palakkad murder: కేరళలో మదనపల్లె తరహా ఘటన.. అల్లాకోసం కుమారుడ్ని బలిచ్చిన కన్నతల్లి! – woman kills her 6-year-old son as sacrifice to god in palakkad in kerala

0
26


ప్రధానాంశాలు:

  • కేరళలో మూఢనమ్మకంతో కొడుకును బలిచ్చిన తల్లి.
  • మదనపల్లె తరహాలోనే గొంతుకోసి హత్య.
  • పోలీసులు వచ్చేవరకు ఇంట్లో భర్తకు తెలియని విషయం.

మూఢ భక్తితో కన్నబిడ్డలనే చేజేతులా చంపుకుంటున్న ఘటనలు ఇటీవల కాలంలో చోటుచేసుకుంటున్నాయి. విద్యావంతులు సైతం అంధ విశ్వాసంలో కూరుకుపోతున్నారు. ఇటీవల మదనపల్లెలో అలేఖ్య, దివ్య ఉదంతం కూడా ఈ కోవలోదే. తాజాగా, కేరళలో ఓ మహిళ తన ఆరేళ్ల కుమారుడ్ని దేవుడి పేరుతో బలితీసుకుంది. ఈ ఘటన పాలక్కడ్ జిల్లాలో చోటుచేసుకుంది. షహీదా అనే మహిళ తన ఆరేళ కొడుకుని దేవుడికి బలి ఇచ్చింది. పోలీసులు తెలిపిన వివరాల ప్రకారం.. షాహిదా మదరసా టీచర్‌గా పనిచేస్తుండగా ఆరేళ్ల తనయుడు ఆమిల్‌ను బాత్‌రూమ్‌లోకి తీసుకెళ్లి చంపేసింది.

ప్రస్తుతం గర్భంతో ఉన్న షహీదా తన కుమారుడ్ని ఆదివారం రాత్రి చంపి, తర్వాత పోలీసులకు సమాచారం ఇచ్చింది. ఇప్పటికే ముగ్గురు పిల్లలు ఉండగా.. షహీదా నాలుగోసారి గర్భం దాల్చింది. షహీదా భర్త మిగతా ఇద్దరి పిల్లలతో కలిసి వేరే గదిలో నిద్రిస్తుండగా.. ఆరేళ్ల కుమారుడు, ఆమె మరో గదిలో నిద్రిస్తున్నారు. కుమారుడ్ని భార్య చంపిన విషయం పోలీసులు వచ్చేవరకూ షహీదా భర్తకు తెలియలేదని పోలీస్ అధికారి తెలిపారు.

పాలక్కడ్ కంట్రోల్ రూమ్‌కు సోమవారం వేకువజామున 3 నుంచి 4 గంటల మధ్యలో 112 ఎమర్జెన్సీ నంబర్‌కు షహీదా ఫోన్ చేసింది. తన ఆరేళ్ల కొడుకును చంపేశానని, అల్లా కోసం త్యాగం చేశానని ఆమె చెప్పడంతో పోలీసులు షాక్‌కు గురయ్యారు. షాహిదా ఇంటికి వెళ్లగా.. బాత్రూమ్‌లో ఆమిల్‌ రక్తపు మడుగులో కనిపించాడు. పోలీసులు తన ఇంటికి రావడంతో మేలుకున్న భర్త సులేమాన్ జరిగిన ఘోరం తెలిసి కన్నీరుమున్నీరయ్యాడు.

సులేమాన్ గతంలో గల్ఫ్‌లో పనిచేసి కొన్నేళ్ల కిందట పాలక్కడ్‌కు వచ్చి ఆటో నడుపుకుంటున్నాడు. ఈ ఘటనపై కేసు నమోదుచేసిన పోలీసులు, విచారణ చేపట్టారు. షాహిదాపై సెక్షన్ 302 కింద కేసు నమోదు చేసి అదుపులోకి తీసుకున్నారు. ఆమె మానసిక స్థితిపై పోలీసులు అనుమానం వ్యక్తం చేస్తున్నారు. ఈ ఘటనలో షాహిదా చేతికి కూడా గాయమైనట్లు తెలిసింది. మదనపల్లెకు చెందిన ఉన్నత విద్యావంతులైన తల్లిదండ్రులు.. మూఢ నమ్మకంతో తమ కూతుళ్లిద్దర్నీ దారుణంగా హతమార్చిన ఘటన దేశవ్యాప్తంగా సంచలనం సృష్టించింది.

LEAVE A REPLY

Please enter your comment!
Please enter your name here