Rajinikanth: రాజకీయ పార్టీపై మరోసారి అభిమానులకు రజినీ స్పష్టత.. లేఖ రాసిన తలైవా – actor rajinikanth letter to fans and says will not reverse my decision

0
21


అనారోగ్య కారణాలతో రాజకీయ పార్టీ ఆలోచనను విరమించుకున్న తమిళ సూపర్‌స్టార్ రజినీ కాంత్.. తన నిర్ణయం విషయంలో మార్పు ఉండబోదని మరోసారి స్పష్టం చేశారు. ఈ మేరకు ఆయన తన అభిమానులకు సోమవారం లేఖ రాశారు. ‘నా నిర్ణయంలో మార్పు ఉండబోదు.. ప్రస్తుత పరిస్థితుల్లో రాజకీయాల్లోకి రాలేను.. దయచేసి నా నిర్ణయాన్ని గౌరవించండి.. రాజకీయ పార్టీని ప్రారంభించాలని కోరుతూ ఆందోళనలు నిర్వహించడం వంటి కార్యక్రమాలను అభిమానులు నిర్వహించవద్దు’ అని రజినీ తన లేఖలో పేర్కొన్నారు.

రజినీకాంత్ రాజకీయాల్లో రావాలంటూ అభిమానులు ఆదివారం ఓ ర్యాలీని నిర్వహించడంతో ఆయన స్పందించారు. చెన్నైలో దాదాపు రెండు వేల మందికిపైగా రజినీ అభిమానులు ఒకచోట చేరి ఆయన వచ్చే అసెంబ్లీ ఎన్నికల్లో పోటీ చేయాలని నినాదాలు చేశారు. అనారోగ్య కారణాల దృష్ట్యా ప్రత్యక్ష రాజకీయాల్లోకి వచ్చేందుకు విముఖత వ్యక్తం చేసిన రజినీ తన నిర్ణయాన్ని మార్చుకోవాలని డిమాండ్ చేశారు.

గంటపాటు నిరసన తెలపడానికి కేవలం 200 మందికి మాత్రమే చెన్నై పోలీసులు అనుమతినివ్వగా, దాదాపు 2వేల మందికి పైగా రజినీ అభిమానులు అక్కడికి చేరుకోవడం విశేషం. ‘వా తలైవా వా’, ‘ఇప్పో ఇల్లన ఎప్పొవమ్ ఇల్ల’ వంటి నినాదాలతో ఉదయం 10 గంటల నుంచి 12.30 గంటల వరకూ చెన్నై నగరం మారు మోగింది.

నిరసన తెలిపిన ప్రాంతమంతా రజినీ బ్యానర్లు, ప్లకార్డులతో నిండిపోయింది. ఇలాంటి నిరసనలకు దిగవద్దని, అభిమాన హీరో నిర్ణయాన్ని గౌరవించాలని రజినీ మక్కల్ మండ్రం అభిమానులకు విన్నవించినప్పటికీ ఫ్యాన్స్ ఈ నిరసన కార్యక్రమాన్ని తలపెట్టడం గమనార్హం.

ఓ దివ్యాంగుడు రజినీకాంత్ రాజకీయాల్లోకి రావాలని అభిమానులు తలపెట్టిన శాంతియుత నిరసనలో పాల్గొన్నాడు. ఆ దృశ్యం చూపరుల హృదయం ద్రవించేలా చేసింది. తలైవా మనసు మార్చుకుని రాజకీయాల్లోకి వచ్చి.. వచ్చే ఎన్నికల్లో పోటీ చేయాలని ఆ దివ్యాంగుడు కోరాడు.

LEAVE A REPLY

Please enter your comment!
Please enter your name here