S-400 air defence system: అమెరికా ఆంక్షలు బేఖాతరు.. ఆ ఒప్పందం విషయంలో ముందుకు భారత్! – us curbs threat, but india works to induct russia s-400 air defence systems

0
40


రష్యా నుంచి అత్యాధునిక గగనతల రక్షణ వ్యవస్థ ఎస్-400 క్షిపణుల కొనుగోలు విషయంలో అమెరికా ఆంక్షల హెచ్చరికలను పక్కనబెట్టి ముందుకెళ్లాలని భారత్ నిర్ణయించుకుంది. ముందుగా చేసుకున్న ఒప్పందం ప్రకారం తొలి దశ ఆయుధాలను ఈ ఏడాది సెప్టెంబరు-అక్టోబరులో రష్యా అందజేయనుంది. ఇందుకోసం భారత వాయుసేనకు చెందిన బృందం ఈ నెల చివరి వారంలో రష్యాకు వెళ్లనుంది. అక్టోబరు 2018లో చేసుకున్న 5.43 బిలియన్ డాలర్లు (రూ.40వేల కోట్లు) విలువైన ఈ ఒప్పందంలో ఐదు ఎస్-400 గగనతల రక్షణ క్షిపణి వ్యవస్థలు భారత్‌కు చేరనున్నాయి. ఏప్రిల్ 2023 నాటికి పూర్తిగా ఈ వ్యవస్థలను రష్యా అందజేయనుంది.

‘380 కిలోమీటర్ల పరిధిలో శత్రు వ్యూహాత్మక బాంబర్లు, జెట్‌లు, గూఢచారి విమానాలు, క్షిపణులు, డ్రోన్‌లను గుర్తించి, నాశనం చేయగల అత్యంత ఆటోమేటెడ్ S-400 క్షిపణి వ్యవస్థలు పశ్చిమ, ఉత్తర, తూర్పు భాగంలో చైనా, పాకిస్థాన్ నుంచి పొంచి ఉన్న ముప్పును సమర్ధంగా ఎదుర్కొంటాయి’ అని రక్షణ శాఖ వర్గాలు తెలిపాయి.

మొత్తం 100 మంది అధికారులు, ఎయిర్‌మెన్స్‌తో కూడిన భారత బృందం జనవరి చివరి వారంలో రష్యాకు వెళ్లనుంది. ఎస్-400 వ్యవస్థ ఆపరేటింగ్, నిర్వహణలో వీరికి శిక్షణ ఇవ్వనున్నారు. ‘మొదటి బృందం శిక్షణ పూర్తిచేసుకున్న తర్వాత రెండో బృందాన్ని మరి కొద్ది నెలల తర్వాత పంపనున్నారు.. సెప్టెంబరు-అక్టోబరులో తొలి దశ ప్రక్రియ మొదలవుతుంది.. ఈ ఏడాది చివర లేదా 2022 తొలినాళ్లకు ఎస్-400 గగనతల క్షిపణి వ్యవస్థ దేశంలో అందుబాటులోకి రానుంది’ అని పేర్కొన్నాయి.

ఎస్-400 గగనతల క్షిపణి వ్యవస్థలోని 400, 120, 200, 250, 380కి.మీల పరిధిలో లక్ష్యాలను చేధించే క్షిపణులు, యుద్ధ-నిర్వహణ వ్యవస్థల్లో కమాండ్ పోస్టులు, లాంచర్లు, రాడార్లు, ఆల్-టెర్రైన్ ట్రాన్స్‌పోర్ట్ ఎరేక్టర్ వాహనాల చేరికతో భారత రక్షణ రంగ సామర్థ్యంలో విప్లవాత్మక మార్పులు చోటుచేసుకోనున్నాయి.

ప్రతి బ్యాటరీలో 128 క్షిపణులను కలిగి ఉండే ఎస్ -400 వ్యవస్థ.. శత్రువుల నుంచి వచ్చే వైమానిక ముప్పును పసిగట్టి, ఆటోమేటిక్‌గా స్పందిస్తుంది. 600 కిలోమీటర్ల పరిధిలోని శత్రువుల కదలికలను గుర్తించే దీనిలో రాడార్లు.. ఒకేసారి వందలాది లక్ష్యాలను ట్రాక్ చేయగలవు.. ఎస్ -400 సెకనుకు 4,800 మీటర్ల వేగంతో వచ్చే బాలిస్టిక్ క్షిపణులను అడ్డుకోగలదని, అలాగే అమెరికన్ ఎఫ్ -35 వంటి ఐదో తరం యుద్ధ విమానాలను రాడార్ లాక్ చేసి, కూల్చివేయగలదని రష్యా పేర్కొంది.

మరోవైపు, రష్యా నుంచి భారత్ ఆయుధాలను కొనుగోలు చేస్తే, ఆంక్షలు విధిస్తామని హెచ్చరించింది. భారత్ తన రక్షణ విధానాన్ని మార్చుకోవాలని, సంస్కరణలు తీసుకు రావాలని యూఎస్ కాంగ్రెస్ ఆధ్వర్యంలోని సీఆర్ఎస్ (కాంగ్రెషనల్ రీసెర్చ్ సర్వీస్) తాజా నివేదికలో సూచించింది. ఆధునిక సాంకేతికతను అందుకోవాలన్న ప్రయత్నాలు తగదని, రక్షణ రంగంలో విదేశీ ప్రత్యక్ష పెట్టుబడుల పరిధిని మరింత విస్తృతం చేసి, రక్షణ విధానాన్ని మార్చుకోవాలని పేర్కొంది.

LEAVE A REPLY

Please enter your comment!
Please enter your name here