Indo American Vijay Shankar: భారతీయ అమెరికన్ విజయ్ శంకర్‌కు షాక్.. ట్రంప్ ప్రతిపాదన రద్దుచేసిన బైడెన్ – joe biden withdraws nomination of indian-american advocate for associate judge

0
23


ప్రధానాంశాలు:

  • మాజీ అధ్యక్షుడు డొనాల్డ్ ట్రంప్ ప్రతిపాదనలు రద్దు.
  • భారతీయ అమెరికన్ విజయ శంకర్‌కు జో షాక్.
  • ట్రంప్ నియామకాలపై బైడెన్ సంచనల నిర్ణయం.

భారతీయ అమెరికన్ లాయర్ విజయ్ శంకర్‌ను డిస్ట్రిక్ట్ ఆఫ్ కొలంబియా కోర్ట్ ఆఫ్ అప్పీల్స్ జడ్జిగా మాజీ అధ్యక్షుడు డొనాల్డ్ ట్రంప్ ఈ ఏడాది జనవరి 2న రెండోసారి నామినేట్ చేసిన విషయం తెలిసిందే. అధికారం నుంచి దిగిపోవడానికి రెండు వారాల ముందే ట్రంప్ ఈ నిర్ణయం తీసుకున్నారు. అయితే, విజయ్ శంకర్‌ను జడ్జిగా నియమించడానికి ట్రంప్ చేసిన ప్రతిపాదనను కొత్త అధ్యక్షుడు జో బైడెన్ గురువారం రద్దుచేశారు.

అధికార పీఠం నుంచి దిగిపోవడానికి కొద్ది నెలల ముందు ట్రంప్ చేపట్టిన 30 మంది నియామకాలకు సంబంధించిన ప్రతిపాదనలను ఉపసహరించే నోటిఫికేషన్‌ను బైడెన్ సెనేట్‌కు పంపారు. అందులో భారతీయ అమెరికన్ విజయ్ శంకర్ పేరు కూడా ఉండటం గమనార్హం.

గతేడాది జూన్‌లోనే విజయ శంకర్ నియామకంపై ట్రంప్ ప్రకటన చేశారు. జాతీయ రాజధాని వాషింగ్టన్ డీసీలోని అత్యున్నత న్యాయస్థానానికి భారత సంతతికి చెందిన విజయ్ శంకర్‌ను అసోసియేట్ న్యాయమూర్తిగా నియమించనున్నట్టు డొనాల్డ్ ట్రంప్ ప్రకటించారు. ఈ అంశంలో సెనేట్ ఆమోదం లభిస్తే, కొలంబియా కోర్ట్ ఆఫ్ అపీల్స్‌కు ఆయన న్యాయమూర్తి అవుతారని ట్రంప్ అప్పట్లో పేర్కొన్నారు.

ప్రస్తుతం న్యాయశాఖ క్రిమినల్ విభాగంలో సీనియర్ లిటిగేషన్ కౌన్సిల్‌గా, అప్పిలేట్ సెక్షన్ డిప్యూటీ చీఫ్‌గా విజయ్ శంకర్ బాధ్యతలు నిర్వర్తిస్తున్నారు. 2012 నుంచి న్యాయ శాఖలో విధులు నిర్వర్తిస్తున్న శంకర్.. అంతకు ముందు వాష్టింగ్టన్‌లో న్యాయవాదిగా ప్రాక్టీస్ చేశారు. మేయర్ బ్రౌన్, ఎల్ఎల్‌సీ, కోవింగ్టన్ అండ్ బర్లింగ్, ఎల్ఎల్‌సీల తరఫున పలు కేసులను వాదించారు.

న్యాయశాస్త్రంలో డిగ్రీ పూర్తయిన తర్వాత యునైటెడ్ స్టేట్స్ కోర్ట్ ఆఫ్ అప్పీల్స్ ఫర్ సెకెండ్ సర్క్యూట్ జడ్జ్ చెస్టర్ జే స్ట్రాబౌ వద్ద క్లర్క్‌గా ఉన్నారు. న్యాయశాస్త్రంలో డ్యూక్ యూనివర్సిటీ నుంచి బ్యాచిలర్ డిగ్రీ, వర్జీనియా యూనివర్సిటీ నుంచి పీహెచ్‌డీ పూర్తిచేశారు. అనంతరం వర్జీనియా లా రివ్యూకి నోట్స్ ఎడిటర్‌గా పనిచేశారు.

LEAVE A REPLY

Please enter your comment!
Please enter your name here