narendra singh tomar: Farmers Protest: కొలిక్కిరాని చర్చలు.. జనవరి 4న మరోసారి! – consensus on two issues, says centre after talks with farmers, again to meet on january 4

రైతులతో కేంద్ర మంత్రుల చర్చలు మరోసారి అసంతృప్తిగానే ముగిశాయి. జనవరి 4న మరోసారి భేటీ కావాలని నిర్ణయించారు. అయితే.. చర్చలు సుహృద్భావ వాతావరణంలో సాగాయని వ్యవసాయ మంత్రి నరేంద్ర సింగ్ తోమర్ పేర్కొన్నారు. రైతు సంఘాల ప్రతినిధులతో కేంద్ర మంత్రుల బృందం బుధవారం (డిసెంబర్ 30) ఢిల్లీలోని విజ్ఞాన్‌ భవన్‌లో ఆరో విడత చర్చలు జరిపింది. సుమారు 5 గంటల పాటు చర్చలు కొనసాగాయి.

రెండు అంశాలపై ఏకాభిప్రాయం కుదిరిందని వ్యవసాయ మంత్రి తోమర్ తెలిపారు. పర్యావరణ ఆర్డినెన్స్‌, విద్యుత్‌ రాయితీల విషయంలో రైతుల అభ్యంతరాలను పరిగణనలోకి తీసుకున్నట్టు చెప్పారు. వ్యవసాయ చట్టాల రద్దు, కనీస మద్దతు ధర అంశాల్లో మాత్రం ప్రతిష్టంభన వీడలేదు. ఈ నేపథ్యంలో జనవరి 4న మరోసారి సమావేశం కావాలని నిర్ణయించారు.

NDA: బీజేపీకి దూరమవుతున్న ఒక్కో పార్టీ..
ఢిల్లీలో చలిని దృష్టిలో పెట్టుకొని వృద్ధులు, మహిళలు, చిన్నారులను ఇంటికి పంపించి వేయాలని రైతు సంఘాల నేతలను కోరినట్టు మంత్రి నరేంద్ర సింగ్ తోమర్ తెలిపారు. చర్చల అనంతరం ఆయన మీడియాతో మాట్లాడారు. నాలుగు పాయింట్ల అజెండాపై చర్చలు జరిపామని.. రెండింటిపై ఏకాభిప్రాయం కుదిరిందని ఆయన వెల్లడించారు.

రైతు సంఘాలు మాత్రం 3 వ్యవసాయ చట్టాలను రద్దు చేయాలని గట్టిగా పట్టుబడుతున్నాయి. అయితే.. కనీస మద్దతు ధర కొనసాగుతుందని ప్రభుత్వం చెబుతోంది. ఇందుకోసం లిఖితపూర్వక హామీ ఇచ్చేందుకు ప్రభుత్వం సిద్ధంగా ఉన్నట్టు మంత్రి తెలిపారు. రైతు సంఘాల నేతలు మాత్రం ఎంఎస్‌పీని చట్టంలో చేర్చాలని పట్టుబడుతున్నారు. మద్దతు ధర విషయంలో రైతుల డిమాండ్ల పరిశీలనకు కేంద్ర ప్రభుత్వం ఒక కమిటీని ఏర్పాటు చేసే యోచనలో ఉన్నట్టు తెలుస్తోంది.

Also Read:వారం పాటు రోడ్లు ఊడ్వండి.. పోలీస్ అధికారికి కోర్టు షాక్!