maharashtra farmers rally: సాగు చట్టాలకు వ్యతిరేకంగా నాసిక్ నుంచి ముంబయికి మహారాష్ట్ర రైతులు భారీ ర్యాలీ – farmers from maharashtra’s 21 districts reach mumbai to protest against farm laws

0
25


కేంద్రం తీసుకొచ్చిన కొత్త సాగు చట్టాలకు వ్యతిరేకంగా ఢిల్లీ సరిహద్దులో రైతులు నిర్వహిస్తున్న ఆందోళనకు మద్దతుగా మహారాష్ట్ర రైతులు భారీ కవాతు నిర్వహించారు. నాసిక్ నుంచి శనివారం బయలుదేరిన రైతులు రాజధాని ముంబైకి ఆదివారం సాయంత్రం చేరుకున్నారు. ఆల్ ఇండియా కిసాన్ మహాసభ నేతృత్వంలో వేలాది మంది రైతులు ఈ కవాతులో పాల్గొన్నారు. ఈ ర్యాలీలో 15వేల మంది రైతులు పాల్గొన్నట్టు కిసాన్ మహాసభ తెలిపింది. ముంబైలోని ఆజాద్ మైదానంలో సోమవారం భారీ సభ నిర్వహించనున్నారు.

ఈ కార్యక్రమానికి ఎన్సీపీ అధినేత శరద్ పవార్ సహా శివసేనకు యువనేత ఆదిత్య ఠాక్రే, బాల సాహెబ్ థోరట్, కాంగ్రెస్, ఎన్సీపీ, వామపక్షాలకు చెందిన పలువురు నేతలు హాజరవుతున్నారు. రైతులు ఎర్ర జెండాలు, బ్యానర్లు పట్టుకుని వేలాది మంది రైతులు రహదారుల గుండా నడిచి వస్తున్న దృశ్యాలు సోషల్ మీడియాలో వైరల్ అవుతున్నాయి.

మంగళవారం ఢిల్లీలో ట్రాక్టర్ ర్యాలీకి పంజాబ్, హర్యానా రైతులు సిద్ధమవుతున్న తరుణంలో ఈ భారీ ర్యాలీని నిర్వహించడం చర్చనీయాంశంగా మారింది. అంతకు ముందు మహారాష్ట్రలోని 21 జిల్లాలకు చెందిన రైతులు నాసిక్‌లో సమావేశమయ్యారు.

ఎముకల కొరికే చలిలోనూ మొక్కవోని దీక్షతో ఉద్యమం చేస్తున్న రైతులకు మద్దతు తెలిపిన ఎన్సీపీ నేత శరద్ పవార్.. రైతుల మనోభావాలను అర్ధం చేసుకోవడంలో కేంద్రం విఫలమైతే పరిణామాలు తీవ్రంగా ఉంటాయని రెండు వారాల కిందట ఆయన హెచ్చరించారు. అలాగే, రైతులు సహనాన్ని పరీక్షించడం మానుకోవాలని నెల రోజుల కిందట ఇటువంటి ప్రకటనే చేశారు.

వ్యవసాయ చట్టాలను 18 నెలల పాటు నిలుపుదల చేస్తామన్న కేంద్రం ప్రతిపాదనను రైతు సంఘాల నేతలు తిరస్కరించిన విషయం తెలిసిందే. చట్టాలను పూర్తిగా రద్దు చేయాల్సిందేనని రైతులు స్పష్టం చేశారు. కేంద్ర ప్రభుత్వ ప్రతిపాదనపై చర్చల అనంతరం సంయుక్త కిసాన్‌ మోర్చా ఓ ప్రకటన విడుదల చేసింది. నూతన వ్యవసాయ చట్టాల రద్దు విషయంలో వెనక్కి తగ్గేది లేదని స్పష్టం చేసింది.

రిపబ్లిక్ డే రోజున నిర్వహించ తలపెట్టిన ట్రాక్టర్ ర్యాలీకి ఢిల్లీ పోలీసులు అనుమతి ఇచ్చారు. ఢిల్లీ పరిసరాల్లో 100 కి.మీ. పరిధిలో ర్యాలీ నిర్వహించడానికి అనుమతి వచ్చిందని రతైలు వెల్లడించారు. జనవరి 26న ఉదయం ఘాజీపూర్, సింఘు, టిక్రి సరిహద్దుల నుంచి ర్యాలీ ప్రారంభమవుతుందని రైతు నేతలు తెలిపారు.

LEAVE A REPLY

Please enter your comment!
Please enter your name here