల్లాడు దర్శకుడు బుచ్చిబాబు. చూడ్డానికి ఎండుచేపలా సన్నగా ఉన్నా.. మంచి కంటెంట్ ఉన్న దర్శకుడే అని తొలి చిత్రంతోనే చూపించాడు. మన వాస్తవజీవితాలు.. అందులోని భావోద్వేగాలు.. మన చుట్టూ ఉన్న పరిస్థితులను కథగా తెర మీదికి తీసుకుని మట్టి పరిమళాన్ని స్వచ్ఛంగా అందించే ప్రయత్నం చేశాడు.

సముద్రానికి హద్దులు ఉండవచ్చు.. ‘ఉప్పెన’కు హద్దులుంచగలరా?.. ప్రేమతో కూడిన స్పర్శ సరిపోదా ఒక జీవిత కాలం మొత్తానికి.. అనే పాయింట్‌ని కన్వెన్సింగ్‌గా ప్రెజెంట్ చేశారు. కానీ.. ప్రేక్షకుడి రిసీవింగ్ ఎలా ఉంటుంది అన్నదే ఇక్కడ ప్రశ్న.

మగతనం అంటే రెండు కాళ్ల మధ్యన ఉండేది కాదు.. ఒక అమ్మాయి తాను ప్రేమించిన అబ్బాయి పక్కన ఉంటే ప్రతిక్షణం ప్రేమను ఫీల్ అవ్వగలిగితే అదీ మగతనం. అతను పక్కనుంటే చాలు.. ప్రపంచంలో ఇంకేం అవసరం లేదు అనుకుంటుంది చూడు అదీ మగతనం.. మగాడి శరీరంలో ఏదో ఒక మూలన ఉండే అవయవం కాదు మగతనం అంటే.. అతని శరీరంలోని అణువణువునా ఉంటుంది.. అది చూడగలగడమే నిజమైన మగతనానికి గుర్తింపు.. ప్రేమకు దైవాత్వానికి అంగవైకల్యం ఉండదని ఒక విషాద ఘటనతో ‘ఉప్పెన’ కథకు ముగింపు ఇచ్చాడు దర్శకుడు.

విషాద ఘటనతోనే ఉప్పెన కథ మొదలుపెట్టిన దర్శకుడు.. కులం, పరువు నేపథ్యంలో ఫ్లాష్ బ్యాక్‌‌‌ను చూపించాడు.. కథ ముందుకు వెళ్లే కొద్దీ.. రొటీన్ ప్రేమకథల్లోని సీన్‌లే కళ్ల ముందు ప్రత్యక్షం అవుతుంటాయి. తొలిచూపులోనే పెద్దింటి అమ్మాయి ప్రేమలో పడటం.. ఆమెతో కలిసి ఏకాంతంగా గడపడం.. పెద్దల్ని ఎదిరించి పారిపోవడం లాంటి సీన్లు ఇంతకు ముందు చూసినట్టుగానే అనిపిస్తాయి. కానీ దర్శకుడు కథను తీసుకువెళ్లిన విధానం.. పాత్రల్ని ప్రజెంట్ చేసిన తీరుతో కొత్తగా అనిపిస్తాయి.

దర్శకుడు ఉప్పాడ వాసి కావడంతో అక్కడి మత్స్యకారుల కుటుంబాలు.. కులం కట్టుబాట్లు.. అగ్రవర్ణాల ఆధిపత్యం వీటన్నింటిలో సహజత్వం ఉట్టిపడేలా కళ్లకు కట్టాడు. ఇది నా కథే.. మా కథే.. మా ఊరి కథే అని ఆ ప్రేమ కథలో తమని తాము వెతుక్కునేట్టు చేశాడు. ముఖ్యంగా పాత్రల ఎంపిక.. ఆ పాత్రల్ని ప్రజెంట్ చేసిన తీరు బుచ్చిబాబులోని దర్శకత్వ ప్రతిభకు అద్దం పడుతుంది. తాలింపు.. జాలయ్య.. రాయణం.. జనాభా లాంటి పాత్రలు కథకు దగ్గరగా ఉండి కొత్తగా అనిపిస్తాయి.

‘ఉప్పెన’ కథ రొటీన్ అనిపిస్తుంది కానీ.. కథనం, మాటలు, దర్శకత్వం అన్నింటినీ బాగానే బ్యాలెన్స్ చేశాడు దర్శకుడు. ముఖ్యంగా సినిమాలోని డైలాగ్స్ సహత్వానికి దగ్గరగా అనిపిస్తాయి. ‘ఉప్పుగాలి తగలకపోతే ఊపిరాడదయ్యా’.. లాంటి ఎమోషనల్ డైలాగ్‌లతో పాటు.. ‘నువ్ కూతురితో పాటు కొడుకుని కూడా కన్నావ్ కదా.. నీ పరువు ఎక్కడికి పోయినా సాయంత్రానికి ఆడు ఇంటికి పట్టుకొచ్చేత్తాడు’.. ‘ప్రేమ గొప్పదైతే చరిత్రలోనూ సమాధుల్లోనూ కనిపించాలి కానీ.. పెళ్లి చేసుకుని పిల్లల్ని కని ఇల్లల్లో కనిపిస్తే దాని విలువ తగ్గిపోదూ.. అందుకే ప్రేమ ఎప్పుడూ చరిత్రలోనే ఉంటుంది.. దానికి భవిష్యత్ ఉండదు’ అంటూ భయపట్టే డైలాగ్‌లు రాసి తన పెన్ పవర్ చూపించాడు దర్శకుడు.

కథకు కీలకమైన క్లైమాక్స్‌కి వచ్చేసరికి ప్రేమకు దైవాత్వానికి అంగవైకల్యం ఉండదని క్లిష్టమైన అంశాన్ని కన్వెన్సింగ్‌గా ప్రజెంట్ చేశాడు. విషాదంతో కూడిన ముగింపు ఉన్నా.. కన్వెన్స్ చేసిన విధానం బాగుంది. అయితే ప్రేక్షకుల రిసీవింగ్‌లో మాత్రం భిన్న వాదనలు అయితే ఖచ్చితంగానే ఉంటాయి. రొటీన్ కథ కావడంతో ‘ఉప్పెన’కు సరైన సార్ధకత లభించలేదని నిరుత్సాహం ఉంటుంది.

ఇక పెర్ఫామెన్స్ విషయానికి వస్తే.. పెద్ద ఫ్యామిలీ నుంచి వచ్చిన హీరోలనే కాదు కానీ.. కొత్తగా హీరోలెవరైనా సరే పరిపూర్ణమైన నటులు కావాలంటే అంత ఈజీ కాదు. ఒకరు రెండు మూడు సినిమాలు టైం తీసుకుంటే మన టాలీవుడ్ పుత్రరత్నాలు చాలామంది ఇంకా నటనలో పరిపూర్ణత కోసం కిందా మీదా పడుతూనే ఉన్నారు. మెగా ఫ్యామిలీ హీరోలకు ఇది మినహాయింపు కాదు కానీ.. ఆ ఫ్యామిలీ నుంచి వైష్ణవ్ తేజ్ తొలి చిత్రంతోనే పరిపూర్ణమైన క్యారెక్టర్‌‌ను ఈ చిత్రం ద్వారా అందుకున్నాడు. మొదటి అడుగులోనే సవాల్‌తో కూడుకున్న పాత్ర చేశాడు. అతనికి పర్ఫెక్ట్ లాంచ్ అనే చెప్పొచ్చు. నిజంగానే అతడి కళ్ళలో ఏదో తెలియని స్పార్క్ ఉంది.. వాయిస్‌లో మంచి బేస్ ఉంది.

దర్శకుడు కూడా వైష్ణవ్ తేజ్‌ నుంచి హావభావాలు పిండేయాలనే ప్రయత్నం చేయకుండా స్క్రిప్ట్‌కి ఎంత వరకూ అవసరమో అంతే చేయించారు. ఓవర్ ఎలివేషన్స్‌కి పోకుండా కథలో హీరోగానే చూపించారు తప్పితే… హీరో కోసం కథ అన్నట్టు చూపించలేదు. ముఖ్యంగా సెకండాఫ్‌లో వైష్ణవ్ పరిణితి ఉన్న నటుడిలా చేశాడు. ఫైట్స్, ఛేజింగ్, ఎమోషనల్ సీన్లతో కంటెంట్ ఉన్న కుర్రాడిలాగే కనిపించాడు వైష్ణవ్. మరో విషయం ఏంటంటే.. చిరంజీవి తరువాత వచ్చిన హీరోలు.. పవన్, బన్నీ, చెర్రీ, సాయి ధరమ్ తేజ్ ఇలా ఫ్యామిలీ ట్రీ హీరోలకు తమని తాము నిరూపించుకోవడానికి పర్ఫెక్ట్ ఆర్టిస్ట్ అనిపించుకోవడానికి చాలా టైం తీసుకున్నారు. సరైన కథ పడకపోవడం కూడా దీనికి కారణం కావచ్చు. కానీ.. వైష్ణవ్‌కి తొలి చిత్రంతోనే పర్ఫామెన్స్‌కి స్కోప్ ఉన్న పాత్ర లభించింది. దానికి పూర్తి న్యాయం చేశాడు. అయితే కొన్ని కొన్ని ఎమోషనల్ సీన్స్‌లో ఇంకా బాగా చేస్తే బాగుండు అని అనిపిస్తుంది. కానీ.. సీన్‌ని చెడగొట్టినట్టు అయితే చేయలేదు.

ఇక హీరోయిన్‌గా కొత్త పిల్ల కృతిశెట్టి కుమ్మేసింది. క్లైమాక్స్ సీన్‌ ప్రేక్షకులకు కన్వెన్స్ అయ్యిందంటే మాత్రం.. ఆ క్రెడిట్ కృతిశెట్టికే దక్కుతుంది. స్క్రీన్‌పై చాలా అందంగా ఫ్రెష్ లుక్‌లో కనిపించింది. ఎమోషనల్ సీన్స్‌లో జీవించేసింది. రొమాంటిక్ సన్నివేషాల్లో సైతం మెప్పించింది. సముద్రం మధ్యలో హీరో హీరోయిన్లు ఏకాంతంగా గడిపే సీన్ హైలైట్ అయ్యింది.

ఈ సినిమాలో ప్రతినాయకుడు శేషారాయణం పాత్రలో భయపెట్టాడు మక్కల్ సెల్వన్ విజయ్ సేతుపతి. ఉప్పెన చిత్రానికి ప్రధాన బలం ఈయనే. నరనరాల్లో పరువుని నింపుకున్న కుల క్రూరత్వపు మూర్ఖుడిగా రాయణం పాత్రతో అదరగొట్టాడు. అతని మేనరిజం, డైలాగ్ డెలివరీ ఆకట్టుకుంటుంది. ఏటీ.. అనే విజయ్ సేతుపతి గర్జింపు థియేటర్‌లో మారుమోగింది.

టీలో చక్కెర ఎక్కువైతే కాసిన్ని పాలో లేకపోతే డికాక్షన్‌నో కలుపుకుంటాం. కానీ నోట్లో మరికాస్త చక్కర పోసుకుని టీ తాగితే.. అందులోని గుణాన్ని అలాగే ఉంచొచ్చని.. మాట వినని మనిషి మన రూటుకి రావాలంటే ఇలాంటి దారులు చాలా ఉన్నాయ్ అంటూ విలనిజం పండించే సీన్‌లు విజయ్ సేతుపతి నుంచి ఈ సినిమా ద్వారా చాలా ఆశించవచ్చు.

‘నీ కన్ను నీలి సముద్రం’ అనే పాటతో సినిమాకి హైప్ ఇచ్చిన దేవిశ్రీ ప్రసాద్.. జల జల జలపాతం నువ్వు, ఈశ్వర పాటలతో మెస్మరైజ్ చేశాడు. నేపథ్య సంగీతంతో ‘ఉప్పెన’ చిత్రానికి ప్రాణం పోశారనే చెప్పాలి. సముద్ర తీరపు అందాలతో పాటు ఉప్పాడ ప్రజల సహజ సిద్దమైన జీవన శైలిని తన కెమెరాతో అంతే సహజత్వంగా చూపించారు సినిమాటోగ్రాఫర్ సైనుద్దీన్. హీరోయిన్‌ని చాలా అందంగా చూపించారు. జాతర, మత్స్యకారులు సముద్రంలోకి వేటకు వెళ్లే సీన్లలో సహజత్వం ఉట్టిపడేలా చూపించారు.

మొత్తంగా ‘ఉప్పెన’ అనే ప్రేమకథా చిత్రం ద్వారా మగతనం అంటే కొత్త అర్థాన్ని చూపించే ప్రయత్నం చేశాడు కొత్త దర్శకుడు. ప్రేమకు దైవత్వానికి అంగవైకల్యం అడ్డు రాదని పెయిన్ ఫుల్‌గా చూపించాడు. అతని ప్రయత్నానికి ఫుల్ మార్కులు పడకపోవచ్చు కానీ.. ప్రేక్షకులకు మంచి అనుభూతిని ఇస్తుంది ఈ ‘ఉప్పెన’.

LEAVE A REPLY

Please enter your comment!
Please enter your name here