mo dhaliwal: గ్రెటా థన్‌బర్గ్ షేర్ చేసిన టూల్‌కిట్ వెనుక ఖలిస్థాన్ వేర్పాటువాది ధలీవాల్! – man behind greta thunberg toolkit’ a self-confessed khalistani, mo dhaliwal

0
21


ప్రధానాంశాలు:

  • మలుపు తిరుగుతున్న గ్రెటా టూల్‌కిట్ వ్యవహారం.
  • ఖలిస్థాన్ వేర్పాటువాద శక్తుల హస్తంపై అనుమానాలు.
  • బయటపడ్డ భారతీయ కెనడియన్ మో ధలీవాల్ పాత్ర.

సాగు చట్టాలకు వ్యతిరేకంగా ఢిల్లీ సరిహద్దుల్లో అన్నదాతల ఆందోళనలు కొనసాగుతున్నాయి. రైతుల నిరసనలపై అంతర్జాతీయంగానూ తీవ్ర చర్చ జరుగుతోంది. పలువురు అంతర్జాతీయ సెలబ్రిటీలు ఈ నిరసనలకు మద్దతు తెలిపిన విషయం తెలిసిందే. పాప్ గాయని రిహన్నా, పర్యావరణ ఉద్యమకారిణి స్వీడన్‌ బాలిక గ్రెటా థన్‌బర్గ్ చేసిన ట్వీట్లపై దుమారం రేగుతోంది. రైతుల ఆందోళనకు ఎలా మద్దతు తెలిపాలో తెలియజేసే టూల్‌కిట్‌ను గ్రెటా ట్విట్టర్‌లో షేర్ చేసింది. కానీ, ఈ టూల్‌కిట్ ఖలిస్థాన్‌ వేర్పాటువాద సంస్థది కావడంతో ఢిల్లీ పోలీసులు కేసు నమోదు చేశారు.

దీనిపై పోలీసుల దర్యాప్తులో ఆసక్తికర విషయాలు వెలుగులోకి వచ్చాయి. టూల్‌కిట్ వెనుక కెనడాలో పుట్టిపెరిగిన ఖలిస్థానీ అని చెప్పుకొనే మో ధలివాల్ ఉన్నట్టు తేలింది. ప్రస్తుతం అతడిపై దృష్టి సారించిన పోలీసులు.. జనవరి 26న నిర్వహించిన కిసాన్ ర్యాలీ సమయంలోనూ అతడు రెచ్చగొట్టే వ్యాఖ్యలు చేసినట్టు గుర్తించారు. కెనడాలోని వాంకోవర్‌లో భారత దౌత్యకార్యాలయం ముందు జరిగిన నిరసనల్లో పాల్గొన్న ధలివాల్.. ఖలిస్థాన్ ఉద్యమం నుంచి తమను వేరు చేయలేరని వ్యాఖ్యానించాడు.

‘ఇప్పటికిప్పుడు భారత ప్రభుత్వం సాగు చట్టాలను రద్దు చేసినా మనం విజయం సాధించినట్టు కాదు. ఆ పోరాటం అక్కడితో ముగియదు.. అసలైన పోరు వ్యవసాయ చట్టాల రద్దు నుంచే మొదలవుతుంది.. పోరు ముగిసిందని ఎవరు చెప్పినా వినొద్దు.. మనలోని శక్తిని హరించడానికే చాలా మంది అలాంటి మాటలే చెబుతారు. పంజాబ్ వేరు.. ఖలిస్థాన్ వేరు అని మాయమాటలు చెప్పడానికి ప్రయత్నిస్తారు. కానీ, మీరంతా వేరు కాదు.. ఒక్కటే’ అంటూ వ్యాఖ్యానించాడు.

ఢిల్లీ పోలీసుల నిఘా ఉంచిన పొయెటిక్ జస్టిస్ ఫౌండేషన్‌తో అతడికి సంబంధాలున్నాయని అధికారులు అంటున్నారు. గ్రెటా థన్‌బర్గ్ షేర్ చేసిన టూల్‌కిట్ ఆ సంస్థ తయారు చేసిందేనని పేర్కొన్నారు. అనితా లాల్ అనే తన స్నేహితురాలు ఈ ఫౌండేషన్‌ను స్థాపించినట్టు ఫేస్‌బుక్ పోస్టులో తెలిపిన ధలివాల్.. గతేడాది సెప్టెంబర్ 17న కూడా ఖలిస్థాన్‌కు సంబంధించి ఓ పోస్ట్ పెట్టాడు. వాంకోవర్‌లో డిజిటల్ బ్రాండింగ్ ఏజెన్సీ స్కైరాకెట్ సంస్థ సహ-వ్యవస్థాపకుడిగా, స్ట్రాటజిస్ట్‌గానూ ధలివాల్ ఉన్నారు.

‘నేను ఖలిస్థానీని. మీలో చాలా మందికి దీని గురించి తెలిసి ఉండకపోవచ్చు. ఎందుకు? ఖలిస్థాన్ అంటే ఓ సిద్ధాంతం. ఖలిస్థాన్ అంటే జీవం ఉన్న బతుకు పోరాటం. బానిసత్వంలో మగ్గి బతికే కన్నా చావు మేలు అని అర్థం చేసుకున్నప్పుడే బానిస బతుకుల నుంచి విముక్తి కలుగుతుంది’ అంటూ రాసుకొచ్చాడు.

పంజాబ్ బర్నాలా జిల్లాలోని థిక్రివాల్ గ్రామానికి చెందిన ఎన్డీపీ సభ్యుడు జగ్మీత్ సింగ్ ధలివాల్ తో దిగిన ఫొటోనూ అతడు పోస్ట్ చేశాడు. అయితే, తమకు జగ్మీత్ గురించి తెలిసినా.. మో గురించి మాత్రం తెలియదని గ్రామస్థులు తేల్చి చెప్పారు. అతడితో తమకు ఏ సంబంధమూ లేదని ఇటు రైతు సంఘాల నేతలూ ప్రకటించారు.

వ్యవస్థాపక నైపుణ్యాల కోసం, వాంకోవర్ ఇంటర్నేషనల్ భాంగ్రా సెలబ్రేషన్ సొసైటీని ప్రారంభం కోసం కెనడా-సిక్కు, పంజాబీ వర్గాలలో గుర్తింపు పొందిన ధలీవాల్.. గతంలో రాజకీయ అభిప్రాయాలు, ఖలీస్థాన్ మద్దతుగా ఎటువంటి ప్రకటన చేయలేదు. ఆపరేషన్ బ్లూ స్టార్ వార్షికోత్సవంతో సమానంగా ఈ సొసైటీ 2015 జూన్ మొదటి వారంలో భాంగ్రా ఉత్సవాలను నిర్వహించడం వెనుక అతడి రాజకీయ అవగాహనపై అంచనాకు రావచ్చని అంటున్నారు.

LEAVE A REPLY

Please enter your comment!
Please enter your name here