Rahul Gandhi: కాంగ్రెస్ సీనియర్ నేత అంత్యక్రియలు.. పాడె మోసిన రాహుల్ గాంధీ – congress mp rahul gandhi among pallbearers for veteran satish sharma

0
21


ప్రధానాంశాలు:

  • గాంధీ కుటుంబానికి వీరే విధేయుడిగా గుర్తింపు.
  • అంత్యక్రియల్లో పాల్గొని పాడె మోసిన రాహుల్.
  • రాజీవ్ ప్రోత్సాహంతో రాజకీయాల్లోకి కెప్టెన్ సతీశ్ శర్మ.

కాంగ్రెస్ సీనియర్ నేత, కేంద్ర మాజీ మంత్రి కెప్టెన్ సతీశ్ శర్మ (73) అంత్యక్రియలు శుక్రవారం ఢిల్లీలో నిర్వహించారు. ఈ అంత్యక్రియల్లో పాల్గొన్న కాంగ్రెస్ ఎంపీ రాహుల్ గాంధీ.. సతీశ్ శర్మ పాడె మోసి ఆయనపై తన గౌరవాన్ని చాటుకున్నారు. గత కొంత కాలంగా కేన్సర్‌తో బాధపడుతున్న కేంద్ర మాజీ మంత్రి బుధవారం గోవాలో కన్నుమూసిన విషయం తెలిసిందే. ఆయన మృతికి పలువురు నేతలు సంతాపం తెలిపారు. కెప్టెన్ సతీశ్ శర్మ మృతిపట్ల సంతాపం వ్యక్తం చేసిన రాహుల్ గాంధీ.. ఆయన పార్దీవదేహానికి నివాళులర్పించారు. అనంతరం సతీశ్ శర్మ పాడె మోశారు.

గాంధీ కుటుంబానికి ముఖ్యంగా మాజీ ప్రధాని రాజీవ్ గాంధీకి అత్యంత సన్నిహితుడిగా పేరున్న సతీశ్ శర్మ 11 అక్టోబరు 1947లో సికింద్రాబాద్‌లో జన్మించారు. అమేథీ, రాయ్‌బరేలీ నుంచి మూడుసార్లు లోక్‌సభకు ఎన్నికయ్యారు. రాజ్యసభ సభ్యుడిగానూ పనిచేశారు. ఇక, 1993 నుంచి 1996 వరకు పీవీ నరసింహారావు కేబినెట్‌లో పెట్రోలియం, సహజవాయువుల శాఖ కేంద్రమంత్రిగా పనిచేశారు. సతీశ్‌శర్మకు భార్య, కుమారుడు, కుమార్తె ఉన్నారు.

రాజీవ్ ప్రోత్సాహంతో రాజకీయాల్లోకి వచ్చిన కెప్టెన్ సతీశ్ శర్మ 1986లో తొలిసారి రాజ్యసభ సభ్యుడిగా నియమితులయ్యారు. రాజీవ్ మరణానంతరం 1991లో అమేథీ నుంచి లోక్‌సభకు ఎన్నికయ్యారు. ఇండియన్ ఎయిర్ లైన్స్‌ పైలట్‌గా ఉన్న సమయంలోనే రాజీవ్ గాంధీతో స్నేహం ఏర్పడింది. సంజయ్ గాంధీ మరణానంతరం రాజీవ్ రాజకీయాల్లో అడుగు పెట్టినప్పటికీ కెప్టెన్ సతీష్ శర్మ మాత్రం పైలట్ ఉద్యోగంలో కొనసాగారు.

కెప్టెన్ సతీష్ శర్మతో కలిసి దిగిన ఫొటోను ప్రియాంక గాంధీ ట్విట్టర్‌లో షేర్ చేశారు, ఇందులో రాహుల్ గాంధీ, సోనియాలు కూడా ఉన్నారు. ‘కెప్టెన్ సతీష్ శర్మకు నివాళులు.. ఉదారహృదయం, స్నేహం, జీవితం చివరి వరకు విశ్వసనీయతకు పట్టంకట్టారు.. మిమ్మల్ని కోల్పోవడం బాధాకరం’ అన్నారు. రాహుల్ కూడా ట్విట్టర్‌లో స్పందిస్తూ.. ‘కెప్టెన్ సతీశ్ శర్మ మరణం చాలా విచారకరం.. ఆయన కుటుంబానికి నా ప్రగాఢ సానుభూతి తెలియజేస్తున్నా’ అని పేర్కొన్నారు.

LEAVE A REPLY

Please enter your comment!
Please enter your name here