Master Movie Review Rating {2.5/5} – ‘మాస్టర్’ మూవీ రివ్యూ {2.5/5}

0
15


అదేంటో ఒక్కో ‘మాస్టర్’ పాఠం చెప్పాలే కానీ.. మైండ్‌కి ఇట్టే ఎక్కేస్తుంటుంది. కొంతమంది మాస్టర్లు ఎంత చింపుకుని చెప్పినా ఎక్కదు. చెప్పే విధానంలో తేడా ఉంటే రిసీవింగ్‌లో లెక్క తప్పుతుంటుంది. ‘మాస్టర్’ సినిమా విషయంలో కూడా ఇదే జరిగింది.

దళపతి విజయ్ హీరోగా విజయ్ సేతుపతి విలన్‌గా లోకేష్ కనకరాజ్ దర్శకత్వంలో రూపొందిన చిత్రం ‘మాస్టర్’. ఎక్స్‌బీ ఫిల్మ్‌ క్రియేటర్స్‌ బ్యానర్‌పై గ్జేవియర్‌ బ్రిట్టో నిర్మించారు. గతేడాది ఏప్రిల్‌లో విడుదల కావాల్సిన చిత్రమిది. లాక్‌డౌన్ కారణంగా థియేటర్లు మూతబడటంతో ఆగిపోయింది. మొత్తం మీద భారీ అంచనాల నడుమ సంక్రాంతి కానుకగా జనవరి 13న విడుదలైంది. తమిళంతో పాటు తెలుగు, కన్నడ, హిందీ భాషల్లో ఈ చిత్రం ప్రపంచ వ్యాప్తంగా భారీ ఎత్తున విడుదలైంది. మరి పాఠాలు చెప్పే ఈ ‘మాస్టర్’‌‌కి పాస్ మార్కులు పడ్డాయో లేదో రివ్యూలో చూద్దాం..

భవానీ (విజయ్ సేతుపతి) 17 ఏళ్ల వయసులో ఉండగా.. అతని కళ్ల ముందే లారీ యూనియన్ లీడర్‌గా ఉన్న తన తండ్రిని, తల్లిని దారుణంగా సజీవదహనం చేస్తారు ప్రతికూల వర్గానికి చెందిన ముగ్గురు యూనియన్ నాయకులు. భవానీని ప్రాణాలతో వదిలేయాలంటే వాళ్ల తల్లిదండ్రులు మంటల్లో కాలి చనిపోయారని భవానీతోనే సాక్ష్యం చెప్పించి.. అతన్ని మరొక నేరంపై బాల నేరస్తుల హోమ్‌కి పంపిస్తారు. అయితే అక్కడ భవానీని తమ డబ్బు, పలుకుబడి ఉపయోగించి చిత్ర హింసలు పెట్టించి అతన్ని నరరూప రాక్షసుడిగా మారుస్తారు ఆ ముగ్గురు విలన్లు. అక్కడ నుంచి తప్పించుకున్న భవానీ.. జైలులోనే తన నేర సామ్రాజ్యాన్ని నిర్మించుకుంటాడు. చిన్న చిన్న నేరాలు చేసి బాలనేరస్తుల కేంద్రానికి వస్తున్న చిన్నారుల్ని క్రూరమైన నేరస్తులగా మార్చి వాళ్లని మత్తుకు బానిసల్ని చేస్తూ వాళ్ళతో క్రిమినల్ చర్యలకు పాల్పడుతుంటాడు. తనకు అడ్డుగా ఉన్న ముగ్గురు విలన్ల అడ్డుతొలగించుకుని.. లారీ యూనియన్ ప్రెసిడెంట్‌గా గెలిచి.. పాలిటిక్స్‌లోకి వెళ్లాలని భవానీ ప్రయత్నిస్తుంటాడు. ఈ తరుణంలో అతని ఆట కట్టించడానికి రంగంలోకి దిగుతాడు మాస్టర్ జేడీ (విజయ్).

కళాశాలలో పర్శనాలిటీ డెవలప్‌మెంట్ ప్రొఫెసర్ అయిన జేడీ (విజయ్)‌‌‌కి యాజమాన్యంతో విభేదాలు ఉన్నప్పటికీ స్టూడెంట్స్‌లో మాత్రం క్రేజ్ ఉంటుంది. ఉదయం పాఠాలు చెప్పడం.. ఆరు దాటాక ఫుల్‌గా మందుకొట్టి ఉదయం వరకూ లేవకపోవడం ఇదే అతని దినచర్య. తరచూ ఏదో ఒక గొడవతో కాలేజ్ నుంచి సస్పెండ్ అవుతూ ఉంటాడు. కళాశాలలో స్టూడెంట్స్ ఎన్నికలు అవసరం అని.. యాజమాన్యంతో విభేదించి ఎన్నికలు జరిగేలా చూస్తాడు జేడీ. అయితే రిజల్ట్ రోజు జరిగిన గొడవకు బాధ్యత వహిస్తూ మూడు నెలలు కాలేజీని వదలేయాల్సి వస్తుంది. ఆ తరుణంలో బాల నేరస్తుల కేంద్రానికి మాస్టర్‌గా వెళ్లాల్సివస్తుంది జేడీ. అక్కడకు వెళ్లిన తరువాత బాల నేరస్తుల్ని అడ్డుపెట్టుకుని భవానీ చేస్తున్న అక్రమాలు, నేరాల ఒక్కొక్కటిగా తెలుసుకుంటాడు జేడీ. జైలులో జరిగిన దారుణమైన ఘటనతో జేడీ బాల నేరస్థుల్లో మార్పు తీసుకురావడానికి ప్రయత్నిస్తుంటారు. వీటన్నింటికీ సూత్రధారి భవానీ అని తెలుసుకుని అతని ఆట ఎలా కట్టించాడు? బాల నేరస్థులకు ఎలా విముక్తి కల్పించాడు అన్నదే మిగిలిన ‘మాస్టర్’ కథ.

‘ఖైదీ’ లాంటి విభిన్న కాన్సెప్ట్‌తో హీరో కార్తీని విలక్షణ నటుడిగా చేసి అద్భుతమైన సినిమా రూపొందించిన యువ దర్శకుడు లోకేష్ కనకరాజ్.. విజయ్, విజయ్ సేతుపతి లాంటి మాస్ ఇమేజ్ ఉన్న స్టార్లతో సినిమా అంటే అంచనాలు ఓ రేంజ్‌లో ఉంటాయి. అయితే ‘మాస్టర్’ సినిమాతో ఆ అంచనాలను అందుకోలేకపోయాడు దర్శకుడు. ఎంత మాస్ ఇమేజ్ ఉన్నప్పటికీ కథలో పసలేకపోతే ఎన్ని ఎలివేషన్స్, ఊర మాస్ ఎలిమెంట్స్ పెట్టినా లాభం ఉండదు. విజయ్, విజయ్ సేతుపతి.. ఇద్దరూ ఇద్దరే. ఇలాంటి ఇద్దరు స్టార్ హీరోలకు డీల్ చేయడం అంటే చిన్న విషయం కాదు. ఓ మోస్తరు కథనైనా తమ భుజాలపై వేసుకుని బాక్సీఫీస్ వద్ద కాసులు కురిపించే సత్తా ఉన్న ఈ ఇద్దరు హీరోలను సరిగా ప్రజెంట్ చేయలేకపోయాడు దర్శకుడు. జైలు.. ఖైదీలు.. లారీలు.. ఈ హంగామా అంతా చూస్తే దర్శకుడు ఆ ఖైదీ సినిమా నుంచి ఇంకా బయటపడలేదేమో అనిపిస్తుంది. ఖైదీ అయితే విభిన్న కథ.. రేసీ స్క్రీన్ ప్లేతో కథ చకాచకా పరుగులు పెడుతుంది.

అయితే ‘మాస్టర్’ని అయితే మాస్టర్ పీస్ చేయలేకపోయాడు. తన పంథా మార్చుకుని ఫక్తు కమర్షియల్ చట్రంలో ఇరుక్కుపోయినట్టుగా అనిపిస్తుంది. అక్కర్లేని ఎలివేషన్స్ సీన్లు.. హీరోయిజం.. భారీ ఇంట్రోలు.. బోరు కొట్టించే బిల్డప్పులతో ‘మాస్టర్’ పాఠాలకు పాస్ మార్కులు కూడా పడటం కష్టమే అనేట్టు చేశారు. మాస్టర్ కథ లైన్ బాగుంది కానీ.. ప్రజెంటేషన్ బోరింగ్, రొటీన్‌గా అనిపిస్తుంది.

కాలేజ్ సీన్లు.. ఎన్నికలు.. స్పీచ్‌లు.. మాస్టర్ పాఠాలు.. స్టూడెంట్స్‌లో మార్పు ఇవన్నీ ఇంతకు ముందు అందరూ చెప్పిన రొటీన్ పాఠాలే. కొత్తదనం ఏమీ కనిపించకపోగా.. లెంగ్తీ సీన్‌లు బోర్ కొట్టించాయి. ఎంత మాస్ ఇమేజ్ ఉన్న హీరో అయినా సీన్‌కి ఎంతవరకూ పెర్ఫామెన్స్ ఇవ్వాలో అంత ఇస్తేనే దాన్ని ఎంజాయ్ చేయగలరు. కానీ మాస్టర్‌లో చాలా సీన్లు ఇంత ఎలివేషన్స్, బిల్డప్‌ అవసరమా అన్నట్టుగానే ఉంటుంది. మాస్టర్ కథను ఆసక్తికరంగా మొదలుపెట్టిన దర్శకుడు ఆ ఫ్లోను కంటిన్యూ చేయలేకపోయాడు.

ఎంట్రీలో విజయ్ ఇంటి నుంచి కాలేజ్ వచ్చే సందర్భంలో సుమారు పావుగంట పాటు తీన్మార్ దరువు వేశారు. ఎప్పుడైపోతుందా ఈ సీన్.. నెక్స్ట్ సీన్ వస్తే బావుండు అన్నట్టుగా కనిపించింది. ఇలాంటి సీన్లు సినిమాలో చాలా ఉన్నాయి. ఇంటర్వెల్ ఎప్పుడొస్తుందా?? అని ఎదురు చూసినట్టే.. క్లైమాక్స్ కోసం ఎదురు చూసే పరిస్థితి.. క్లైమాక్స్ కూడా హీరో వెళ్లడం విలన్లను కొట్టడం.. ఇది రొటీన్ రోత కొట్టుడే. తమిళ తంబీలైతే ఈ భారీ ఎలివేషన్స్, బిల్డప్ షాట్స్‌ని ఎంజాయ్ చేయొచ్చు కానీ.. తెలుగు ఆడియన్స్‌ వీటిని తట్టుకోవడం కష్టమే.

హీరో విజయ్ క్యారెక్టరైజేషన్ కూడా కొత్తగా లేదు. తాగుబోతు ప్రొఫెసర్ మంచి మనిషిగా మారడానికి బలమైన కారణం చూపించిన దర్శకుడు.. అతన్ని తాగుబోతు ప్రొఫెసర్‌గా ఎందుకు ప్రజెంట్ చేశారన్నది చెప్పలేదు.
అయితే విజయ్ మాత్రం తన పెర్పామెన్స్‌ పరంగా ఫుల్ మీల్స్ అనేట్టుగానే చేశాడు. ఊర మాస్ మాస్టర్‌గా తీన్మార్ స్టెప్పులు వేస్తూ.. స్టైలిష్‌ పెర్ఫామెన్స్ ఇచ్చాడు.

ఇక ప్రతినాయకుడిగా విజయ్ సేతుపతి చాలా క్రూరంగా కనిపించాడు. ఊర మాస్ గెటప్‌లో ఆకట్టుకున్నాడు. డిఫరెంట్ మేనరిజంతో ఆకట్టుకున్నాడు. అతని డైలాగ్‌లు బాగా పేలాయి. విజయ్- విజయ్ సేతుపతి ఎదురపడే సీన్ బాగా వచ్చింది. విజయ్ పాత్ర రొటీన్ కాగా.. విజయ్ సేతుపతి క్యారెక్టరైజేషన్ వైవిధ్యంగా ఉంటుంది. విజయ్-విజయ్ సేతుపతిల మధ్య క్లైమాక్స్ ఫైట్ బావుంది.

ఇక ఈ సినిమాలో మాళవికా మోహనన్, ఆండ్రియా‌లు హీరోయిన్స్‌గా ఉన్నారంటే ఉన్నారు అంతే. కమర్షియల్ సినిమాలో హీరో పక్కన పాటల కోసమైనా హీరోయిన్‌ని పనికట్టుకుని సీన్‌లో పెడుతుంటారు. కానీ ‘మాస్టర్’లో అలాంటి స్కోప్ కూడా లేదు. ఆండ్రియాని చివర్లో విలన్లపై బాణాలు వేయడానికి పెట్టినట్టు ఉండగా.. మాళవికా మోహనన్‌ని రెండు మూడు సీన్లకు పరిమితం చేశారు. హీరో హీరోయిన్‌ల మధ్య కెమిస్ట్రీకి ఆస్కారమే లేదు. ఇక ఇతర పాత్రల్లో చేసిన వాళ్లంతా తమిళ తంబీలే కావడంతో ఆ పాత్రలు మరీ కనెక్ట్ అయ్యే విధంగా అయితే లేవు.

అనిరుధ్ మ్యూజిక్ విషయానికి వస్తే.. పాటలపై కంటే బ్యాగ్రౌండ్ మ్యూజిక్‌పైనే ఎక్కువ శ్రద్ధపెట్టినట్టుగా అనిపిస్తుంది. హీరో ఎంట్రీ‌కి పది నిమిషాల పాటు తీన్మార్ దరువుతో మోత మోగించాడు. చిట్టి స్టోరీ, మాస్టర్ కమింగ్ సాంగ్స్‌ పర్వాలేదనిపిస్తాయి. కొన్ని చోట్ల మరీ ఆర్ ఆర్ మోతాదుకి మించి ఉన్నట్టుగా అనిపిస్తుంది. సత్యన్ సూర్యన్ సినిమాటోగ్రఫీ పర్వాలేదు. యాక్షన్ ఎపిసోడ్స్ బాగున్నాయి. కాలేజ్, జైలు ఈ రెండు లొకేషన్స్‌లోనే ఎక్కువ సీన్లు ఉండటంతో పరిమితమైన లొకేషన్లలోనే చిత్రీకరణ జరిగినట్టుగా అనిపిస్తుంది. ఇక డబ్బింగ్ కూడా మక్కీకి మక్కీ తమిళ్ డైలాగ్‌లు చెప్పినట్టుగా ఉన్నాయి. అక్కర్లేని సీన్లతో మరీ మూడు గంటల నిడివి అవసరమా అనిపిస్తుంది. ఎలివేషన్స్, బిల్డప్ షాట్స్‌కి కత్తిరేస్తే క్రిస్పీగా అనిపించేది.

మొత్తంగా ‘మాస్టర్’ మరీ మాస్టర్ పీస్ అయితే కాదు. ఫస్టాఫ్ పర్వాలేదు కానీ.. సెకండాఫ్ బోరింగ్‌. విజయ్ సేతుపతికి మంచి మార్కులు.. విజయ్‌కి పాస్ మార్కులు. ఇక దర్శకుడికైతే తమిళ్ ఆడియన్స్ నుంచి పాస్ మార్కులు పడొచ్చు కానీ.. తెలుగులో అయితే కష్టమే.

LEAVE A REPLY

Please enter your comment!
Please enter your name here