global times on india vaccines: టీకా ఉత్పత్తిలో భారత సామర్ధ్యాన్ని ఎట్టకేలకు అంగీకరించిన చైనా, కానీ అదే వక్రబుద్ధి! – india’s vaccine export plan could be good news for global market says china official media

0
27


ఔషధాలు, టీకాల అభివృద్ధిలో భారత సామర్ధ్యాన్ని ప్రపంచ దేశాలూ శ్లాఘిస్తున్నాయి. ప్రపంచ టీకాల ఉత్పత్తి కేంద్రంగా భారత్ గుర్తింపు పొందింది. ఫార్మా రంగంలో తిరుగులేని ఆధిపత్యం భారత్ సొంతం.. దీని గురించి ప్రత్యేకంగా చెప్పాల్సిన పనిలేదు. ఈ విషయాన్ని పొరుగు దేశం చైనా ఎట్టకేలకు అంగీకరించింది. భారత్‌ను వేనోళ్లా కీర్తించడానికి మనస్కరించకపోయినా.. కోవిడ్ టీకాల కోసం ప్రపంచం మొత్తం మనవైపే చూస్తుండటంతో డ్రాగన్ అధికారిక మీడియా ఓ ప్రత్యేక కథనాన్ని ప్రచురించింది.

వ్యాక్సిన్‌లపై పరిశోధన, అభివృద్ధి, ఉత్పత్తి విషయంలో చైనాకు భారత్ ఏమాత్రం తీసిపోదంటూ గ్లోబల్ టైమ్స్ తన కథనంలో పేర్కొంది. కరోనా టీకా ఎగుమతులకు భారత్ అంగీకరించడం ప్రపంచానికి ఓ శుభవార్త అని వ్యాఖ్యానించింది. అయితే, నరనరాల్లో భారత్ అంటే అసూయ ద్వేషాలను జీర్ణించుకున్న చైనా.. టీకాల ఎగుమతి విషయంలోనూ దురుద్దేశాలు ఆపాదించే ప్రయత్నం చేసింది. టీకా ఎగుమతులకు అనుమతించడం వెనుక భారత ప్రభుత్వం రాజకీయ, ఆర్థిక ప్రయోజనాలను ఆశిస్తోందని ఆరోపించింది.

తన ప్రతిష్ఠను, పరపతిని పెంచుకుంటూ చైనా టీకాలకు పోటీ రావడమే భారత్ అసలు లక్ష్యమంటూ తన అసూయను వెళ్లగక్కింది.
కరోనా వైరస్‌కు సంబంధించిన అంశాలు సహా టీకాల సామర్థ్యం, పనితీరు వంటి విషయాలలో చైనా కమ్యూనిస్ట్ ప్రభుత్వం పాటిస్తున్న అనవసర గోప్యతపై పలు సందేహాలు వ్యక్తమవుతున్న సంగతి తెలిసిందే.

మరోవైపు, ధనిక దేశాలు తమ స్వప్రయోజనాలకే ప్రాధాన్యతనిచ్చి డోస్‌లను నిల్వచేసుకోవడంతో మధ్య, అల్పాదాయ దేశాలు టీకా కోసం అల్లాడుతున్నాయి. ఈ నేపథ్యంలో టీకా ఎగుమతులకు భారత్ అంగీకరించడం.. బ్రెజిల్, నేపాల్, ఇరాన్ సహా పలు దేశాలు మనవైపు చూస్తున్నాయి. భారత్ టీకాలపై ఇవి ఆసక్తిని కనబరుస్తున్నాయి.

ప్రపంచానికి అవసరమైన టీకాల్లో 60 శాతం భారత్‌లోనే ఉత్పత్తి అవుతున్నాయని, మరో 15 రోజుల్లో వీటి ఎగుమతులను ప్రారంభించనుందని బీబీసీ గత మంగళవారం ప్రచురించిన నివేదికను కూడా గ్లోబల్ టైమ్స్ తన కథనంలో ప్రస్తావించింది. కొవాగ్జిన్ టీకాను తయారుచేసిన భారత్‌ బయోటెక్‌ను గతేడాది సందర్శించిన చైనా ప్రొఫెసర్ జియాంగ్ చున్‌లాయ్ అభిప్రాయాలను కూడా ఇందులో వివరించింది. టీకాల అభివృద్ధి, తయారీ విషయంలో భారత్ ప్రతిభాపాటవాలకు జియాంగ్ ముగ్ధుడయ్యారు. అలాగే, జనరిక్ ఔషధాలలో ఖ్యాతిగాంచినా, టీకాలపై పరిశోధన, అభివృద్ధిలో చైనా కంటే భారత్ వెనుకబడిలేదని అన్నారు.

‘ప్రపంచంలోనే అతి పెద్ద వ్యాక్సిన్ ఉత్పత్తిదారు సీరమ్ ఇన్‌స్టిట్యూట్ ఆఫ్ ఇండియా భారత్‌లో ఉంది. పరిణితి చెందిన ఉత్పత్తి, పంపిణీ సామర్థ్యం దీని సొంతం.. టీకా తయారీ సామర్థ్యం పాశ్చాత్య దేశాల కంటే ఎక్కువ.. కరోనా టీకా ఉత్పత్తికి ముందస్తుగానే ప్రపంచ ఆరోగ్య సంస్థ, జీఏవీఐ వంటి అంతర్జాతీ సంస్థలతో భారత్ అవగాహన ఒప్పందాలను చేసుకుంది’ అని అన్నారు.

‘టీకా తయారీలో పాశ్చాత్య ప్రామాణాలు పాటించడం కూడా భారత ఎగుమతులు పెరిగేందుకు దోహదపడ్డాయి.. జెనెరిక్ ఔషధాలు అంటే భారత్ పేరే ముందుగా గుర్తొచ్చినప్పటికీ, టీకా పరిశోధనల విషయంలో భారత్ చైనాకేం తీసిపోదు’ అని ఆయన వ్యాఖ్యానించారు. అయితే, దేశీయంగా అభివృద్ధిచేసిన టీకా క్లినికల్ ట్రయల్స్ ఫలితాలను వెల్లడించకపోవడంతో దాని సమర్ధత, ప్రభావశీలతపై సందేహాలు వ్యక్తమవుతున్నాయని పేర్కొన్నారు.

భారత్ అభివృద్ధి చేసిన వ్యాక్సిన్లను దిగుమతి చేసుకునే దేశాల డేటా, సమాచారం లేకపోవడంతో ప్రజల కోసం ప్రయివేట్ మార్కెట్‌లోకి త్వరగా విడుదల చేయకూడదు, కానీ అత్యవసర ఉపయోగం కోసం మాత్రమే దీనిని వర్తింపజేయవచ్చని చైనా అసోసియేషన్ ఫర్ వ్యాక్సిన్ అధికారి వ్యాఖ్యానించారు.

మరోవైపు..టీకాల ఎగుమతుల విషయంలో భారత్ తన తొలి ప్రాధాన్యాన్ని పొరుగు దైశాలైన బాంగ్లాదేశ్, నేపాల్ సహా సౌదీ అరేబియా, మొరాకోలకు ఇవ్వనుంది. దేశీయవసరాలకు తగినన్ని సిద్ధం చేసుకున్నాక పొరుగు దేశాలతో పాటూ ఇతరులకు టీకాను సరఫరా చేయనుంది. హైడ్రాక్సీక్లోరోక్విన్ ఎగుమతుల విషయంలోనూ భారత్ ఇదే వైఖరి అవలంబించింది.

‘అభివృద్ధి చెందుతున్న దేశాలకు, ముఖ్యంగా పొరుగు దేశాలకు వ్యాక్సిన్ల ఎగుమతి భారత్ తన ప్రతిష్ఠను పెంచుకునే లక్ష్యంలో భాగమని.. తన సొంత ప్రజలకు ఉచిత టీకాలు ఇచ్చే ఖర్చును తిరిగి పొందటానికి ఎగుమతి చేయాల్సిన అవసరం ఉంది’ అని షాంఘై ఇంటర్నేషనల్ స్టడీస్ ఇన్‌స్టిట్యూట్‌కు చెందిన సెంటర్ ఫర్ ఆసియా పసిఫిక్ స్టడీస్ డైరెక్టర్ జావ్ గాంచెంగ్ అన్నారు. ‘చైనా ఎప్పుడూ తనదైన వేగాన్ని నిర్దేశించుకుని, పోటీ చేసే ఉద్దేశం లేకపోయినా చైనాకు దీటుగా అంతర్జాతీయంగా ప్రభావితం చేయాలని భారత్ భావిస్తోంది’ అని జావ్ పేర్కొన్నారు.

LEAVE A REPLY

Please enter your comment!
Please enter your name here