MK Stalin: స్టాలిన్ ఎప్పటికీ సీఎం కాలేడు.. సోదరుడు సంచలన వ్యాఖ్యలు – dmk leader mk stalin can never become chief minister says expelled leader on brother

0
23


మరో నాలుగు నెలల్లో జరగబోయే తమిళనాడు శాసనసభ ఎన్నికలకు అన్ని పార్టీలు సమాయత్తమవుతున్నాయి. ప్రధాన ప్రతిపక్షం డీఎంకే ఇప్పటికే ప్రచారాన్ని ప్రారంభించింది. ఈ నేపథ్యంలో డీఎంకే బహిష్కృత నేత, స్టాలిన్ సోదరుడు అళగిరి సంచలన వ్యాఖ్యలు చేశారు. స్టాలిన్ ఎప్పటికీ ముఖ్యమంత్రి కాలేరని వ్యాఖ్యానించారు. మదురైలో తన మద్దతుదారులు, అనుచరులతో ఆదివారం సమావేశమైన అళగిరి.. భవిష్యత్తు కార్యాచరణపై త్వరలోనే ప్రకటన చేస్తానని తెలిపారు. తాను ఎటువంటి నిర్ణయం తీసుకున్నా, దానికి సిద్ధంగా ఉండాలని మద్దతుదారులకు పిలుపునిచ్చారు.

‘ఒకప్పుడు కరుణానిధి తర్వాత సర్వస్వం తానే అన్న స్టాలిన్ పార్టీ నుంచి ఎందుకు బహిష్కరించారో అర్ధం కావడంలేదు.. నేను ఇప్పుడు చెబుతున్నా స్టాలిన్ ఎప్పటికీ సీఎం కాలేడు.. నా మద్దతుదారులు అది జరగనివ్వరు’ అని వ్యాఖ్యానించారు.

పార్టీ వ్యతిరేక కార్యకలాపాలకు పాల్పడుతున్నారనే ఆరోపణలతో అళగిరిని డీఎంకే నుంచి బహిష్కరించిన విషయం తెలిసిందే. అయితే, అన్నదమ్ముల మధ్య రాజకీయ ఆధిపత్య పోరులో భాగంగానే అళగిరిని బహిష్కరించారు. ఇదిలా ఉండగా.. అళగిరి బీజేపీలో చేరుతున్నారనే ప్రచారం జోరుగా సాగుతోంది. ఇందులో భాగంగానే సోదరుడు స్టాలిన్‌పై విమర్శలు గుప్పిస్తున్నారు.

‘త్వరలోనే భవిష్యత్తు కార్యాచరణ ప్రకటిస్తాను.. నేను ఏ నిర్ణయం తీసుకున్నా మద్దతుదారులు అంగీకరించడానికి సిద్ధంగా ఉండాలి’ అని మదురైలో జరిగిన సమావేశంలో స్పష్టం చేశారు. తాను ఎప్పుడూ పదవుల కోసం పాకులాడలేదని, తండ్రి, దివంగత డీఎంకే చీఫ్ కరుణానిధి బలవంతంతోనే బాధ్యతలు నిర్వహించానని అన్నారు. కేంద్రంలో మంత్రిగా పనిచేసిన అళగిరి.. దక్షిణ తమిళనాడు డీఎంకే సెక్రెటరీగా బాధ్యతలు నిర్వర్తించారు.

తన నాయకత్వంలోనే 2009 తిరుమంగళం ఉప-ఎన్నికల్లో డీఎంకే విజయం సాధించిన విషయాన్ని గుర్తుచేసుకున్నారు. పార్టీ అధికారంలో ఉన్నప్పుడు జరిగిన ఈ ఉప-ఎన్నికల్లో డీఎంకే అభ్యర్థి 40వేల ఓట్లతో విజయం సాధించారు. అయితే, ఆ ఎన్నికల్లో మీడియా, కొంత మంది వ్యక్తుల ద్వారా ఓటర్లకు డీఎంకే డబ్బు పంపిణీ చేసినట్టు ఆరోపణలు వెల్లువెత్తాయి.. కానీ, అళగిరి మాత్రం డీఎంకే విజయానికి హార్డ్‌వర్క్ కారణమని పేర్కొన్నారు.

LEAVE A REPLY

Please enter your comment!
Please enter your name here