ulundurpet srivari temple: తమిళనాడు: శ్రీవారి ఆలయానికి భూమి పూజ.. రూ.20 కోట్ల స్థలం విరాళంగా ఇచ్చిన భక్తుడు – laying foundation stone for sri venkateswara swamy temple construction in ulundurpet in tamil nadu

0
21


ప్రధానాంశాలు:

  • తమిళనాడులో శ్రీవారి ఆలయానికి భూమి పూజ.
  • భక్తుడు విరాళంగా ఇచ్చిన స్థలంలోనే ఆలయం.
  • తమిళనాడు సీఎం చేతుల మీదుగా శంకుస్థాపన.

తమిళనాడులోని ఉలుందురూపేటలో శ్రీ వేంకటేశ్వర స్వామివారి ఆలయ నిర్మాణం కోసం సోమవారం ఉదయం శాస్త్రోక్తంగా భూమి పూజ నిర్వహించారు. తిరుమల తిరుపతి దేవస్థానం ఆధ్వర్యంలోనే ఈ ఆలయ నిర్మాణం జరుగుతోంది. అర్చకులు సంకల్పం, పుణ్యాహవాచనం, గణపతి పూజ,విష్వక్సేన పూజ నిర్వహించారు. వేద మంత్రోచ్ఛారణల మధ్య నవధాన్యాలను భూమిలో వేసి, ఆలయ నిర్మాణానికి నాలుగు ఇటుకలు ఉంచి నాలుగు వేదాలను ఆవాహనం చేశారు. 24 బెత్తలు ( 18 అంగుళాలు) భూమిలో ఈ ఇటుకలు ఉంచి ప్రత్యేకంగా శిలాన్యాస పూజలు చేశారు.

భూమి పూజ సందర్బంగా స్థానిక ఎమ్మెల్యే, టీటీడీ పాలకమండలి సభ్యుడు కుమరగురు భారీ ఏర్పాట్లు చేశారు. ఈ కార్యక్రమానికి తమిళనాడు ముఖ్యమంత్రి యడిప్పాడి పళనిస్వామి, టీటీడీ చైర్మన్ వైవీ సుబ్బారెడ్డి దంపతులు, టీటీడీ పాలకమండలి సభ్యులు శేఖర్ రెడ్డి, పలువురు ఎమ్మెల్యేలతో పాటు వేలాదిమంది భక్తులు హాజరయ్యారు.

ఉలందురుపేట ఎమ్మెల్యే, టీటీడీ పాలక మండలి సభ్యుడు కుమారగురు ఆలయ నిర్మాణం కోసం రూ.20 కోట్ల విలువ చేసే 3 ఎకరాల 98 సెంట్ల భూమి దానంగా ఇచ్చారు. అలాగే, ఆలయ నిర్మాణానికి రూ.3.16 కోట్ల విరాళాలు అందించారు. ఇక్కడ శ్రీవారి ఆలయంతో పాటు పద్మావతి అమ్మవారు, ఆండాల్ అమ్మవారి ఉప ఆలయాలు నిర్మించనున్నారు. ఆలయం చుట్టూ ప్రహరీ గోడ, పోటు, ఆఫీసు, స్టోర్ రూమ్‌తో పాటు భక్తులకు సదుపాయంగా పార్కింగ్ ఏర్పాటు చేస్తున్నారు.

తిరుమల తిరుపతి దేవస్థానమ్స్(టీటీడీ) ఆధ్వర్యంలో దేశంలోని వివిధ ప్రాంతాల్లో శ్రీవారి ఆలయాల నిర్మాణం కొనసాగుతోంది. జమ్మూ కశ్మీర్‌లోనూ శ్రీవారి ఆలయాన్ని నిర్మించనుంది. మొత్తం రూ.17 కోట్ల వ్యయంతో నిర్మించే ఈ ఆలయానికి జమ్మూ కశ్మీర్ ప్రభుత్వం 100 ఎకరాల భూమిని కేటాయించింది. ప్రసిద్ధ వైష్ణోదేవి ఆలయానికి సమీపంలో తిరుమల ఆలయ ప్రతిరూపాన్ని నిర్మించేందుకు తిరుమల తిరుపతి దేవస్థానం ప్రయత్నిస్తోంది.

LEAVE A REPLY

Please enter your comment!
Please enter your name here