rio horse: రియో.. వయసు 22.. 18 సార్లు గణతంత్ర ప్రదర్శలు.. దీని ప్రత్యేకతలే వేరు! – rio prized cavalry horse, make 18th republic day appearance

0
22


ప్రధానాంశాలు:

  • ఘనంగా భారత 72 వ గణతంత్ర వేడుకలు.
  • రిపబ్లిక్ డే వేడుకల్లో ప్రధాన ఆకర్షణగా కవల్రీ రెజిమెంట్.
  • కేవలం 22 ఏళ్ల వయసులోనే 18 సార్లు కవాతుల్లో పాల్గొన్న అశ్వం.

ప్రపంచంలోనే మనుగడలో ఉన్న ఏకైక అశ్వికదళం.. భారత సైన్యానికి చెందిన 61 కావల్రీ రెజిమెంట్. రిపబ్లిక్ డే వేడుకల్లో ఈ రెజిమెంట్‌కు చెందిన రియో అనే గుర్రం తన ప్రదర్శనలు, కవాతుతో దేశవ్యాప్తంగా గుర్తింపు పొందింది. గణతంత్ర కవాతుల్లో మొత్తం 18 సార్లు పాల్గొన్న ఈ గుర్రం వయసు 22 ఏళ్లే. అంతేకాదు, 12 అర్జున అవార్డులతో సహా ఎన్నో క్రీడాంశాల్లో బహుమతులు గెల్చుకుంది. రియోకు భారత గణతంత్ర వేడుకల్లో ప్రత్యేక స్థానం ఉంది. 72వ భారత్ గణతంత్ర వేడుకల్లో భాగంగా.. రియో అశ్విక దళాన్ని ముందుండి నడిపించనుంది.

హనోవేరియన్‌ జాతికి చెందిన ఈ గుర్రం భారత్‌లోనే పుట్టింది. నాలుగేళ్ల వయసు నుంచే రిపబ్లిక్‌ వేడుకల్లో పాల్గొంటోంది. కెప్టెన్‌ దీపాంశు షెరాన్‌ శిక్షణలో మరింత రాటుదేలిన రియో.. చాలా ప్రత్యేకమైన అశ్వం. ఇది తన పైఅధికారి చెప్పిన మాటలు, ఇచ్చిన ఆదేశాలను చక్కగా అవగాహన చేసుకుంటుంది. రియోకు శిక్షణనిస్తున్న దీపాంశు షెరాన్‌ (27) ఉత్తరాఖండ్‌లోని కాశీపుర్‌కు చెందిన వారు. ఈయన కుటుంబం నాలుగు తరాలుగా సైన్యంలో సేవలందజేయడం విశేషం. సంప్రదాయ రీతిలో యూనిఫాం ధరించి పాల్గోవటమే ఓ గొప్ప గౌరవం కాగా.. అదీ రియోను అధిరోహించడం మరీ ప్రత్యేకమని ఆయన అన్నారు.

‘నేను 2011 లో ఎన్డీఏ (నేషనల్ డిఫెన్స్ అకాడమీ), 2015లో ఐఎంఏ (ఇండియన్ మిలిటరీ అకాడమీ) లో చేరాను.. ఎన్‌డిఏ రోజుల్లోనే ఈక్వెస్ట్రియన్ నైపుణ్యాలను ఎంచుకున్నాను.. 2014లో అండర్ -25 టెంట్-పెగ్గింగ్ ఈవెంట్‌లో దేశానికి ప్రాతినిధ్యం వహించాను.. దక్షిణాఫ్రికా, భారత్, పాకిస్థాన్ నుంచి సైనికులు పాల్గొగా.. నేను ఉత్తమ రైడర్‌గా ఎంపికయ్యాను.. కాబట్టి గుర్రాలపై ఆసక్తి, అనుబంధం పెరిగింది’ అని దీపాంశు అన్నారు.

ఈ అశ్వాన్ని ప్రత్యేక శ్రద్ధతో చూసుకుంటామని దీపాంశు తెలిపారు. స్వారీ చేస్తున్న వ్యక్తి చెప్పిన ఆదేశాలను తూచా తప్పకుండా పాటించడం రియో ప్రత్యేకత. కవల్రీ రెజి‌మెంట్‌ను మైసూర్ లాన్సర్స్, జోధ్‌పూర్ లాన్సర్స్, గ్వాలియర్ లాన్సర్లతో సహా రాయల్ బ్రిటిషన్ ఆర్మీ ఆరు అశ్విక దళాల యూనిట్ల సమ్మేళనం తరువాత ఏర్పాటు చేసింది. ఈ రెజిమెంట్ 1918 నాటి బ్రిటన్-ఇజ్రాయేల్ మధ్య జరిగిన హఫియా యుద్ధంలో కీలక పాత్ర పోషించింది.

LEAVE A REPLY

Please enter your comment!
Please enter your name here