madras high court: తాళం వేసిన గదిలో ఆడ, మగ ఉంటే అనైతిక సంబంధమా? 23 ఏళ్లనాటి కేసులో సంచలన తీర్పు – man and woman being in locked house not proof of affair, madras high court verdict

0
26


23 ఏళ్ల కిందట కేసులో మద్రాస్ హైకోర్టు సంచలన తీర్పును వెలువరించింది. తాళం వేసిన గదిలో స్త్రీ, పురుషులు ఉండటాన్ని వారి మధ్య అక్రమ సంబంధం ఉందని భావించలేమని, అది నేరం కాదని తీర్పు వెలువరించింది. ‘తాళం వేసిన ఇంటి లోపల ఉన్న ఆగ, మగ మధ్య అనైతిక సంబంధం ఉందని ఊహించకోవాల్సిన అవసరం లేదు.. సమాజంలో ప్రబలంగా ఉన్న ఈ రకమైన ఊహలు క్రమశిక్షణా చర్యలను తీసుకోవడంం, శిక్షించడానికి ఆధారం కాదు’ అని జస్టిస్ ఆర్ సురేశ్ కుమార్ ధర్మాసనం స్పష్టం చేసింది.

కేసు వివరాల్లోకి వెళితే.. పారామిలటరీలో కానిస్టేబుల్‌గా పనిచేస్తున్న శరవణబాబు చెన్నైలో విధులు నిర్వర్తిస్తున్నాడు. అతడి క్వార్టర్స్‌కు సమీపంలో ఓ మహిళా కానిస్టేబుల్‌ ఉండేది. 1998 అక్టోబరు 10న శరవణబాబు ఇంటికి రాత్రి 7.30 ప్రాంతంలో ఆమె రావడంతో ఇరువురూ అనైతిక చర్యకు పాల్పడుతున్నారే అనుమానంతో స్థానికులు వారిని లోపలి ఉంచి తాళం వేశారు. దీనిపై ఉన్నతాధికారులకు ఫిర్యాదు చేశారు. సమాచారం అందుకున్న పోలీస్ అధికారులు అక్కడికి చేరుకుని ఇంటి తాళాలు తీసి చూడగా శరవణబాబు, మహిళా కానిస్టేబుల్‌ ఉన్నారు.

వారి మధ్య అక్రమ సంబంధం ఉందని భావించిన అధికారులు ఈ సంఘటనపై విచారణ జరిపి శరవణబాబును ఉద్యోగం నుంచి తొలగించారు. అయితే, తనను అన్యాయంగా తొలగించారని ఈ ఉత్వర్వులను శరవణబాబు హైకోర్టులో సవాల్ చేశారు. తన ఇంటికి సమీపంలో ఉండే ఆ మహిళా కానిస్టేబుల్ తాళాలు తీసుకోడానికి వచ్చిందని, మా ఇద్దరి మధ్య ఎటువంటి అనైతిక సంబంధం లేదని వాదించాడు. ఒకటి రెండు కాదు ఏకంగా 23 ఏళ్ల పాటు దీనిపై సుదీర్ఘ విచారణ జరిగింది.

ఇరుపక్షాల వాదనలను విన్న హైకోర్టు శుక్రవారం తుది తీర్పును వెలువరించింది. తప్పుచేయాలనే ఉద్దేశంతో శరవణబాబు ఇంటికి మహిళా కానిస్టేబుల్ వెళ్లినట్టు ఎలాంటి సాక్ష్యాలు లేవు.. అవివాహితులైన ఆడ, మగ ఓ గదిలో ఉంటే తప్పిదంగా భావించే అవకాశం లేదని జస్టిస్ సురేశ్ కుమార్ వ్యాఖ్యానించారు. ఉద్యోగం నుంచి తొలగించిన శరవణబాబును తిరిగి విధులలోకి తీసుకోవాలని ఉత్తర్వులు జారీ చేశారు.

‘ఇరువురూ అభ్యంతరకరమై రీతిలో ఉన్నారని చెప్పే ఆధారాలు లేవు.. అనుమానాలు ఆధారంగా ఓ అభిప్రాయానికి రాలేం.. తాళం వేసిన గదిలో ఓ ఆడ, మగ ఉంటే ఆ చోట వ్యభిచారం జరిగినట్లు భావించలేం, సమాజంలో ఉన్న పలు అభిప్రాయాలు, ఊహలు ఆధారంగా క్రమశిక్షణా చర్యలు తీసుకోవడం, శిక్షించడమో భావ్యం కాదు’ అని న్యాయమూర్తి ఆ సందర్భంగా పేర్కొన్నారు. అధికారులు ఇచ్చిన ఉత్తర్వులను రద్దు చేశారు.

LEAVE A REPLY

Please enter your comment!
Please enter your name here