karnataka man funeral: అంత్యక్రియలు చేసిన 10 రోజులకు తిరిగొచ్చాడు.. షాకింగ్! – dead man returns 10 days after funeral in karnataka, shocks villagers

0
28


అంత్యక్రియలు చేసిన 10 రోజులకు ఓ వ్యక్తి తిరిగొచ్చాడు. గ్రామస్థులకు షాకిచ్చాడు. కర్ణాటకలోని దక్షిణ కన్నడ జిల్లాలో ఈ ఘటన చోటు చేసుకుంది. మంగళూరు సమీపంలో గర్దాడి గ్రామానికి చెందిన శ్రీనివాస దేవాడిగ (60) జనవరి 26న కనిపించకుండాపోయాడు. కానీ, కుటుంబసభ్యులు పోలీసులకు ఫిర్యాదు చేయలేదు. ఎందుకంటే అతడు అలా అదృశ్యమవడం వాళ్లకు కామనేనట.

శ్రీనివాసకు మందు తాగే అలవాటు ఉంది. అది కూడా ఫూటుగా తాగుతాడు. ఎక్కడెక్కడెకో వెళ్లిపోతాడు. చాలా సార్లు అలా వెళ్లి, మళ్లీ ఇంటికి తిరిగొచ్చాడట. ఈసారి కూడా అలాగే జరిగి ఉంటుందని భావించారు. కానీ, రోజులు గడుస్తున్నా.. అతడు తిరిగి రాలేదు.

ఈలోగా ఓ బావిలో గుర్తు తెలియని వ్యక్తి మృతదేహం కనిపించింది. కుళ్లిపోయిన స్థితిలో ఉన్న ఆ మృతదేహాన్ని పోలీసులు స్వాధీనం చేసుకున్నారు. అతడికి సంబంధించిన వివరాలేవీ లేకపోవడం, సమీప పోలీస్ స్టేషన్లలో అదృశ్యం కేసులు కూడా లేకపోవడంతో పోలీసులు ఆ వ్యక్తి ఫొటోలను సోషల్ మీడియాలో పోస్టు చేశారు. దీంతో అవి వైరల్‌గా మారాయి.

ఆ మృతదేహానికి సంబంధించిన వార్త విని శ్రీనివాస కుటుంబసభ్యులు పోలీసులను సంప్రదించారు. ఆ మృతదేహాన్ని పరిశీలించి అతడు శ్రీనివాసనేనని గుర్తించారు. దుస్తులు, మృతదేహం శరీరం మీద ఉన్న పుట్టుమచ్చల ఆధారంగా గుర్తించినట్లు చెప్పారు. అనంతరం ఆ మృతదేహాన్ని తీసుకెళ్లి, బంధువులందరినీ పిలిచి అంత్యక్రియలు జరిపించారు.

అంత్యక్రియలు పూర్తై 10 రోజులు గడుస్తున్నాయి. 13వ రోజున దినకర్మ జరిపించడానికి కుటుంబసభ్యులు ఏర్పాట్లలో నిమగ్నమయ్యారు. ఈలోగా ఓ బంధువు వారికి ఫోన్ చేశాడు. శ్రీనివాస బతికే ఉన్నాడని తెలిపారు. అది విని వారు షాకయ్యారు. మంగళూరులోని ప్రభుత్వ ఆస్పత్రి పరిసరాల్లో శ్రీనివాస తిరుగుతున్నట్లు తెలుసుకున్న కుటుంబసభ్యులు పోలీసుల సాయంతో అక్కడికి వెళ్లారు.

మంగళూరులో శ్రీనివాసను గుర్తించి బెళ్తాంగడి పోలీస్ స్టేషన్‌కు తీసుకొచ్చారు. అనంతరం అతడి కుటుంబసభ్యులకు అప్పగించారు. మరి అంత్యక్రియలు జరిపించిన ఆ మృతదేహం ఎవరిది? ఇప్పుడిదే అంతుచిక్కని ప్రశ్న. పోలీసులు అది తేల్చే పనిలో ఉన్నారు.

LEAVE A REPLY

Please enter your comment!
Please enter your name here