turkey pet dog: అనారోగ్యంతో ఆస్పత్రిలో యజమాని.. కోలుకున్న వరకూ అక్కడే నిరీక్షించిన పెంపుడు కుక్క! – pet dog spends days waiting outside hospital for her hooman to recover in turkey

0
24


కుక్కకు విశ్వాసం ఎక్కువ అంటారు.. తనకు ఒక్క పూట ఆహారం పెట్టినవారి ఇంటికి కాపాలా కాస్తుంది. ఇక, పెంపుడు శునకాలైతే ఎటువంటి ప్రమాదం రాకుండా చూసుకోవడమే కాదు. యజమాని ప్రాణాలకు తన ప్రాణాలను అడ్డేస్తుంది. ఇటీవలే ఓ పెంపుడు కుక్క.. తాచుపాము బారి నుంచి ఓ కుటుంబాన్ని కాపాడిన ఘటన మీడియాలో వైరల్ అయిన విషయం తెలిసిందే. తాజాగా, ఓ పెంపుడు శునకం.. తన యజమాని అనారోగ్యంతో చికిత్స తీసుకుంటే ఆయన కోలుకుని ఇంటికి వచ్చే వరకూ ఆస్పత్రి వద్దే ఉండిపోయింది. యజమాని కుటుంబసభ్యులు ఇంటికి తీసుకొచ్చినా అక్కడ ఉండకుండా తిరిగి ఆస్పత్రికే వచ్చేది. రోజూ ఉదయం 9 గంటలకు ఆస్పత్రికి చేరుకుని రాత్రివరకూ అక్కడే ఉంటూ యజమాని కోసం నీరిక్షించేది.

టర్కీలో చోటుచేసుకున్న ఈ ఘటన ప్రస్తుతం సోషల్ మీడియాలో వైరల్ అవుతోంది. ట్రాబ్‌జోన్ ప్రాంతానికి చెందిన సెమల్ సెంటర్క్ అనే వ్యక్తి గత కొన్నేళ్లుగా బోన్కుక్ అనే కుక్కను పెంచుకుంటున్నారు. దానిని ఆయన ఎంతో ప్రేమగా చూసుకునేవారు. అది కూడా యజమాని పట్ల ఎంతో విశ్వాసంగా ఉండేది. ఈ నేపథ్యంలో సెమల్ జనవరి 14న అనారోగ్యానికి గురయ్యారు. దీంతో ఆతడిని చికిత్స కోసం కుటుంబసభ్యులు అంబులెన్స్‌లో ఆసుపత్రికి తరలించారు. దీనిని గమనించిన బోన్కుక్ ఆ అంబులెన్స్‌ వెంట పరుగులు తీసి ఆసుపత్రికి చేరింది.

ఆ రోజంతా అక్కడే ఉన్న శునకాన్ని సెమల్‌ కుమార్తె ఐనూర్ ఎగెలి రాత్రి ఇంటికి తీసుకొచ్చారు. అయితే మర్నాడు ఉదయమే తిరిగి ఆసుపత్రి వచ్చింది. ‘ప్రతి రోజూ ఆస్పత్రికి వచ్చి యజమాని కోసం నిరీక్షించి రాత్రికి తిరిగి ఇంటికి వెళ్లేది.. ఇలా వారం రోజుల పాటు ఆ కుక్క ఆసుపత్రి వద్ద యజమాని కోసం పడిగాపులు కాసింది’ అని అక్కడ సెక్యూరిటీ గార్డ్‌గా పనిచేసే ముహమ్మెట్ అక్‌డెనిజ్ అన్నారు. జనవరి 20న కోలుకున్న సెమల్.. వీల్‌చైర్‌లో ఆసుపత్రి గేటు వద్దకు వచ్చి తన కుక్కను చూసి పరవశించిపోయారు.

‘బోన్కుక్‌తో నాకు చాలా అనుబంధం ఏర్పడింది.. నేను తనను చాలా మిస్ అవుతున్నాను’ అని అన్నారు. ప్రస్తుతం దీనికి సంబంధించిన ఫోటోలు ఇప్పుడు సోషల్ మీడియాలో వైరల్ అవుతున్నాయి.. శునకానికి ఇంత విశ్వాసమా..ప్రస్తుత కాలంలో మనుషులు కూడా ఇంతటి అభిమానం చూపించడం లేదని అభినందిస్తున్నారు.

LEAVE A REPLY

Please enter your comment!
Please enter your name here