UNHRC on farmers Protest: రైతుల ఆందోళనపై స్పందించిన ఐరాస.. సంయమనం పాటించాలని సూచన – united nation human rights commission responded on farmer protests

0
23


ప్రధానాంశాలు:

  • సాగు చట్టాలపై రైతుల ఉద్యమానికి అంతర్జాతీయంగా మద్దతు.
  • వ్యవసాయ సంస్కరణలపై నిగ్రహం అవసరమన్న ఐరాస.
  • భావవ్యక్తీకరణ హక్కులను రక్షించాలని సూచన.

సాగు చట్టాల వ్యతిరేకంగా రెండు నెలలకుపైగా ఢిల్లీ సరిహద్దుల్లో రైతులు కొనసాగిస్తున్న ఆందోళనలకు అంతర్జాతీయంగా మద్దతు లభిస్తోన్న విషయం తెలిసిందే. తాజాగా, ఈ అంశంపై ఐక్యరాజ్యసమితి మానవహక్కుల కమిషన్ సైతం స్పందించింది. ప్రభుత్వం, రైతులు సంయమనం పాటించాలని శుక్రవారం పిలుపునిచ్చింది. ఈ మేరకు ట్విట్టర్‌లో వెల్లడించింది.

‘ఆందోళన కొనసాగిస్తున్న రైతులు, ప్రభుత్వం గరిష్ట సంయమనం పాటించాలని సూచిస్తున్నాం.. శాంతియుతంగా నిరసన తెలుపుతున్న రైతుల పట్ల నిగ్రహం చూపాలి.. ఆఫ్‌లైన్, ఆన్‌లైన్‌లోనూ భావవ్యక్తీకరణ హక్కులను కాపాడాలి… అందరికీ మానవహక్కుల విషయంలో తగిన పరిష్కారాలను కనుగొనడం చాలా కీలకం’ అని పేర్కొంది.

కేంద్రం తీసుకొచ్చిన చట్టాలు కార్పొరేట్ సంస్థలకు ప్రయోజనం చేకూర్చి, తమ పాలిట శరాఘాతంగా ఉన్నాయని గతేడాది నవంబర్ నుంచి వేలాదిగా రైతులు ఢిల్లీ సరిహద్దుల్లో ఆందోళనలు చేస్తున్న విషయం తెలిసిందే. ఈ చట్టాలు తమపాలిట మరణ శాసనాలని వాటిని తక్షణమే రద్దుచేయాలని రైతులు డిమాండ్ చేస్తున్నారు. అయితే, కేంద్రం మాత్రం ససేమిరా అంటోంది. వ్యవసాయ చట్టాలను పార్లమెంట్ సాక్షిగా శుక్రవారం మరోమారు గట్టిగా సమర్థించుకొంది.

రాజ్యసభలో రాష్ట్రపతి ప్రసంగానికి ధన్యవాద తీర్మానంపై జరిగిన చర్చ సందర్భంగా వ్యవసాయ శాఖ మంత్రి నరేంద్ర సింగ్‌ తోమర్‌ మాట్లాడుతూ చట్టాల్లో ఉన్న ఒక్క లోపాన్ని కూడా ప్రతిపక్షాలు చెప్పలేకపోతున్నాయని ఆరోపించారు. రైతుల మనోభావాలను గుర్తించి చట్టాల్లో సవరణలు చేస్తామని చెప్పామని, దానర్థం వాటిలో లోపాలు ఉన్నట్టు కాదని వివరణ ఇచ్చారు.

‘వీటిని నల్ల చట్టాలని అంటున్నారు. వీటిలోని నలుపు ఎక్కడ ఉందో చెప్పాలని గత రెండు నెలలుగా అడుగుతున్నా రైతు సంఘాల నేతలు, ప్రతిపక్షాల నుంచి సమాధానం రావడం లేదు’ అని చెప్పారు. రైతుల భూములను వ్యాపారాలు లాక్కొనే నిబంధన కాంట్రాక్టు వ్యవసాయ చట్టంలో ఎక్కడుందో చెప్పాలని నిలదీశారు. మార్కెట్‌ యార్డులు విధించే పన్నులను రద్దు చేశామని, అయినా సమ్మె ఎందుకు జరుగుతోందో అర్థం కావడం లేదని అన్నారు.

LEAVE A REPLY

Please enter your comment!
Please enter your name here