thalapathy vijay: రజినీకాంత్ యూటర్న్.. హీరో విజయ్ ఎంట్రీ! తమిళ రాజకీయాల్లో ట్విస్టులు! – rajinikanth u-turn: actor vijay name hits tamil nadu politics

0
25


మిళనాడు రాజకీయాల్లో అనూహ్య పరిణామాలు చోటు చేసుకుంటున్నాయి. సూపర్‌స్టార్ రజినీకాంత్ రాజకీయ రంగ ప్రవేశం విషయంలో యూటర్న్ తీసుకోవడంతో తెరపైకి ఇతర స్టార్ల పేర్లు వస్తున్నాయి. తాజాగా హీరో విజయ్‌ పేరు మరోసారి తెరపైకి వచ్చింది. ఆయన త్వరలోనే పార్టీ ప్రకటిస్తారని తమిళనాట జోరుగా ప్రచారం జరుగుతోంది. దీనికి తోడు ఆయన ముఖ్యమంత్రి పళనిస్వామితో భేటీ కావడం ఈ ఊహాగానాలకు మరింత బలం చేకూరుస్తోంది.

డిసెంబర్ 31న విజయ్ కొత్త పార్టీని ప్రకటించే అవకాశం ఉన్నట్లు ప్రచారం జరుగుతోంది. ఇంతకుముందు రాజకీయాల్లోకి వస్తానని ప్రకటించిన రజినీకాంత్.. అదే రోజున కొత్త పార్టీ పేరు అనౌన్స్ చేస్తానని ప్రకటన చేసిన సంగతి తెలిసిందే. రజినీకాంత్ తన నిర్ణయాన్ని వెనక్కి తీసుకున్న నేపథ్యంలో అదే రోజున విజయ్.. తన పార్టీని ప్రకటించి సంచలనానికి తెర తీసే అవకాశం ఉన్నట్లు రాజకీయ, సినీ వర్గాల్లో చర్చ జరుగుతోంది.

విజయ్ పేరు కొత్తగా వచ్చింది కాదు..
తమిళనాడు రాజకీయాల్లో హీరో విజయ్‌ పేరు అకస్మాత్తుగా వినిపిస్తున్నది కాదు.. ఆయన రాజకీయాల్లోకి వస్తారని ఎప్పటి నుంచో ప్రచారం జరుగుతోంది. జయలలిత కన్నుమూసిన సమయంలో ఆయన పేరు ప్రధానంగా చర్చకు వచ్చింది. గడిచిన రెండేళ్లుగా ఈ ఊహాగానాలకు మరింత రెక్కలు వచ్చాయి. దీనికి తోడు కొన్ని పరిణామాలు కూడా చోటు చేసుకున్నాయి.

నటుడు విజయ్ తండ్రి ఎస్‌ఏ చంద్రశేఖరన్‌ నవంబర్‌లో విజయ్‌ పేరుతో పార్టీ ప్రకటించారు. ఎన్నికల సంఘం గుర్తింపు కోసం కూడా దరఖాస్తు చేసుకున్నారు. ఈ అంశం తమిళనాడు రాజకీయాలను హీటెక్కించింది. కానీ, దీనిపై స్పందించిన విజయ్‌.. ఆ వేడిని చల్లార్చారు. తన తండ్రి పెట్టిన పార్టీకి, తనకు ఎలాంటి సంబంధం లేదని ప్రకటించి మరో సంచలనానికి తెర తీశారు. అంతేకాదు, తన అభిమాన సంఘం ‘మక్కళ్‌ ఇయక్కమ్‌’ సభ్యులెవరూ తన తండ్రి ప్రకటించిన పార్టీలో చేరొద్దని విజయ్ బహిరంగంగానే చెప్పారు.

ఈ పరిణామాలతో విజయ్‌ రాజకీయాల్లోకి రారనే అందరూ భావించారు. కానీ, కొన్ని రోజుల కిందట మక్కళ్‌ ఇయక్కమ్‌ కార్యదర్శులతో విజయ్‌ రహస్యంగా సమావేశమయ్యారు. ఎవరూ తొందపడి నిర్ణయాలు తీసుకోవద్దని.. ఏ రాజకీయ పార్టీలోనూ చేరవద్దని చెప్పినట్లు సమాచారం. ‘మీరు ఎదురుచూస్తున్న క్షణం త్వరలోనే వస్తుంది. నా నుంచి మంచి ప్రకటన వెలువడుతుంది’ అని భరోసా ఇచ్చినట్లు తెలిసింది. రజనీకాంత్ పార్టీ ప్రకటన వార్తల నేపథ్యంలో విజయ్ ఈ సమావేశం నిర్వహించినట్లు సమాచారం.

ఈ ఘటన అనంతరం విజయ్ రాజకీయాల్లోకి వస్తున్నారంటూ మళ్లీ ఊహాగానాలు జోరందుకున్నాయి. తాజాగా ఆయన తమిళనాడు సీఎం పళనిస్వామిని కలవడం ఈ వార్తలకు మరింత బలం చేకూర్చాయి. అయితే, ముఖ్యమంత్రిని కలవడం వెనుక ఎలాంటి రాజకీయ కోణం లేదని, ‘మాస్టర్‌’ సినిమా విడుదల అంశంపై సీఎంను కలిశానని ఆయన వివరణ ఇచ్చారు.

నేనే ముఖ్యమంత్రి: కమల్ హాసన్
మరోవైపు.. ఇప్పటికే పార్టీ ప్రకటించి ప్రచార సభలు కూడా నిర్వహిస్తున్న మరో స్టార్ హీరో కమల్ హాసన్.. భావసారుప్య పార్టీలతో కూటమి ఏర్పాటు చేసే యోచనలో ఉన్నారు. కూటమి ఏర్పాటైనా.. ముఖ్యమంత్రి అభ్యర్థిగా తానే ఉంటానని అభిమానులకు స్పష్టం చేశారు.

రజినీకాంత్ నిర్ణయంపైనా కమల్ స్పందించారు. ఆయన నిర్ణయం తనకు నిరాశ కలిగించిందని వ్యాఖ్యానించారు. అయితే, రజినీ ఆరోగ్యం కూడా తనకు ముఖ్యమేనని అన్నారు. ‘రాజకీయాలను మార్చేస్తా..’ అంటూ తన ఆగమనాన్ని ప్రకటించిన రజినీకాంత్‌.. అనారోగ్య కారణాలతో తన నిర్ణయం వెనక్కి తీసుకున్నారు. పార్టీని ప్రారంభించట్లేదని ప్రకటన చేశారు. అభిమానులు తనను క్షమించాలని కోరారు. రజినీకాంత్ తర్వాత విజయ్‌కు కూడా మంచి ఫ్యాన్ ఫాలోయింగ్‌ ఉంది. మరి ఆయన నుంచి ఎలాంటి ప్రకటన వస్తుందో వేచి చూడాలి..!

LEAVE A REPLY

Please enter your comment!
Please enter your name here