Tripura CM: నేపాల్, శ్రీలంకలోనూ బీజేపీ సర్కార్.. అమిత్ షా టార్గెట్ అదే: బీజేపీ సీఎం – amit shah said bjp will form governments in nepal, sri lanka: tripura cm biplab kumar deb

0
28


కేంద్రంలో 2014లో తిరుగులేని మెజార్టీతో అధికారంలోకి వచ్చిన బీజేపీ.. క్రమంగా దేశంలోని అన్ని రాష్ట్రాల్లో పాగా వేస్తోంది. ఇప్పటికే అత్యధిక రాష్ట్రాల్లో జయకేతనం ఎగరేసి భారతదేశ చిత్ర పటంతో మెజార్టీ భాగాన్ని కాషాయమయం చేసింది. నాటకీయ పరిణామాల అనంతరం కర్ణాటకలోనూ తిరిగి అధికారం దక్కించుకొని దక్షిణాదిలోనూ మేమున్నామని ఘనంగా చాటుకుంది. ఇక కేరళలోనూ తమదే అధికారమని దీమాగా చెబుతోంది. ఇక బీజేపీ నెక్ట్స్ టార్గెట్ ఏంటీ? అంటే.. నేపాల్, శ్రీలంక దేశాల్లోనూ పార్టీని విస్తరించి అధికారం చేపట్టడమట!

అవును.. అమిత్ షా లక్ష్యం ఇదేనట. ఇదెవరో విపక్ష నేత చేసిన విమర్శ అనుకునేరూ..! బీజేపీపై పీకల్లోతు కోపంతో ఇలా ఘాటుగా సెటైర్ వేశారని ఊహించుకునేరూ.. కానే, కాదు! బీజేపీ నేత చెప్పిన విషయమే. అందులోనూ ఆయన ఓ రాష్ట్రానికి ముఖ్యమంత్రి కూడా. అందుకే ఆయన చేసిన ఈ వ్యాఖ్యలు ఆటంబాంబ్‌లా పేలాయి.

త్రిపుర ముఖ్యమంత్రి విప్లవ్‌ దేవ్‌ కుమార్‌ సంచలన వ్యాఖ్యలకు పెట్టింది పేరు. తరచూ తన మాటలతో ఆ రాష్ట్ర ప్రజలను షాక్‌కు గురిచేస్తుంటారు. తాజాగా ఆయన చేసిన వ్యాఖ్యలు దేశవ్యాప్తంగా చర్చనీయాంశంగా మారాయి. బీజేపీ విదేశాల్లోనూ అధికారంలోకి వస్తుందని.. ఇందుకు గాను కేంద్ర హోం మంత్రి, బీజేపీ మాజీ చీఫ్ అమిత్‌ షా ఇప్పటికే తగిన వ్యూహ రచన చేశారని ఆయన చెప్పారు మరి!

‘‘అమిత్‌ షా బీజేపీ జాతీయ ప్రధాన కార్యదర్శిగా ఉన్నప్పుడు ఒకసారి మన రాష్ట్రానికి అతిథిగా వచ్చారు. ఆ సమయంలో మనలో ఒకరు.. నాకు తెలిసి అజయ్‌ జమ్‌వాల్‌ (ఈశాన్య జోనల్‌ బీజేపీ సెక్రటరీ) అనుకుంటా.. ఆయనతో ‘ఇప్పటికే దేశంలోని పలు రాష్ట్రాల్లో బీజేపీ అధికారంలోకి వచ్చింది. అందుకు అభినందనలు తెలుపుతున్నా’ అన్నారు. అందుకు అమిత్‌ షా బదులిస్తూ ‘శ్రీలంక, నేపాల్‌ మిగిలి ఉన్నాయి. పార్టీని అక్కడ కూడా విస్తరించి బీజేపీని అధికారంలోకి తీసుకురావాలి’ అన్నారు’’ అంటూ సీఎం విప్లవ్‌ కుమార్ దేవ్‌ చెప్పుకొచ్చారు.

త్రిపుర రాజధాని అగర్తలాలో ఏర్పాటు చేసిన ఓ కార్యక్రమంలో మాట్లాడుతూ.. విప్లవ్‌ దేవ్‌ ఈ వ్యాఖ్యలు చేశారు. కేంద్ర బడ్జెట్‌లో తమ రాష్ట్రానికి చేసిన కేటాయింపులకు గాను ధన్యవాదాలు తెలపడానికి ఆ కార్యక్రమాన్ని ఏర్పాటు చేశారు. ఇంతటితో అయిపోయిందనుకునేరూ..! ఇంకా ఉంది.

శ్రీలంక, నేపాల్‌లో బీజేపీ విస్తరణ కార్యక్రమాన్ని మన సీఎం విప్లవ్ కుమార్ దేవ్ ‘ఆత్మనిర్భర్ సౌత్ ఏసియా’గా అభివర్ణించారు. ప్రధాని నరేంద్ర మోదీ గత కొంతకాలంగా ‘ఆత్మనిర్భర భారత్’ పదాన్ని వినిపిస్తున్న సంగతి తెలిసిందే. భారత్ అన్ని రంగాల్లో స్వయం సంవృద్ధి సాధించాలనే ఉద్దేశంతో ప్రధాని దాని గురించి ప్రస్తావిస్తున్నారు. త్రిపుర ముఖ్యమంత్రి దాన్ని మరో శిఖరానికి తీసుకెళ్లి, దక్షిణాసియా దేశాల వరకు విస్తరించారన్నమాట. అందుకు తగిన వివరణ కూడా ఇచ్చారు.

‘సబ్ కా సాత్, సబ్ కా వికాస్ (అందరికీ అభివృద్ధి ఫలాలు) నినాదంతో నరేంద్ర మోదీ ప్రభుత్వం పనిచేస్తోంది. కేంద్రం ఇటీవల ప్రవేశపెట్టిన పాలసీలు, బడ్జెట్.. బంగ్లాదేశ్, భూటాన్, నేపాల్ దేశాలకు కూడా ప్రయోజనం చేకూర్చేవిధంగా ఉన్నాయి. అసలు 2014లో కేంద్రంలో ప్రభుత్వం ఏర్పాటు చేసిన వెంటనే మోదీ చేసిన పనేంటో తెలుసా.. సార్క్ దేశాధ్యక్షులందరినీ ఆహ్వానించి సమావేశమయ్యారు. వీరిలో పాకిస్థాన్ అధ్యక్షుడు కూడా ఉన్నారు’ అని సీఎం విప్లవ్ దేవ్ చెప్పుకొచ్చారు.

దీన్ని బట్టే మోదీ విశాల దృక్పథాన్ని అర్థం చేసుకోవచ్చునంటూ విప్లవ్ దేవ్ తన వ్యాఖ్యలను సమర్థించుకున్నారు. భారత్ తన దాయాది దేశాలతో కలిసి ఎదగాలని కోరుకుంటోందని ఆయన వివరించారు. పనిలో పనిగా కేరళ ఎన్నికల పైనా తనదైన శైలిలో వివరణ ఇచ్చారు.

‘కేరళలో గత కొన్నేళ్లుగా పాతుకుపోయిన పాత సంప్రదాయాన్ని బీజేపీ మార్చనుంది. ఇప్పటిదాకా కేరళలో ఐదు సంవత్సరాలు కాంగ్రెస్‌ అధికారంలో ఉంటే.. తర్వాతి ఐదేళ్లు లెఫ్ట్‌ అధికారంలో ఉండేది. బీజేపీ ఈ పద్దతిని మార్చనుంది. త్వరలోనే దక్షిణాది రాష్ట్రాల్లో పార్టీ పాగా వేయనుంది’ విప్లవ్ దేవ్ అన్నారు.

దేశంలో ఇంటర్నెట్ ఎప్పటి నుంచి ఉందో తెలుసా?
విప్లవ్ కుమార్ దేవ్ త్రిపురలో 2016 నుంచి 2018 వరకు బీజేపీ రాష్ట్ర అధ్యక్షుడిగా పనిచేశారు. అక్కడ పార్టీ ఘన విజయం సాధించిన తర్వాత ముఖ్యమంత్రిగా బాధ్యతలు చేపట్టారు. అంతకంటే ముందే సంచలన వ్యాఖ్యలతో వార్తల్లో ప్రముఖంగా నిలిచారు.

మూడేళ్ల కిందట విప్లవ్ దేవ్.. భారతదేశంలో ఇంటర్నెట్‌ వినియోగం అంశంపై మాట్లాడుతూ.. మహాభారత కాలం నుంచే దేశంలో ఇంటర్నెట్ ఉందన్నారు. సంజయుడు యుద్ధ భూమిని సందర్శించకుండానే.. అక్కడ ఏం జరుగుతుందనే వివరాలను ధృతరాష్ట్రుడికి వివరించాడట. అది ఇంటర్నెట్‌ వల్లే సాధ్యమైందట. నాటి నుంచి భారత్‌లో నెట్‌ వినయోగం ఉందట. విప్లవ్ దేవ్ మాటల్లో లాజిక్ ఉంది కదూ..!!

LEAVE A REPLY

Please enter your comment!
Please enter your name here