odisha school power bill: షాక్ ఇచ్చిన కరెంట్ బిల్లు.. ప్రభుత్వ స్కూల్‌కు రూ.6 కోట్లు బిల్లువేసిన అధికారులు! – govt school receives electricity bill of nearly rs 6 crore in cuttack in odisha

0
29


కరోనా వైరస్ కట్టడికి విధించిన లాక్‌డౌన్ సమయంలో వచ్చిన కరెంట్ బిల్లులు ప్రజలకు షాక్ ఇచ్చిన విషయం తెలిసిందే. పూరి గుడిసెలకు, సామాన్యుల ఇళ్లకు లక్షల్లో కరెంట్ బిల్లులు రావడంతో ప్రజలు లబోదిబోమన్నారు. అంతేకాదు, కరెంటు బిల్లు ఎక్కువ రావడంతో ఓ వ్యక్తి ఆత్మహత్య చేసుకున్న ఘటన మహారాష్ట్రలో జరిగింది. ఇదిలా ఉండగా… ఓ ప్రభుత్వ పాఠశాలకు వచ్చిన కరెంట్ బిల్లు చూసి హెడ్మాస్టర్ ఖంగుతిన్నారు. వేలు, లక్షలు కాదు ఏకంగా దాదాపు రూ.6 కోట్ల బిల్లు రావడంతో ఉపాధ్యాయులు షాక్‌కు గురయ్యారు. ఈ ఘటన ఒడిశాలోని కటక్ జిల్లాల్లో చోటుచేసుకుంది.

కటక్‌ జిల్లా కంటపాడ సమితి శిశువా పాఠశాలకు దాదాపు రూ.6 కోట్ల కరెంట్ బిల్లు వచ్చింది. పాఠశాల హెడ్మాస్టర్ కవితా రాణి సాహు తెలిపిన వివరాల ప్రకారం.. 2016లో స్కూల్‌కి విద్యుత్తు కనెక్షన్‌ ఇచ్చారు. అప్పటి నుంచి ఒక్కసారి కూడా బిల్లు రాకపోగా గతేడాది ఫిబ్రవరిలో తొలిసారి బిల్లు వచ్చింది. మొత్తం రూ.5,87,12,580 బిల్లు రాగా.. 2020 ఫిబ్రవరి 17లోగా దీనిని చెల్లించాలని, గడువులోగా చెల్లించకపోతే పెనాల్టీతో కలిపి రూ.5,92,82,212 చెల్లించాలని సూచించారు. ఈ బిల్లు చూసి ఉపాధ్యాయులు విస్తుపోయారు.

దీంతో స్థానిక విద్యుత్తు సరఫరా కార్యాలయ అధికారులకు ఫిర్యాదు చేశారు. సాంకేతిక సమస్య వల్ల తప్పుడు బిల్లు వచ్చిందని, సరి చేసి కొత్త బిల్లు పంపిస్తామని టాటా పవర్ సెంట్రల్ ఒడిశా డిస్ట్రిబ్యూషన్ లిమిటెడ్ అధికారులు చెప్పారు. ఇంతలోనే కరోనా కారణంగా లాక్‌డౌన్ విధించడంతో స్కూల్స్ మూతబడ్డాయి. తిరిగి పది నెలల తర్వాత ఇటీవల తెరుచుకోగా.. జనవరి 20న మళ్లీ రూ.6 కోట్లకుపైగా చెల్లించాలంటూ బిల్లు వచ్చింది. మీడియా ప్రతినిధులు విద్యుత్తు సరఫరా విభాగం అధికారులను ఈ విషయమై అడిగినా ఎవరూ స్పందించలేదు.

‘ఇది షాకింగ్‌కు గురిచేసింది.. కరోనా కారణంగా పాఠశాల పది నెలలు తెరవకపోయిన కరెంట్ బిల్లు ఆకాశన్నంటింది.. వినడానికే అతిశయోక్తిగా ఉంది.. ఇంత భారీ మొత్తాన్ని చెల్లించే మార్గాలు మా దగ్గరలేవు’ అని స్కూల్ కమిటీ ఫిర్యాదు చేసింది. స్కూల్ ప్రధానోపాధ్యాయురాలు కవితా రాణి మాట్లాడుతూ.. ఈ బిల్లుపై టీపీసీఓడీఎల్ అధికారులను కలిశామన్నారు. బిల్లు చెల్లించాలని, లేకపోతే విద్యుత్ సరఫరా నిలిపివేస్తామని చెప్పారన్నారు. సాంకేతిక లోపం వల్లే బిల్లు కోట్లలో వచ్చిందని, దానిని పరిశీలించిన తగిన చర్యలను తీసుకుంటామని గోపాల్‌పూర్ ఎస్డీఓ ఛాబిలా బెహ్రా అన్నారు.

LEAVE A REPLY

Please enter your comment!
Please enter your name here