Naandhi Movie Review, Rating {3/5} – నాంది సినిమా రివ్యూ, రేటింగ్ {3/5}

0
30


‘వందమంది దోషులు తప్పించుకున్నా పర్వాలేదు.. ఒక్క నిర్దోషికి కూడా శిక్ష పడకూడదు’ అని చెప్పిన మన న్యాయ వ్యవస్థే.. ఆ న్యాయం చేయడం ఆలస్యం చేస్తే అన్యాయం చేసినట్టే అని కూడా చెప్తుంది. ఇలా చేయని నేరానికి శిక్ష అనుభవించిన ఓ నిర్ధోషి కథే ‘నాంది’.

కామెడీ హీరోగా పేరుతెచ్చుకున్న అల్లరి నరేష్ తనలో అద్భుత నటుడు ఉన్నాడని ‘గమ్యం’, ‘నేను’, ‘శంభో శివ శంభో’, ‘ప్రాణం’, ‘మహర్షి’ వంటి చిత్రాల ద్వారా నిరూపించుకున్నారు. అయితే సోలో హీరోగా మాత్రం అల్లరి నరేష్‌కి సీరియస్ కథ పడలేదు. ఉంటే కామెడీ సినిమాలైనా ఉన్నాయి.. లేదంటే కథలో కామెడీ అన్నట్టుగానే ఉన్నాయి. కానీ ‘నాంది’ చిత్రంతో తొలిసారి పూర్తిస్థాయి సీరియస్ కథతో ప్రేక్షకుల ముందుకు వచ్చాడు అల్లరి నరేష్.

చ‌ట్టాలు చేత‌కానివాడిపై వాడటానికేనా.. ప‌వ‌ర్‌లో ఉన్నోన్ని ఏం పీక‌లేవా.. చేయని నేరానికి శిక్ష అనుభవిస్తున్నఓ ఖైదీ.. సెక్షన్ 211 ఉపయోగించి అసలు నేరస్థుల ఆట ఎలా కట్టించవచ్చో.. నాంది చిత్రంలో చూపించాడు దర్శకుడు విజయ్‌ కనకమేడల.

బండి సూర్య ప్రకాష్ (అల్లరి నరేష్) మధ్య తరగతి సాఫ్ట్ వేర్ ఉద్యోగి. తొలిచూపులోనే మీనాక్షి (నవామి గాయక్) ప్రేమలో పడ్డ సూర్య ప్రకాష్ పెద్దల అంగీకారంతో ఆమెను పెళ్లి చేసుకుని.. అమ్మ, నాన్న, భార్యతో అందమైన జీవితాన్ని గడుపుతూ ఉంటాడు. అయితే అనూహ్యంగా సూర్య ప్రకాష్‌ని లాయర్ రాజ్ గోపాల్ (సీవీఎల్ నరసింహారావు) సహాయంతో మర్డర్ కేసులో ఇరికించి జైలుకి పంపుతాడు సీఐ కిషోర్ (హరీష్ ఉత్తమన్). ఐదు సంవత్సరాలు జైల్లో మగ్గుతూ.. చేయని నేరానికి శిక్ష అనుభవిస్తూ.. తల్లిదండ్రులతో పాటు కట్టుకున్న భార్యను కోల్పోతాడు సూర్య ప్రకాష్.

కోర్టులో సాక్ష్యాలు, ఆధారాలు సూర్య ప్రకాష్‌కి వ్యతిరేకంగానే ఉండటంతో ఏం చేయలేని నిస్సహాయ స్థితిలో ఉండిపోతాడు. ఆ తరుణంలో జూనియర్ లాయర్ ఆద్య (వరలక్ష్మీ శరత్‌కుమార్).. సూర్య ప్రకాష్‌ని బెయిల్‌పై బయటకు తీసుకుని వస్తుంది. ఆద్యకి ఈ మర్డర్ కేసుకు సంబంధం ఏంటి? సీఐ కిషోర్.. సూర్య ప్రకాష్‌ని ఈ కేసులో ఎందుకు ఇరికిస్తాడు..? ఈ కేసుకి హోమ్ మినిస్టర్ నాగేంద్ర (వినయ్ వర్మ)కి సంబంధం ఏంటి? సెక్షన్ 211‌తో సూర్య ప్రకాష్ నిర్దోషిగా ఎలా బయటపడ్డాడు? అన్నదే నాంది మిగిలిన కథ.

తొలి సీన్‌లోనే పోలీస్ స్టేషన్‌లో నగ్నంగా పోలీస్‌ల ముందు చేతులు కట్టుకుని కింద కూర్చున్న అల్లరి నరేష్.. ఈ సినిమా కోసం హీరోయిజాన్ని పూర్తిగా పక్కనపెట్టేశాడని స్పష్ఠంగా తెలియజెప్పాడు. చేయని నేరానికి శిక్ష అనుభవించడం.. తిరిగి అసలు నేరస్థులపై ప్రతీకారం తీర్చుకోవడం అనేది పాత కథే. అయితే ఈ కథలో సెక్షన్ 211 అనే కొత్త పాయింట్‌ని మిళితం చేసి న్యాయ వ్యవస్థలోని లోపాలను ఎత్తి చూపించారు.

రివేంజ్ కథల్లోనూ హీరోయిజం ఉంటుంది.. విలన్లతో తన్నులు తినడమే కాదు.. వాళ్లని పరుగులు పెట్టించి తన్నే సీన్లు కూడా ఉంటాయి. అలాంటి కథలకు ఇది భిన్నం. ఇందులో బీభత్సమైన రక్తపాతం ఉంటుంది కానీ.. ఆ రక్తపాతం అంతా విలన్ల చేతులో తన్నులు తినే హీరో శరీరం నుంచి వచ్చిందే. కథలో సోల్ మిస్ కాకుండా హీరోయిజానికి దూరంగా కేవలం ఓ నిర్ధోషి మనోవేదనను పెయిన్‌ఫుల్‌గా చూపించాడు దర్శకుడు విజయ్‌ కనకమేడల.

సూర్య ప్రకాష్ పాత్రలో అల్లరి నరేష్ జీవించేశాడు. ఈ చిత్రం ద్వారా కెరియర్‌లోనే బెస్ట్ పెర్ఫామెన్స్ ఇచ్చాడు. భావోద్వేగ సన్నివేశాల్లో కళ్లు చెమ్మగిల్లేట్టు చేశాడు. ఫస్ట్ సీన్‌లో బట్టల్లేకుండా నటించి.. నటనలో రాటుతేలినట్టుగానే కనిపించాడు. పేరెంట్స్ చనిపోయిన సీన్.. కోర్టు సీన్‌లు నరేష్‌ని నటుడిగా మరో మెట్టు ఎక్కించేట్టుగా ఉన్నాయి. ప్రతి ఫ్రేమ్‌లోనూ ఎమోషన్స్‌ని పండించాడు అల్లరి నరేష్.

నవ్వించే అల్లరోడే కాదు.. ఏడిపించే నటనకు ‘నాంది’ ఈ సినిమా అనేట్టుగా చేశాడు. పాత్ర కోసం ప్రాణం పెట్టేందుకైనా రెడీ అన్నట్టుగా ఆ పాత్రలో ఇమిడిపోయాడు అల్లరి నరేష్. కథలో హీరో అంటే కాస్తయినా హీరోయిజం ఉండాలనే కమర్షియల్ ఫార్ములా నుంచి బయటకు వచ్చి.. పాత్రలో పర్ఫెక్షన్‌ని మాత్రమే చూపించాడు నరేష్. పోలీసులు, విలన్ల చేతిలో తన్నులుతినే సీన్లలో అయ్యో పాపం.. వాళ్లని తిరిగి కొడితే బావుండే అనేట్టుగా ఆడియన్స్‌‌ని తన నటనతో కదిలించాడు.

ఇక వరలక్ష్మీ శరత్ కుమార్ పోషించిన లాయర్ ఆద్య పాత్ర ఎంట్రీతో కథ వేగం పుంజుకుంటుంది. ఫస్టాఫ్ సో.. సోగా నడుస్తున్న తరుణంలో ఆద్య ఎంట్రీ కథకి వేగాన్నిచ్చింది. కేవలం లాయర్‌గానే కాకుండా జరిగిన క్రైమ్‌లో ఆమె పాత్ర నేపథ్యం కూడా ఆసక్తికరంగా అనిపిస్తుంది. కోర్టు సీన్లతో వరలక్ష్మీ శరత్ కుమార్ సీనియర్ అడ్వకేట్‌లను సైతం ముప్పుతిప్పలు పెట్టే సీన్లు కథకు బలాన్ని ఇచ్చాయి.

హీరోయిన్ పాత్రకు ఇందులో పెద్ద ప్రాధాన్యత లేదు. నవామి గాయక్ .. మీనాక్షి పాత్రలో పర్వాలేదనిపించింది. హీరో హీరోయిన్ల మధ్య రొమాన్స్, లవ్ సీన్స్ లాంటి రొటీన్ కమర్షియల్ అంశాలకు దూరంగా ఈ కథ ఉండటంతో ఉన్నంతలో బాగానే చేసిందామె. అయితే హీరో కష్టాల్లో ఉన్నాడని తెలిసి.. అతన్ని వదిలి వేరే వ్యక్తిని పెళ్లి చేసుకోవడం కథానాయిక పాత్ర ప్రాధాన్యతని తగ్గించింది.

ఇక పోలీస్ ఇన్వెస్టిగేషన్ ఆఫీసర్‌గా హరీష్ ఉత్తమన్ నెగిటివ్ షేడ్స్ ఉన్న పాత్రలో ఆకట్టుకున్నాడు. ఈ సీరియస్ కథలో కమెడియన్ ప్రియదర్శి, ప్రవీణ్ పంచ్‌లు బాగా పేలాయి. కామెడీ కోసమే అన్నట్టుగా కాకుండా కథలో వారిని ఇన్వాల్ చేసిన తీరు అభినందనీయం. ఇక హోం మంత్రిగా వినయ్ వర్మ, లాయర్‌గా శ్రీకాంత్ అయ్యంగార్ ఆకట్టుకున్నారు. నరేష్ తండ్రిగా చేసిన దేవీప్రసాద్‌కి మంచి రోల్ పడింది. ఆ పాత్రకు పూర్తి న్యాయం చేశాడు. అయితే నరేష్ కాంబినేషన్ సీన్లు నాటకీయంగా అనిపిస్తాయి. కొడుకు చదువు కోసం తండ్రి మందు, సిగరెట్ మానేయడం.. తల్లి పౌడర్ రాసుకోవడం మానేయడం లాంటివి కాస్త అతిగానే అనిపిస్తాయి.

ఇక శ్రీచరణ్ పాకాల మ్యూజిక్ ఈ సినిమాకి ప్లస్ అయ్యింది. చోటా కె ప్రసాద్ ఎడిటింగ్, సిధ్ సినిమాటోగ్రఫీ అన్నీ బాగానే కుదిరాయి. సతీష్ వేగేశ్న నిర్మాతగా సినిమాకి మంచి ప్రొడక్షన్ వ్యాల్యూస్ అందించారు.

మొత్తంగా ‘నాంది’ సినిమా ఓ మంచి సందేశాత్మక చిత్రం. చట్టాలపై అవగాహన కల్పించే చిన్న ప్రయత్నం. హీరో నరేష్ నటన అద్భుతం. అయితే హీరోయిజం కోసం సినిమాలు చూసే వాళ్లకి ఈ సినిమా అంతగా ఎక్కదు. ఇందులో హీరో పడిపోవడమే తప్ప పరిగెట్టించే హంగామాలు ఉండవు. ప్రతి గెలుపుకి ఓ పోరాటం ఉంటుంది.. ప్రతి పోరాటానికి ఓ ముందడుగు ఉంటుంది.. అది అల్లరి నరేష్ విజయానికి ‘నాంది’ అనే చెప్పాలి.

LEAVE A REPLY

Please enter your comment!
Please enter your name here