farmers protest: రైతుల ఆందోళనపై సెలబ్రిటీల ట్వీట్లు.. తీవ్రంగా స్పందించిన భారత్ – mea responded about foreign celebrities tweets on farmers protest

0
22


ప్రధానాంశాలు:

  • రైతులకు మద్దతు తెలిపిన కమలా హ్యారిస్ మేనకోడలు.
  • సెలబ్రిటీల ట్వీట్లతో భగ్గుమన్న కేంద్ర ప్రభుత్వం.
  • వాస్తవాలను తెలుసుకోవాలంటూ చురకలు.

కొత్త‌ సాగు చట్టాలను ర‌ద్దు చేయాల్సిందేనంటూ గత 70 రోజులుగా ఢిల్లీ సరిహద్దుల్లో రైతులు చేస్తున్న ఉద్యమానికి అంతర్జాతీయంగా పలువురు సంఘీభావం తెలుపుతున్నారు. తాజాగా, ప్రముఖ పర్యావరణ పరిరక్షణ ఉద్యమకారిణి, స్వీడన్ బాలిక గ్రేటా థ‌న్‌బ‌ర్గ్, హాలీవుడ్‌ పాప్‌ స్టార్‌ రిహన్నా కూడా స్పందించారు. ఉద్య‌మం చేస్తోన్న‌ భారత్‌లోని రైతులకు సంఘీభావం తెలుపుతున్నామంటూ గ్రెటా థన్‌బర్గ్ ట్వీట్ చేస్తూ ఓ పత్రికలో వచ్చిన కథనాన్ని పోస్ట్ చేశారు.

ప్రముఖ పాప్‌ సింగర్‌ రిహన్నా స్పందిస్తూ… మనమెందుకు దీని గురించి మాట్లాడటం లేదు? అని ప్ర‌శ్నించారు. ఓ వెబ్ ప‌త్రిక‌లో వ‌చ్చిన వార్త‌ను షేర్ చేసి, ఆమె చేసిన ట్వీట్ ట్విటర్‌లో చాలాసేపు ట్రెండ్ అయింది. రిహన్నాకు 10 కోట్ల మంది ఫాలోవర్లు ఉండగా.. ఈ ట్వీట్‌కు కొద్ది సేపట్లోనే ఐదు లక్షలకుపైగా లైక్‌లు వచ్చాయి. అలాగే, అమెరికా ఉపాధ్యక్షురాలు కమలా హ్యారిస్ మేనకోడలు మీనా హారిస్‌ కూడా రైతులకు మద్దతు తెలుపుతున్న‌ట్లు ప్ర‌క‌టించారు.

ఇదిలా ఉండగా అంతర్జాతీయ సెలబ్రిటీలు చేసిన ట్వీట్లపై భారత్ తీవ్రంగా మండిపడింది. వాటికి ఏమాత్రం కచ్చితత్వం లేదని, అవి బాధ్యతారాహిత్యమైన ట్వీట్లని ఈ మేరకు విదేశాంగ శాఖ బుధవారం ఓ ప్రకటన విడుదల చేసింది. ‘సంచలనాలకు మొగ్గు చూపే వ్యక్తులే ఇలా చేస్తున్నారు.. ఆ ట్వీట్లకు ఏమాత్రం కచ్చితత్వం లేదు.. బాధ్యతారాహిత్యం. భారత్‌కు వ్యతిరేకంగా అంతర్జాతీయ మద్దతును కూడగట్టడానికి కొన్ని శక్తులు ప్రయత్నిస్తున్నాయి.. అలాంటి శక్తులే ప్రపంచంలోని కొన్ని ప్రాంతాల్లో గాంధీ విగ్రహాలను ధ్వంసం చేశాయి.. ఇలాంటి వారి ట్వీట్లతో దేశం చాలా బాధపడింది.’అని విదేశాంగ శాఖ పేర్కొంది.

వ్యవసాయ చట్టాలను వ్యతిరేకిస్తూ కొన్ని సమూహాలకు చెందిన రైతులు, కొన్ని ప్రాంతాల్లో మాత్రమే ఆందోళన చేస్తున్నారని పేర్కొంది. ఈ నిరసనలను దేశ ప్రజాస్వామ్య నీతి, రాజకీయ కోణంలో మాత్రమే చూడాలని తాము కోరుతున్నామని తెలిపింది. ఈ ప్రతిష్టంభనను తొలగించడానికి అటు ప్రభుత్వం, ఇటు రైతులు ప్రయత్నం చేస్తున్నాయని విదేశాంగ శాఖ స్పష్టం చేసింది. వివిధ వర్గాలు, పార్లమెంట్‌లో విస్తృతంగా చర్చించిన తర్వాతే వాటిని చట్టంగా తీసుకొచ్చినట్టు ప్రకటించింది. కొత్త చట్టాలతో రైతులకు ప్రయోజనం ఉంటుందని ఈ సందర్భంగా విదేశాంగ శాఖ పునరుద్ఘాటించింది.

LEAVE A REPLY

Please enter your comment!
Please enter your name here