texas crash: టెక్సాస్‌లో బీభత్సం: ఒకదానికొకటి ఢీకొట్టిన 130 వాహనాలు.. ఆరుగురు మృతి – at least 6 dead in massive crash involving more than 100 vehicles in texas

0
20


ప్రధానాంశాలు:

  • అమెరికాలోని టెక్సాస్‌లో ఘోర రోడ్డు ప్రమాదం.
  • ఒకదానికొకటి ఢీకొట్టిన 130 వాహనాలు.
  • భారీగా హిమపాతంతో జనజీవనం అస్తవ్యస్తం.

అమెరికాను మంచు తుఫాను వణికిస్తోంది. తుఫాను కారణంగా టెక్సాస్‌లో ఘోర రోడ్డు ప్రమాదం సంభవించింది. దాదాపు 130 వాహనాలు ఒకదానితో ఒకటి ఢీకొట్టుకుని ఆరుగురు మృతి చెందారు. ఈ ప్రమాదంలో మరో 70 మంది వరకు గాయపడ్డారు. ఫోర్ట్‌వర్త్ వద్ద తొలుత ఫెడ్‌ఎక్స్‌ ట్రక్కు అదుపు తప్పి బారియర్‌ను ఢీకొట్టి అకస్మాత్తుగా నిలిచిపోయింది. దీంతో వెనుకాలే వస్తున్న పలు వాహనాలు ఒకదానితో ఒకటి ఢీకొట్టుకున్నాయి. వాహనాలు వేగంగా దూసుకురావడంతో ఒకదాని కిందకు ఒకటి దూసుకెళ్లాయి.

తీవ్ర మంచుతుఫాను కారణంగా వాహనాలు పట్టుకోల్పోడం వల్లే ఈ ప్రమాదం జరిగిందని ఫోర్ట్‌వర్త్‌ పోలీస్‌ అధికారి డేనియల్‌ తెలిపారు. దీంతో రహదారిపై కిలోమీటర్ల మేర ట్రాఫిక్‌ స్తంభించి వాహనాలు నిలిచిపోయాయి. ఇదిలా ఉండగా ప్రమాదంలో మృతులు, క్షతగాత్రుల సంఖ్య పెరిగే అవకాశం ఉందని అధికారులు పేర్కొన్నారు. వేగంగా వస్తున్న వాహనాలు ముందున్న వాటిని ఢీకొట్టడంతో భారీగా దెబ్బతిన్నాయి. హైడ్రాలిక్‌ రెస్క్యూ పరికరాల సాయంతో వాహనాల్లో చిక్కుకున్నవారిని అగ్నిమాపక సిబ్బంది బయటకు తీశారు.

ఈ ఘటనలో గాయపడ్డ దాదాపు 36 మందిని చికిత్స కోసం హాస్పిటల్‌కు తరలించారని, వీరిలో ముగ్గురి పరిస్థితి విషమంగా ఉందని మెడ్‌స్టార్ మొబైల్ హెల్త్‌కేర్ అధికార ప్రతినిధి మ్యాట్ జవాడస్కై తెలిపారు. మరో 65 మందిని పలు ఆస్పత్రుల్లో చేర్చించి, చికిత్స చేసినట్టు పేర్కొన్నారు. ఈ ప్రమాదంలో నలుగురు అధికారులు కూడా గాయపడ్డారని అన్నారు. ప్రమాదానికి మంచువర్షమే కారణమని అధికారులు అంచనా వేస్తున్నారు. మంచు తుఫాను కారణంగా టెక్సాస్‌ రాష్ట్రంలోని షెర్లీ, డల్లాస్‌లలో ముగ్గురు చొప్పు మృతి చెందారు. కెంటకీ, వర్జీనియా రాష్ట్రాల్లో విద్యుత్‌ సరఫరా నిలిచిపోయింది.

‘ఇటువంటి రోడ్డు ప్రమాదం తాను ఎప్పుడూ చూడలేదు.. రైలు ప్రమాదం జరిగినప్పుడు బోగీలు ఒకదానికొకటి ఢీకొట్టి దూసుకెళ్తాయి.. ఇలా జరుగుతుంది అని ఎన్నడూ ఊహించలేదు’ అని జవాడస్కై వ్యాఖ్యానించారు. ట్రాఫిక్ ఇరువైపులా స్తంభించడంతో ప్రత్యామ్నాయ మార్గాల్లో వాహనాలను మళ్లించేందుకు ప్రయత్నిస్తున్నారు. బాధితుల గురించి వారి కుటుంబాలు సమాచారం తెలుసుకోడానికి ప్రత్యేకంగా వెబ్‌సైట్‌ను ప్రారంభించారు.

LEAVE A REPLY

Please enter your comment!
Please enter your name here