Jr NTRతో ‘ఉప్పెన’ దర్శకుడు.. వైజాగ్ బ్యాక్‌‌డ్రాప్‌లో మూవీ!!

0
26



‘ఉప్పెన’ సినిమాతో దర్శకుడిగా పరిచయమైన బుచ్చిబాబు సానా తొలి చిత్రంతోనే మంచి పాపులారిటీ సంపాదించారు. ‘ఉప్పెన’ బ్లాక్ బస్టర్ హిట్ కావడంతో బుచ్చిబాబు వార్తల్లో నిలిచారు. సుకుమార్‌కు అసలు సిసలు శిష్యుడు అనిపించుకున్నారు. ‘ఉప్పెన’ హిట్‌తో మైత్రీ మూవీ మేకర్స్ సంస్థ బుచ్చిబాబుతో మరో రెండు సినిమాలు చేయడానికి ఒప్పందం కుదుర్చుకుందని సమాచారం. ఇందులో ఒక సినిమా యంగ్ టైగర్ ఎన్టీఆర్‌తో చేయబోతున్నారని టాక్.

జూనియర్ ఎన్టీఆర్ కోసం బుచ్చిబాబు ఒక స్క్రిప్ట్‌ను ఇప్పటికే సిద్ధం చేశారట. త్వరలోనే ఈ కథను ఎన్టీఆర్‌కు బుచ్చిబాబు చెప్పబోతున్నారని అంటున్నారు. ఎన్టీఆర్‌తో కలిసి బుచ్చిబాబు ఇప్పటికే పనిచేశారు. సుకుమార్ దర్శకత్వంలో ఎన్టీఆర్ హీరోగా రూపొందిన ‘నాన్నకు ప్రేమతో’ సినిమాకు బుచ్చిబాబు కో-డైరెక్టర్‌గా పనిచేశారు. అప్పుడు ఎన్టీఆర్‌కు బుచ్చిబాబు బాగా దగ్గరయ్యారట. ఆ సాన్నిహిత్యంతోనే ఒక కథ చెప్పమని బుచ్చిబాబును ఎన్టీఆర్ అడిగారని ఇండస్ట్రీ వర్గాల సమాచారం.

బుచ్చిబాబు సిద్ధం చేసిన కథ స్పోర్ట్స్ డ్రామా అని అంటున్నారు. విశాఖపట్నం బ్యాక్‌డ్రాప్‌లో ఈ సినిమా ఉంటుందని టాక్. త్వరలోనే ఈ కథను ఎన్టీఆర్‌కు బుచ్చిబాబు నెరేట్ చేస్తారని గుసగుసలు వినిపిస్తున్నాయి. ఈ కథ ఎన్టీఆర్‌కు నచ్చితే గనుక మరో ఇంట్రస్టింగ్ ప్రాజెక్ట్ పట్టాలెక్కుతుంది. ఎన్టీఆర్ ఇప్పటికే మైత్రీ మూవీ మేకర్స్‌తో కలిసి పనిచేశారు. ఎన్టీఆర్‌తో ‘జనతా గ్యారేజ్’ సినిమాను మైత్రీ సంస్థ రూపొందించింది. ఇప్పుడు ఈ ప్రాజెక్ట్ ఓకే అయితే గనుక ఇది వీరి కాంబోలో వచ్చే మూడో సినిమా అవుతుంది.

ప్రస్తుతం జూనియర్ ఎన్టీఆర్ RRR మూవీతో బిజీగా ఉన్న సంగతి తెలిసిందే. మార్చి నాటికి ఈ ప్రాజెక్ట్ నుంచి ఎన్టీఆర్ ఫ్రీ అయిపోతారు. ఆ తరవాత త్రివిక్రమ్ దర్శకత్వంలో సినిమాను ఎన్టీఆర్ షురూ చేస్తారు. ఈ ప్రాజెక్ట్ పూర్తయిన తరవాత ‘కె.జి.యఫ్’ డైరెక్టర్ ప్రశాంత్ నీల్‌ దర్శకత్వంలో ఎన్టీఆర్ సినిమా ఉంటుంది. ఈ సినిమాను మైత్రీ మూవీ మేకర్స్ సంస్థ నిర్మించనుంది. ఈ రెండు సినిమాలు పూర్తయిన తరవాతే బుచ్చిబాబుతో ఎన్టీఆర్ చిత్రం పట్టాలెక్కే అవకాశం ఉంది.

LEAVE A REPLY

Please enter your comment!
Please enter your name here