saudi activist: జైళ్లో నీలి చిత్రాలు చూపించి పలుసార్లు అఘాయిత్యం: హక్కుల కార్యకర్త సంచనల వ్యాఖ్యలు! – forced to kiss interrogators in jail: saudi activist loujain narrates her horrifying ordeal

0
23


ప్రధానాంశాలు:

  • అమెరికా బెదిరింపులతో దిగివచ్చిన సౌదీ ఆరేబియా.
  • హక్కుల కార్యకర్త లౌజైన్ హత్లౌల్‌ మూడేళ్ల తర్వాత విడుదల
  • జైళ్లో నరకం చూపించారని ఆరోపించిన లౌజైన్.

సౌదీలో మహిళల హక్కుల కోసం పోరాడిన లౌజైన్ అల్ హత్లౌల్‌ను 2018 మేలో అక్కడి ప్రభుత్వం అరెస్ట్ చేసి జైలుకు తరలించింది. మూడేళ్ల తర్వాత ఆమెకు జైలు నుంచి విముక్తి లభించింది. మహిళల హక్కుల కోసం ఉద్యమించడమే ఆమె చేసిన నేరం. మహిళలకూ వాహనం నడిపే హక్కును కల్పించాలనే డిమాండ్‌తో ఆమె పోరాటం సాగించారు. మహిళలకు క్యాబ్ నడిపే అవకాశం కల్పించడానికి కొద్ది వారాల ముందే సౌదీ అరేబియా పోలీసులు ఆమెను అరెస్ట్ చేశారు.
దీంతో, లౌజైన్ విడుదల కోసం ఆమె కుటుంబ సభ్యులు సుదీర్ఘ పోరాటం సాగించారు. ఈ విషయాన్ని ప్రపంచం దృష్టికి తీసుకెళ్లడంతో అమెరికా సౌదీపై ఒత్తిడి పెంచింది.

మానవ హక్కులను కాలరాస్తున్నారంటూ ఆగ్రహం వ్యక్తం చేసింది. అంతర్జాతీయంగా ఆ దేశంపై ఒత్తిడి పెరగడంతో మూడేళ్ల తర్వాత బుధవారం ఆమెను సౌదీ ప్రభుత్వం జైలు నుంచి విడుదల చేసింది. ఈ విషయాన్ని ఆమె సోదరి లీనా అల్ హత్లౌల్ ట్విట్టర్ ద్వారా వెల్లడించారు. వెయ్యినొక్క రోజుల తర్వాత లౌజైన్ ఇంటికి చేరిందని తెలిపారు.

మానవ హక్కుల ఉల్లంఘన విషయంలో సౌదీ యువరాజు మహ్మద్ బిన్ సల్మాన్ పై మరింత కఠినంగా వ్యవహరిస్తామని గతంలోనే అమెరికా అధ్యక్షుడు జో బైడెన్ హెచ్చరించారు. తాజాగా ఆమెను విడుదల చేస్తూ తీసుకున్న నిర్ణయాన్ని స్వాగతించారు. మంచి పని చేశారని, అసలు ఆమెను జైలుకు పంపించి ఉండాల్సింది కాదంటూ అమెరికా విదేశాంగ శాఖ పేర్కొంది.

అయితే, జైళ్లో ఉన్నప్పుడు పలుసార్లు తనపై అత్యాచారం జరిగిందని, చాలా మంది లైంగికంగా వేధించారని లౌజైన్ ఆరోపించారు. బలవంతంగా పోలీసులు ముద్దుపెట్టుకున్నారని తెలిపారు. జైల్లో ఉన్న లౌజైన్ అల్ హత్లౌల్‌‌పై పలువురు అత్యాచారానికి పాల్పడ్డారని మానవ హక్కుల న్యాయవాది బరోనెస్ హెలేనా కెన్నడీ ఇటీవల ఓ లేఖ రాశారు. విచారణ సమయంలో లౌజైన్‌పై అఘాయిత్యానికి ఒడిగట్టారని తెలిపారు.

లౌజైన్‌కు అశ్లీల చిత్రాలు చూపించి అత్యాచారం చేశారని ఆరోపించారు. విచారణ సమయంలో పోలీసులు ఆమెను బలవంతంగా ముద్దు పెట్టుకుని, సీలింగ్‌కు వేలాడదీసి దారుణంగా కొట్టి, విద్యుత్ షాక్ కూడా ఇచ్చి హింసించారని కెన్నడీ పేర్కొన్నారు.

కాగా, సౌదీ రాజకీయ వ్యవస్థలో మార్పు, జాతీయ భద్రతకు విఘాతం కలిగిస్తున్నారనే ఆరోపణలను హత్లౌల్ ఎదుర్కొన్నారు. ఆమెపై తీవ్రవాద వ్యతిరేక చట్టం కింద కేసు నమోదయినట్టు సౌదీ మీడియా అప్పట్లో వెల్లడించింది. ఈ కేసులో దోషిగా నిర్దారించిన కోర్టు..ఆరేళ్ల జైలు శిక్ష విధించింది. దీనిపై అంతర్జాతీయంగా తీవ్ర విమర్శలు రావడంతో సౌదీ వెనక్కు తగ్గింది.

LEAVE A REPLY

Please enter your comment!
Please enter your name here