farmers protest: చట్టాల్లో ‘నలుపు’ఏముంది.. ఆ ఒక్క రాష్ట్రంలోనే రైతులను రెచ్చగొడుతున్నారు: కేంద్రం సంచలన ప్రకటన – minister narendra singh thomar sensational comments on farmers protest in parliament

0
25


బడ్జెట్ సమావేశాల ప్రారంభం సందర్భంగా ఉభయ సభలను ఉద్దేశించి రాష్ట్రపతి రామ్‌నాథ్ కోవింద్ ప్రసంగానికి ధన్యవాద తీర్మానంపై శుక్రవారం రాజ్యసభలో చర్చ జరిగింది. ఈ సందర్భంగా కేంద్ర వ్యవసాయ మంత్రి నరేంద్ర సింగ్ తోమర్ మాట్లాడుతూ.. ప్రతిపక్షాలు లేవనెత్తిన రైతుల ఆందోళనలపై ప్రసంగించారు. వ్యవసాయ చట్టాల్లో సవరణలకు ప్రభుత్వం సిద్ధంగా ఉందని కేంద్ర మంత్రి పునరుద్ఘాటించారు. కేవలం ఒక్క రాష్ట్రంలోని రైతులే వీటిని వ్యతిరేకిస్తున్నారని, ముఖ్యంగా పంజాబ్‌లో ప్రజలకు తప్పుడు సమాచారం చేరవేస్తున్నారని విపక్షాలపై విమర్శలు గుప్పించారు.

‘మూడు కొత్త చట్టాల్లో ఒక్క లోపం కూడా రైతులు, విపక్షాలు వివరించడంలో విఫలమయ్యాయి… మేము ప్రతిష్ఠకు పోవడంలేదు..‘నల్ల’చట్టాలు అంటూ రైతు సంఘాలు, విపక్షాలు ఆరోపిస్తున్నాయి… అయితే వీటిలో నలుపు ఏముందని గత కొన్ని నెలలుగా రైతు సంఘాల ప్రతినిధులను నేను అడుగుతున్నాను. అదేంటో చెబితే నేను వాటిని సరిచేస్తాను’ అని తోమర్‌ స్పష్టం చేశారు.

కొత్త చట్టాలు అమల్లోకి వస్తే రైతుల భూములు లాక్కుంటారంటూ కొందరు తప్పుదోవ పట్టిస్తున్నారని, వారిని కావాలనే రెచ్చగొడుతున్నారని మంత్రి ధ్వజమెత్తారు. ఒప్పంద వ్యవసాయ చట్టం ద్వారా రైతుల భూములు దోపిడీకి గురవుతాయని చెప్పేలా ఒక్క నిబంధన అయినా ఉందా? అని ప్రశ్నించారు.

రైతుల శ్రేయస్సు కోసం తమ ప్రభుత్వం అనేక పథకాలను తీసుకొచ్చిందని.. పంటలకు ఉత్పత్తి ఖర్చుల కంటే కనీసం 50శాతం ఎక్కువ కనీస మద్దతు ధర కల్పిస్తున్నామని స్పష్టం చేశారు. బడ్జెట్‌లో ఆత్మనిర్భర్‌ ప్యాకేజీ కింద వ్యవసాయ మౌలిక అవసరాల కోసం రూ.లక్ష కోట్ల కేటాయించిన విషయాన్ని గుర్తుచేశారు. వ్యవసాయ రంగంలో పెట్టుబడుల పెరిగేలా ప్రభుత్వం చర్యలు చేపడుతోందని చెప్పారు.

మరోవైపు, కేంద్రం వైఖరిపై విపక్షాలు ఎదురుదాడి చేశాయి. రైతుల పట్ల కేంద్రం నిర్దాక్షిణ్యంగా వ్యవహరిస్తోందని, సరిహద్దుల్లో ఇనుప కంచెలు, సిమెంట్ గోడలను అడ్డంగా ఉంచి ఉద్యమకారులపై ఉక్కుపాదం మోపుతోంని దుయ్యబట్టాయి.

LEAVE A REPLY

Please enter your comment!
Please enter your name here