Rahul Gandhi: సంక్షోభంలో పుదుచ్చేరి సర్కార్.. రాహుల్ గాంధీకి షాక్ – puducherry: congress government slips into minority as 4 mlas resign ahead of polls

0
33


పుదుచ్చేరిలో కాంగ్రెస్‌ ప్రభుత్వం సంక్షోభంలో పడింది. నలుగురు ఎమ్మెల్యేలు రాజీనామా చేశారు. కొన్ని రోజుల కిందట ఇద్దరు ఎమ్మెల్యేలు రాజీనామా చేసి బీజేపీలో చేరగా.. తాజాగా మరో ఇద్దరు ఎమ్మెల్యేలు రాజీనామా చేశారు. పుదుచ్చేరిలో అసెంబ్లీ ఎన్నికలు సమీపిస్తున్న వేళ ఈ వ్యవహారం కాంగ్రెస్ పార్టీని ఇరకాటంలో పడేసింది. పైగా.. ఆ పార్టీ అగ్రనేత రాహుల్ గాంధీ బుధవారం (ఫిబ్రవరి 17) పుదుచ్చేరి పర్యటనకు సిద్ధం చేసుకోగా.. ఒక్క రోజు ముందే ఈ పరిణామం చోటు చేసుకోవడం శోచనీయం.

ఏప్రిల్ – మేలో పుదుచ్చేరి అసెంబ్లీకి ఎన్నికలు జరుగనున్నాయి. ఎన్నికల్లో అనుసరించాల్సిన వ్యూహాల గురించి పార్టీ నేతలతో చర్చించేందుకు.. రాహుల్‌ గాంధీ పుదుచ్చేరికి రానున్నారు. ఈ లోపే ఎమ్మెల్యేలు ఝలక్ ఇచ్చారు. దీంతో అక్కడ రాజకీయాలు అనూహ్య మలుపులు తిరుగుతున్నాయి. నెల రోజుల వ్యవధిలో అధికార కాంగ్రెస్‌ పార్టీకి చెందిన నలుగురు ఎమ్మెల్యేలు రాజీనామా చేయడంతో పార్టీ బలం మెజారిటీ మార్కు దిగువకు చేరింది.

నమశివాయం, తీప్పయింజన్‌ అనే ఇద్దరు ఎమ్మెల్యేలు జనవరి 25న రాజీనామా చేశారు. వారిద్దరూ బీజేపీ తీర్థం పుచ్చుకున్నారు. కాగా, పుదుచ్చేరి ఆరోగ్య శాఖ మంత్రి మల్లాడి కృష్ణారావు సోమవారం రాజీనామా చేశారు. మంగళవారం జాన్ కుమార్ రాజీనామా చేశారు.

3 నామినేటెడ్ స్థానాలు మినహా పుదుచ్చేరి అసెంబ్లీకి 30 స్థానాలు ఉన్నాయి. 2016లో 30 స్థానాలకు ఎన్నికలు నిర్వహించగా.. కాంగ్రెస్‌ 15 స్థానాల్లో గెలిచింది. డీఎంకే చెందిన ముగ్గురు ఎమ్మెల్యేలు, మరో ఇండిపెండెంట్ ఎమ్మెల్యే మద్దతుతో నారాయణ స్వామి ప్రభుత్వం ఏర్పాటు చేశారు. ఇప్పుడు నలుగురు ఎమ్మెల్యేలు రాజీనామా చేయడంతో ఆ పార్టీ బలం 11కి చేరింది.

యానాం అసెంబ్లీ నియోజకవర్గానికి 25 ఏళ్లుగా వ్యవహరిస్తున్న మల్లాడి కృష్ణారావు రాజీనామా సంచలనంగా మారింది. కొద్ది రోజుల కిందటే ఆయన పుదుచ్చేరి ముఖ్యమంత్రి నారాయణ స్వామితో కలిసి ఢిల్లీ పర్యటనకు వెళ్లారు. పుదుచ్చేరి లెఫ్టినెంట్ గవర్నర్‌ కిరణ్ బేడీని తప్పించాలని కేంద్రాన్ని కోరారు. ఈలోపే ఆయన రాజీనామా చేయడం చర్చనీయాంశంగా మారింది.

LEAVE A REPLY

Please enter your comment!
Please enter your name here