netaji letter: ఎగ్జిబిషన్‌లో ఉంచిన నేతాజీ లేఖ నకిలీది.. విక్టోరియా మెమోరియల్‌కు బోస్ మనవడు లేఖ – sugata bose accuses victoria memorial hall of changing credits at nirbhik subhas

0
22


పశ్చిమ్ బెంగాల్‌ అసెంబ్లీకి మరి కొద్ది రోజుల్లో ఎన్నికలు జరగనుండగా.. నేతాజీ సుభాష్ చంద్రబోస్ చుట్టూ రాజకీయం తిరుగుతోంది. నేతాజీ సుభాష్‌ చంద్రబోస్‌ 125వ జయంతి సందర్భంగా జనవరి 23న కోల్‌కతా విక్టోరియా మెమోరియల్‌ హాల్‌లో ఏర్పాటు చేసిన ఎగ్జిబిషన్‌లోని కొన్ని స్మారకాల వాస్తవికతను ఆయన మనుమడు సుగతా బోస్‌ ప్రశ్నించారు. నేతాజీ రీసెర్చి బ్యూరో (ఎన్‌ఆర్‌బీ) అధ్యక్షుడుగా ఉన్న ఆయన ఈమేరకు విక్టోరియా మెమోరియల్‌ క్యూరేటర్‌ జయంత సేన్‌గుప్తాకు లేఖ రాశారు.

ఇండియన్‌ సివిల్‌ సర్వీస్‌కు అప్పట్లో నేతాజీ రాజీనామా చేస్తూ రాసిన లేఖ విషయాన్ని సుగతా బోస్‌ ప్రస్తావించారు. ఈ లేఖకు సంబంధించిన కాపీని మ్యూజియమ్‌ నిర్వాహకులు ఎప్పుడూ ఎన్‌ఆర్‌బీని అడగలేదని పేర్కొన్నారు. ఈమేరకు ప్రదర్శనలో ఉంచిన ‘నకిలీ లేఖ కాపీ’ని తక్షణం తీసేయాలని ఆయన కోరారు. నాటి నేతాజీ రాజీనామా లేఖ ఫొటో కాపీ 50 ఏళ్లకుపైగా ఎన్‌ఆర్‌బీ వద్ద ఉన్నట్లు తెలిపారు.

‘ఈ లేఖ లేదా మరేదైనా మీకు మేం నేరుగా ఇవ్వలేదు.. దేశ ప్రధాని ప్రారంభించిన ఈ ప్రదర్శనలో నకిలీ స్మారకాన్ని ఉంచారు. ఇది ఎవరు తెచ్చారో విచారణ జరపండి’ అని సుగత బోస్‌ కోరారు. దీనితో పాటు మరికొన్ని ఫొటోలు కూడా నకిలివేనంటూ పేర్కొన్నారు. ఎగ్జిబిషన్‌ కోసం విక్టోరియా మెమోరియల్‌ ఎన్నడూ ఎన్‌ఆర్‌బీని సంప్రదించలేదని వ్యాఖ్యానించిన ఆయన.. ప్రదర్శన పట్ల కూడా అసంతృప్తిని వ్యక్తం చేశారు. ఒక గొప్ప నేతకు గౌరవం ఇచ్చే తీరు ఇది కాదని అన్నారు.

విక్టోరియా మెమోరియల్‌ కేంద్ర సాంస్కృతిక శాఖ పరిధిలోకి వస్తుంది. మరోవైపు, తాను రాసిన లేఖపై ఇంతవరకు విక్టోరియా మెమోరియల్‌ అధికారుల స్పందించలేదని సుగతా బోస్‌ ‘పీటీఐ’కి తెలిపారు. క్యూరేటర్, మెమోరియల్ సెక్రెటరీ జయంత సేన్‌గుప్తాకు పలుసార్లు ఫోన్ చేసినా సమాధానం ఇవ్వలేదని అన్నారు.

‘నా లేఖకు ప్రతిస్పందనగా ఈ రోజు ప్రదర్శనను మార్చారు. నేతాజీ స్వంత చేతిరాత ఖచ్చితంగా స్పష్టంగా ఉంది.. విస్తరించినట్లు ఉండే రాతను దూరం నుంచి కూడా సులభంగా చదవవచ్చు. నా తండ్రి ఎడిట్ చేసిన నేతాజీ ఏ పిక్చోరియల్ బయోగ్రఫీని 1979లో ఆనంద పబ్లిషర్స్ ప్రచురించారు. నిర్వాహకులు ఆ పుస్తకం నుంచి చాలా ఫోటోలు, పత్రాల కాపీలను తయారు చేసినట్లు స్పష్టమైంది. పుస్తకం కాపీరైట్ నేతాజీ రీసెర్చ్ బ్యూరో వద్ద ఉంది.. ఎందుకంటే చాలా ఫోటోలు ఎన్ఆర్బీ ఆర్కైవ్ నుంచి వచ్చాయి’ అని వ్యాఖ్యానించారు.

LEAVE A REPLY

Please enter your comment!
Please enter your name here