ghulam nabi azad: రాజకీయ నేతగా పూర్తి సంతృప్తి.. ఇక ఏ పదవీ అక్కర్లేదు: ఆజాద్ సంచలన వ్యాఖ్యలు – don’t want to be mp, minister or hold party position says congress leader ghulam nabi azad

0
22


ప్రధానాంశాలు:

  • రాజకీయ భవిష్యత్తుపై ఆజాద్ సంచలన వ్యాఖ్యలు.
  • ఎంపీ, మంత్రి పదవులు అవసరం లేదన్న ఎంపీ.
  • దేశం కోసం సేవచేయడం సంతోషంగా ఉందన్న ఆజాద్.

రాజ్యసభ సభ్యుడిగా కాంగ్రెస్ సీనియర్ నేత గులామ్ నబీ ఆజాద్ పదవీకాలం మరో రెండు రోజుల్లో ముగియనుంది. ఆయనతోపాటు మరో నలుగురి సభ్యుల పదవీకాలం ముగియనుండగా… మంగళవారం రాజ్యసభలో వీడ్కోలుపై చర్చ జరిగిన విషయం తెలిసిందే. ఈ సందర్భంగా ఆజాద్‌ గురించి ప్రధాని నరేంద్ర మోదీ మాట్లాడుతూ భావోద్వేగానికి గురయ్యారు. ఇదిలా ఉండగా, తన రాజకీయ భవిష్యత్తుపై గులామ్ నబీ ఆజాద్ బుధవారం ఆసక్తికర వ్యాఖ్యలు చేశారు.

‘నేను ఇప్పుడు స్వేచ్ఛగా ఉంటాను కాబట్టి చాలా చోట్ల ప్రజలు నన్ను చూడగలుగుతారు.. ఎంపీగా, మంత్రిగా లేదా పార్టీలో ఏ పదవిని చేపట్టడానికి సముఖంగా లేను.. రాజకీయ నాయకుడిగా నా పని పట్ల పూర్తిగా సంతృప్తి చెందాను’ అని వ్యాఖ్యానించారు.

‘1975లో జమ్మూ కశ్మీర్‌ రాష్ట్ర యువజన కాంగ్రెస్ అధ్యక్షుడిగా మొదలుపెట్టి.. కాంగ్రెస్ పార్టీలో అనేక బాధ్యతలు నిర్వర్తించాను.. చాలా మంది ప్రధానులతో కలిసి పనిచేశాను.. దేశం కోసం పనిచేయడం అదృష్టంగా భావిస్తాను.. నిజాయితీగా నా విధులను నిర్వర్తించగలిగానని సంతోషంగా ఉన్నాను.. దేశం, ప్రపంచాన్ని అవగాహన చేసుకోడానికి నాకు అవకాశం దక్కింది’ అని ఆజాద్ అన్నారు.

‘రాజకీయ నేతగా నా పనితీరు పట్ల సంతృప్తి చెందాను.. నా ప్రాణమున్నంత వరకు ప్రజా సేవలో కొనసాగుతానని నమ్ముతున్నా’ అని ఆజాద్ భావోద్వేగానికి గురయ్యారు. రాజ్యసభలో వీడ్కోలు చర్చ సందర్భంగా ప్రధాని సహా పలువురు నేతల నుంచి అందిన ప్రశంసలు, గౌరవంపై కూడా ఆజాద్ స్పందించారు.

‘మనం కొంతమందిని లోతుగా అర్థం చేసుకుంటాం.. మరికొందరు మనల్ని లోతుగా అర్థం చేసుకుంటారు.. నన్ను లోతుగా అర్థం చేసుకుని, అనేక ఏళ్లుగా నా పనితీరు చూసిన వారు నిన్న ఉద్వేగానికి గురయ్యారు. వారందరికీ కృతజ్ఞతలు.. ట్విట్టర్, ఫోన్ ద్వారా సందేశం పంపిన వ్యక్తులకు కూడా కృతజ్ఞతలు తెలియజేస్తున్నాను’ అని పేర్కొన్నారు.

‘రాష్ట్రపతి, ప్రధానితోపాటు ఇతర పార్టీలకు చెందిన సహచరులు నాపై అభిమానం కురిపించారు.. వారితో కలిసి పనిచేసే అవకాశం నాకు దక్కింది.. నాకు శుభకాంక్షలు అందజేసిన ప్రతి ఒక్కరికీ ధన్యవాదాలు’ అని అన్నారు. కాంగ్రెస్ పార్టీకి జాతీయ అధ్యక్షుడిగా అవకాశం వస్తే ఏం చేస్తారన్న ప్రశ్నకు ఆసక్తికర సమాధానం ఇచ్చారు. ‘పార్టీ ఏ బాధ్యతలు అప్పగించినా నిర్వర్తించడానికి సిద్ధం.. పార్టీని బలోపేతం చేయడం కోసమే నా పోరాటం తప్పా వ్యక్తిగతం లేదా ఎవరికీ వ్యతిరేకం కాదు’ అన్నారు.

LEAVE A REPLY

Please enter your comment!
Please enter your name here