farmers protest Delhi: సాగు చట్టాలపై కేంద్ర వైఖరిలో మార్పునకు కారణం అన్నా హజారేనా? – centre will appoint panel to look into farmers’ issues, anna hazare’s suggestions

0
24


ప్రధానాంశాలు:

  • కేంద్ర ప్రతినిధుల హామీతో దీక్షపై వెనక్కు తగ్గిన హజారే.
  • రైతు సమస్యలపై చర్చించడానికి కేంద్రం కమిటీ.
  • రైతులతో చర్చలకు ఇప్పటికీ సిద్ధంగా ఉన్నామన్న మోదీ.

కొత్త సాగు చట్టాలకు వ్యతిరేకంగా రైతులు చేపట్టిన ఆందోళనలు కొనసాగుతోంది. రైతుల ఉద్యమానికి మద్దతుగా ప్రముఖ సామాజిక కార్యకర్త అన్నా హజారే కూడా దీక్ష చేపడతానని ప్రకటించారు. ఈ నేపథ్యంలో కనీస మద్దతు ధర సహా రైతులకు సంబంధించిన అనేక అంశాలను పరిష్కరించేందుకు కేంద్రం ఉన్నతస్థాయి కమిటీని ఏర్పాటుచేయాలని నిర్ణయించింది. కేంద్ర వ్యవసాయ మంత్రి నరేంద్ర సింగ్ తోమర్ అధ్యక్షతన కమిటీ వేయనుంది. అన్నా హజారే దీక్షలో కూర్చోవడానికి సిద్ధమైన వేళ కేంద్రం రంగంలోకి దిగింది.

వాస్తవానికి శనివారం నుంచి తాను దీక్ష చేపట్టనున్నట్టు అన్నా హజారే ప్రకటించారు. కానీ, అనూహ్యంగా ఆయన తన దీక్షను వాయిదా వేశారు. దీని వెనుక కేంద్రం ప్రభుత్వం ఆయనతో జరిపిన మంతనాలే కారణం. రాలేగావ్ సిద్ధిలోని హాజారే వద్దకు కేంద్ర వ్యవసాయ శాఖ సహాయ మంత్రి కైలాష్ చౌదురి, మహారాష్ట్ర మాజీ ముఖ్యమంత్రి దేవేందర్ ఫడ్నవీస్‌ను దూతలుగా పంపింది.

కేంద్ర వ్యవసాయ శాఖ వర్గాల ప్రకారం నీతి ఆయోగ్ సభ్యుడు రమేశ్ చంద్, కేంద్ర సహాయ మంత్రి పురుషోత్తమ్ రూపాలా, అగ్రీ ట్రేడ్ న్యాయ నిపుణుడు విజయ్ సర్దానా, పద్మశ్రీ గ్రహీత హరియాణా రైతు కన్వాల్ సింగ్ చౌహన్‌, రైతుల ప్రతినిధులు ఇందులో సభ్యులుగా ఉంటారు. వ్యవసాయ చట్టాల రద్దు కోసం రైతులు చేస్తున్న ఆందోళన నేపథ్యంలో హజారే ఇటీవల ప్రధానమంత్రి నరేంద్ర మోదీకి లేఖ రాశారు. రైతు సమస్యలపై నెలాఖరు నుంచి నిరాహార దీక్ష ప్రారంభించబోతున్నట్లు పేర్కొన్నారు.

నూతన వ్యవసాయ చట్టాలు ప్రజాస్వామ్య విలువలకు లోబడి లేవని విమర్శించిన ఆయన, చట్టాల రూపకల్పనలో ప్రజలను భాగస్వాములను చేయాలని డిమాండ్ చేశారు. తన జీవితంలో చివరి నిరాహార దీక్షను రైతుల కోసమే చేయబోతున్నట్లు స్పష్టం చేశారు. కాగా, సాగు చట్టాల రద్దు కోసం ఉద్యమిస్తున్న రైతులతో చర్చలకు కేంద్ర ప్రభుత్వం సిద్ధంగానే ఉందని శనివారం నిర్వహించిన అఖిలపక్షం సమావేశంలో ప్రధాని మోదీ తెలిపారు. 11వ విడత చర్చల్లో రైతు నేతల ముందుంచిన ప్రతిపాదనకు తమ సర్కారు కట్టుబడే ఉందని స్పష్టం చేశారు. రైతులతో సంప్రదింపులకు ఫోన్‌ కాల్‌ దూరంలోనే ఉన్నామని పేర్కొన్నారు.

LEAVE A REPLY

Please enter your comment!
Please enter your name here