Tapovan artificial Lake: ఉత్తరాఖండ్: సరస్సు లోతు గుర్తించడానికి నేవీ డైవర్లు సాహసం.. వీడియో – navy divers dive into nearly freezing uttarakhand lake to measure depth

0
25


ప్రధానాంశాలు:

  • తపోవన్ వద్ద కొనసాగుతున్న సహాయక చర్యలు.
  • రిషిగంగ ఎగువ ఏర్పడిన కృత్రిమ సరస్సు.
  • లోతును తెలుసుకోడానికి రంగంలోకి దిగిన నేవీ.

రెండు వారాల కిందట ఉత్తరాఖండ్‌లోని చమోలి జిల్లాలో సంభవించిన జలప్రళయంలో ఇప్పటి వరకు 67 మృతదేహాలను వెలికితీశారు. అనేక శరీర భాగాలను గుర్తించారు. తపోవన్ సొరంగం వద్ద ఇంకా సహాయక చర్యలు కొనసాగుతున్నాయి. మంచు చరియలు విరిగిపడిన తర్వాత రిషిగంగా నది పైభాగంలో కొత్తగా ఓ కృత్రిమ సరస్సు ఏర్పడినట్టు పరిశోధకులు గుర్తించిన విషయం తెలిసిందే. సముద్ర మట్టానికి 14,000 అడుగుల ఎత్తులో ఈ సరస్సు ఏర్పడింది.

తపోవన్ నుంచి 5 కిలోమీటర్ల ఎగువన ఏర్పడిన ఈ సరస్సు లోతును తెలుసుకోడానికి నావికాదళం డైవర్ల బృందం అందులోకి దిగింది. సరస్సు ఏర్పడిన ప్రదేశానికి ఎటువంటి రోడ్డు మార్గం లేకపోవడంతో ఎయిర్‌ఫోర్స్‌కు చెందిన అత్యాధునిక తేలికపాటి హెలికాప్టర్ సాయంతో చేరుకున్నారు. ఆపరేషన్ ఆద్యంతం ఐఏఎఫ్ పైలట్లు అత్యంత అప్రమత్తంగా వ్యవహరించారు.

అత్యంత క్లిష్టమైన ఈ ఆపరేషన్‌లో భాగంగా గడ్డకట్టే నీటిలో నావికాదళ డైవర్లు లోపలికి దిగి పరికరాల సాయంతో లోతును తెలుసుకునే ప్రయత్నం చేస్తున్నారు. తపోవన్ ఆనకట్ట మట్టి గోడపై ఒత్తిడిని నిర్ణయించడానికి శాస్త్రవేత్తలు ఈ క్లిష్టమైన డేటాను ఉపయోగిస్తారు. రిషిగంగా సమీపంలో కొత్తగా ఏర్పడిన కృత్రిమ సరస్సు కారణంగా మరోసారి ఆకస్మిక వరదలకు అవకాశం ఉందని శాస్త్రవేత్తలు హెచ్చరిస్తున్నారు. ఉపగ్రహ చిత్రాల ద్వారా ఈ సరస్సు ఎక్కడ ఉందో కచ్చితంగా గుర్తించారు.

సరస్సు ఏర్పడటంతో దాని ఒత్తిడి తపోవన్ డ్యామ్ గోడపై పడి, మరోసారి వరదలకు దారితీస్తుందని ఆందోళన చెందుతున్నారు. హిమానీ నదం ఉప్పొంగి ఆకస్మక వరదలు సంభవించిన తర్వాత దాని వెంట వచ్చి శిథిలాలు రిషిగంగా నది కలిసే చోట అడ్డుపడి సరస్సుగా రూపాంతరం చెందాయి. వరద తాత్కాలిక ఆనకట్టను సృష్టించడంతో రిషిగంగా ప్రవాహానికి అవరోధం ఏర్పడింది.

సరస్సు ఏర్పడటం ఆందోళనకరమని గర్వాల్ యూనివర్సిటీ పరిశోధకుడు వైపీ సుందరియల్ అన్నారు. విపత్తు తర్వాత రిషిగంగా పరివాహక ప్రాంతంలోని గ్రామస్థులకు సహాయం చేయడానికి వెళ్లినవారిలో ఆయన కూడా ఉన్నారు. ‘ప్రస్తుతం ఈశాన్య ప్రవాహం, రిషిగంగా కలిసే చోట ఉన్నాను.. ఈశాన్య ప్రవాహం నుంచి వరద ప్రారంభమయ్యింది.. కొండచరియలు విరిగిపడటంతో తాత్కాలికంగా ఆనకట్ట ఏర్పడి, రిషిగంగా నది ప్రవాహాన్ని అడ్డుకుంది’ అని పేర్కొన్నారు. ఈ సరస్సు ఏ క్షణమైనా తెగి, భారీ వరదలకు కారణమవుతుందని నిపుణులు హెచ్చరిస్తున్నారు.

LEAVE A REPLY

Please enter your comment!
Please enter your name here