noida boy kidnap: కిడ్నాప్ చేశారు.. ఎక్కడ దాచాలో అర్థంకాలేదు, దారుణం! – noida: not knowing where to keep 4 year old boy, kidnappers smother him to death

0
30


నాలుగేళ్ల ఓ బాలుడిని కిడ్నాప్ చేసి అతడి తల్లిదండ్రుల నుంచి భారీ మొత్తం డిమాండ్ చేద్దామనుకున్నారు. అనుకున్నదే తడవుగా బాలుణ్ని కిడ్నాప్ చేశారు. కానీ, అతడిని ఎక్కడ దాచాలో అర్థం కాలేదు. దీంతో దారుణంగా చంపేశారు. అనంతరం చెత్త కుప్పలో పడేసి వెళ్లిపోయారు. నోయిడా సమీపంలోని ఓ గ్రామంలో ఈ దారుణం చోటు చేసుకుంది.

గ్రేటర్ నోయిడా సమీపంలోని సూరజ్‌పూర్ గ్రామానికి చెందిన హృతిక్ (4).. ముగ్గురు అన్నదమ్ముల్లో చిన్నవాడు. ఇంట్లో అందరికంటే చిన్నవాడు కావడంతో తల్లిదండ్రులు అతడిని గారాబంగా పెంచుకుంటున్నారు. కానీ, ఇద్దరు యువకులు దురాలోచనతో ఆ బాలుడిని కిడ్నాప్ చేశారు. జనవరి 24న ఆ బాలుడు తన ఇంటి ముందు ఆడుకుంటుండగా.. బైక్‌పై వచ్చిన నిందితులు అతడికి బిస్కెట్స్ ఇప్పిస్తామని ఆశజూపి ఎత్తుకుపోయారు.

ఇంటి ముందు ఆడుకుంటున్న చిన్నారి కనిపించకుండాపోవడంతో తల్లిదండ్రులు ఆందోళనకు గురయ్యారు. గ్రామంలో ఇద్దరు యువకులు అనుమానాస్పదంగా కనిపించారనే విషయం తెలియడంతో వెంటనే పోలీసులను ఆశ్రయించారు. పోలీసులు దర్యాప్తు ప్రారంభించారు. సీసీటీవీ ఫుటేజీలను పరిశీలించి నిందితులను గుర్తించే ప్రయత్నం చేశారు.

హృతిక్‌ను అపహరించుకుపోయిన కిడ్నాపర్లు అతడిని ఎక్కడ ఉంచాలో అర్థం కాలేదు. బాలుడిని కిడ్నాప్ చేద్దామనుకున్నారు గానీ, ఆ తర్వాత ఎక్కడికి తీసుకెళ్లాలి అనే విషయంపై ఆలోచన చేయలేదు. ఇంతలో పోలీసులు తమ కోసం గాలిస్తున్నట్లు వారికి సమాచారం అందింది. పోలీసులు తామున్న లొకేషన్‌కు వస్తే.. బాలుడు తమను గుర్తిస్తే బయటపడటం కష్టమని భావించి దారుణ నిర్ణయం తీసుకున్నారు.

బాలుడి ముక్కు, నోరు మూసి ఊపిరాడకుండా చేసి హత్య చేశారు. అనంతరం సూరజ్‌పూర్ గ్రామ శివార్లలోని ఓ చెత్త కుప్పలో బాలుడి మృతదేహాన్ని పడేసి అక్కడ నుంచి పారిపోయారు. సీసీ టీవీ ద్వారా కిడ్నాపర్లను గుర్తించిన పోలీసులు వారిలో ఒక నిందితుడైన అనిల్‌ను అరెస్టు చేశారు. పోలీసుల విచారణలో అతడు నేరాన్ని అంగీకరించాడు. అతడిని వెంటబెట్టుకొని వెళ్లి హృతిక్ మృతదేహాన్ని స్వాధీనం చేసుకున్నారు.

కుళ్లిపోయిన స్థితిలో బాలుడి మృతదేహం లభించింది. చనిపోయే ముందు బాలుడు ఒక చేతిలో బిస్కెట్‌ను పట్టుకొని ఉన్నాడు. బాలుడిని ఆ స్థితిలో చూసి తల్లిదండ్రులు కన్నీరుమున్నీరవుతున్నారు. పోలీసులు సకాలంలో స్పందించకపోవడం వల్లే కిడ్నాపర్లు తమ కుమారుడి ప్రాణాలు తీశారని వారు ఆరోపించారు. మరో నిందితుడి కోసం పోలీసులు గాలిస్తున్నారు.

LEAVE A REPLY

Please enter your comment!
Please enter your name here