Mahapanchayat message: చట్టాలు రద్దు చేయకుంటే గద్దే దిగాల్సిందే.. కేంద్రానికి రైతులు పరోక్షంగా హెచ్చరిక – farmers union orgnised two mahapanchayats and warning to central govt for farm laws

0
19


కేంద్రం తీసుకొచ్చిన నూతన సాగు చట్టాలను వ్యతిరేకిస్తూ చేపట్టిన ఉద్యమాన్ని మరింత ఉద్ధృతం చేసే దిశగా అన్నదాతలు ముందుకు సాగుతున్నారు. బుధవారం యూపీ, హరియాణాలో మహాపంచాయత్‌ను రైతు సంఘాలు నిర్వహించాయి. జీంద్‌ జిల్లాలోని ఖండేలా గ్రామంలో జరిగిన ‘మహా పంచాయత్‌’‌ను అన్నదాతల శక్తి ఏపాటిదో తెలిసేలా టేక్‌రాం ఖండేలా ఆధ్వర్యంలోని సర్వ జాతీయ ఖండేలా ఖాప్‌ నిర్వహించింది. రెండు దశాబ్దాల కింద రైతు ఉద్యమాన్ని ఉద్ధృతంగా నడిపిన చరిత్ర ఈ సంస్థకు ఉంది.

ఈ సందర్భంగా భారతీయ కిసాన్‌ యూనియన్‌ (బీకేయూ) నేత రాకేశ్‌ తికాయిత్‌ మాట్లాడుతూ… వవసాయ చట్టాలను రద్దు చేయకపోతే ప్రభుత్వం మనుగడ కష్టంగా మారుతుందని పరోక్షంగా కేంద్రాన్ని హెచ్చరించారు. రైతుల ఆందోళన ఇలాగే కొనసాగితే ప్రభుత్వం అధికారాన్ని కోల్పోతుందని అన్నారు. ‘ఇంతవరకు కేవలం మూడు ‘చట్టాల రద్దు’ గురించే మాట్లాడాం. ప్రభుత్వం శ్రద్ధగా వినాలి. యువత ఇప్పుడు ‘గద్దీ వాపసీ’ గురించి మాట్లాడితే ఏం చేస్తారు?’ అని ప్రశ్నించారు.

రైతులు రాకుండా చేసేందుకు రోడ్లపై మేకులు, మొనదేలిన ఇనుప చువ్వలు పాతడం, సిమెంట్‌ దిమ్మలను అడ్డంగా పెట్టడాన్ని తికాయిత్‌ తీవ్రంగా ఖండించారు. ‘రాజుకు భయమేస్తే కోటలోనే ఉండిపోతారు. రోడ్లపై పాతిన మేకులపై నేను పడుకుంటాను. నా మీద నుంచి నడుచుకుంటూ వెళ్లి వాటిని దాటండి’ అని ఆయన పిలుపునిచ్చారు. రైతుల పోరాటం మరింత ఉద్ధృతమవుతోందని, ఖాప్‌ పంచాయతీల మద్దతు చూస్తుంటే విజయం సాధిస్తామన్న నమ్మకం ఉందన్నారు. శాంతియుతంగానే ఆందోళన చేయాలని సూచించారు.

ఒక్కో రైతు కుటుంబం నుంచి ఒక్కొక్కరిని ఢిల్లీ సరిహద్దుల్లోని నిరసన స్థలానికి పంపాలని మథురలో జరిగిన మహాపంచాయత్‌లో రాకేశ్ తికాయత్ పిలుపునిచ్చారు. ఆయన పిలుపు మేరకు వచ్చే రెండు రోజుల్లో కేవలం మథుర నుంచి 5,000 మంది రైతులు ఘాజీపూర్ సరిహద్దులకు చేరుకోనున్నట్టు రైతు సంఘాలు పేర్కొన్నాయి. చట్టాలను రద్దుచేసే వరకు రైతులు ఇళ్లలో కూర్చోవద్దని రూర్కీలో వ్యాఖ్యానించారు.

‘వ్యవసాయ చట్టాలను రద్దుచేసే వరకు ఆందోళన విరమించే ప్రసక్తే లేదు.. మేము నిరసనల్లో పాల్గొనాలని రోజు రోజుకూ రైతుల మధ్యకు వెళుతున్నాం.. శాంతియుతంగానే నిరసన కొనసాగిస్తాం.. ఒకవేళ ప్రభుత్వం తమపై కాల్పులు జరిపినా ఎటువంటి హింస లేకుండా సమాధానం ఇస్తాం’ అని తికాయత్ అన్నారు.
ఈ సందర్భంగా మహాపంచాయత్‌లో ఐదు తీర్మానాలు చేశారు. మూడు వ్యవసాయ చట్టాల రద్దు, కనీస మద్దతు ధరకు చట్టబద్ధత, స్వామినాథన్‌ కమిషన్‌ నివేదిక అమలు, వ్యవసాయ రుణాల మాఫీ, అరెస్టయిన రైతుల విడుదల ఈ డిమాండ్లను ప్రభుత్వం నెరవేర్చాలని పేర్కొన్నారు.

LEAVE A REPLY

Please enter your comment!
Please enter your name here