Trivikram Srinivas: RED: వేదికపై త్రివిక్రమ్ భావోద్వేగం.. హీరో రామ్ పెదనాన్న కాళ్లు పట్టుకుని..! – trivikram srinivas emotional speech at red movie pre release event

0
26


మాటల మాంత్రికుడిగా పేరుగాంచిన ప్రముఖ సినీ రచయిత, దర్శకుడు త్రివిక్రమ్ సినిమాలకే కాదు.. ఆయన స్పీచ్‌కి కూడా ఫ్యాన్స్ ఉన్నారనడంలో అతిశయోక్తి లేదు. అందుకే, ఏ సినిమా వేడుకలోనైనా త్రివిక్రమ్ మాటల కోసం చాలా మంది వేచి చూస్తూ ఉంటారు. ఆయన మాటల్లో మ్యాజిక్ ఉంటుంది.. ఎమోషన్ ఉంటుంది. మాటలతోనే స్ఫూర్తిని నింపే మాంత్రికుడు ఆయన. అలాంటి మాంత్రికుడు భావోద్వేగానికి గురయ్యారు. తాను సినిమా పరిశ్రమలో ఎదగడానికి కారణమైన నిర్మాత గురించి మాట్లాడుతూ ఎమోషనల్ అయ్యారు. ఆ నిర్మాత ఎవరో కాదు.. స్రవంతి మూవీస్ అధినేత, హీరో రామ్ పెదనాన్న ‘స్రవంతి’ రవికిశోర్.

స్రవంతి మూవీస్ బ్యానర్‌పై రామ్ హీరోగా తిరుమల కిశోర్ దర్శకత్వంలో రూపొందిన చిత్రం ‘రెడ్’. మాళవికా శర్మ, నివేదా పేతురాజ్, అమృతా అయ్యర్ హీరోయిన్లుగా నటించారు. మణిశర్మ సంగీతం సమకూర్చారు. ఈ సినిమా సంక్రాంతి కానుకగా ఈనెల 14న విడుదలవుతోంది. చిత్ర ప్రచారంలో భాగంగా మంగళవారం ‘రెడ్’ ప్రీ రిలీజ్ ఈవెంట్ నిర్వహించారు. ఈ వేడుకకు త్రివిక్రమ్ ముఖ్య అతిథిగా విచ్చేశారు. త్రివిక్రమ్ మాట్లాడుతూ తన జీవితంలో ‘స్రవంతి’ రవికిశోర్ స్థానం ఏమిటో చెప్పారు.

సంక్రాంతి రేసులో పునర్నవి భూపాలం ‘సైకిల్’.. బిగ్ బాస్ బ్యూటీ సర్‌ప్రైజ్
‘‘స్వయంవరం సినిమా తరవాత నాకు ఎందుకో ఎవరూ సినిమాలు ఇవ్వలేదు. దీంతో భీమవరం వెళ్లి క్రికెట్ ఆడుకుంటుంటే.. నాకు ఫోన్ చేసి అక్కడి నుంచి పిలిపించి నాతో ‘నువ్వే కావాలి’ రాయించారు. సార్.. నేను మీకు ఆ విషయంలో చాలా రుణపడి ఉన్నాను. ‘నువ్వు నాకు నచ్చావ్’ సినిమాకు నేను పనిచేసినప్పుడు నేను రాసిన ఫైల్ ఆయన దగ్గర పెట్టుకుని రాత్రి 12 గంటలకు నాకు ఫోన్ చేసి ఈ డైలాగ్ ఎంత బాగుంది అని ఆయన చదివి వినిపించేవారు.

కాళిదాసు ఒక మాట చెబుతాడు.. అరసికేషు కవిత్వ నివేదనం మాలిక మాలిక మాలిక అని మూడు సార్లు చెప్పాడు. అంటే, రసికుడు కానివాడికి నా కవ్వితం చెప్పే ఖర్మ నా నుదుటి మీద రాయొద్దు రాయొద్దు రాయొద్దు అని. కానీ, నా అదృష్టం ఇంత రసికుడికి నాలుగు సినిమాలు రాసే అదృష్టం దక్కింది నాకు. అందుకని, ఆ అదృష్టాన్ని నాకు ఇచ్చిన భగవంతుడికి.. దాన్ని అనుభవించే సామర్థ్యం, జీవితం ఉన్న రవికిశోర్ గారికి మనస్ఫూర్తిగా నా కృతజ్ఞతలు’’ అని రవికిశోర్‌పై తనకున్న గౌరవాన్ని, ప్రేమను చాటుకున్నారు త్రివిక్రమ్.

స్క్రిప్ట్‌ను చాలా బలంగా చదివే వ్యక్తుల్ని ఇండస్ట్రీలో తాను ఇద్దరినే చూశానని త్రివిక్రమ్ అన్నారు. తాను ‘శివయ్య’ సినిమాకి మురళీ దగ్గర అసిస్టెంట్‌గా పనిచేసినప్పుడు రామానాయుడు గారిని చూశానని.. నెక్ట్స్ మళ్లీ రవికిశోర్ గారినే చూశానని త్రివిక్రమ్ చెప్పారు. అలాంటి వ్యక్తులతో తన కెరీర్ ప్రారంభంలోనే పనిచేయడం తన అదృష్టమని అన్నారు. వాళ్ల దగ్గర నుంచి ఎంతో నేర్చుకున్నానని వెల్లడించారు.

‘‘నువ్వే కావాలి, నువ్వు నాకు నచ్చావ్, నువ్వే నువ్వే.. ఒకటి కాదు, చాలా పెద్ద జర్నీ చేశాం. అలాంటి గొప్ప ప్రయాణాన్ని, అనుభూతిని నాకు ఇచ్చినందుకు.. సినిమాను ఎంత గౌరవించాలో నాకు నేర్పినందుకు నేను మనస్ఫూర్తిగా రవికిశోర్ గారికి ఎప్పుడూ రుణపడి ఉంటాను. ఈ విషయాలు నేను ఎప్పుడూ ఆయనకు చెప్పలేదు. ఎందుకంటే నాకు పెద్దగా ఎక్స్‌ప్రెస్ చేయడం రాదు. ఆయన కూడా అలాంటివి వినే తరహా కాదు’’ అంటూ రవికిశోర్ గురించి గొప్పగా చెప్పుకొచ్చారు త్రివిక్రమ్. ఈ క్రమంలో భావోద్వేగానికి గురై రవికిశోర్ కాళ్లకు నమస్కారం చేశారు. ఆ సమయంలో త్రివిక్రమ్ మాటల్లో వణుకు కనిపించింది. ఎంత ఎదిగినా ఒదిగి ఉండే తత్వం ఆయనలో కనిపించింది.

LEAVE A REPLY

Please enter your comment!
Please enter your name here