farmers protest: ఇక చర్చల్లేవ్.. మూసుకుపోయిన దారులు! – govt talks with farmers hit roadblock in 11th round of meeting

0
27


రైతులు, కేంద్ర ప్రభుత్వం మధ్య సంప్రదింపులకు సంబంధించిన దారులు మూసుకుపోయాయి. పరిస్థితి మళ్లీ మొదటికొచ్చింది. ఏకాభిప్రాయానికి రావడంలో ఇరుపక్షాలు విఫలం చెందాయి. వ్యవసాయ చట్టాలను రద్దు చేయాల్సిందేనని రైతు సంఘాల నేతలు పట్టబట్టారు. కనీస మద్దతు ధరకు చట్టబద్ధత కల్పించాలని డిమాండ్ చేశారు. మరోవైపు.. ప్రభుత్వం చేసిన ప్రతిపాదనను పరిశీలించాలని కేంద్ర మంత్రులు మరోసారి స్పష్టం చేశారు. అంతకంటే ఉత్తమమైన మార్గంలేదని తేల్చి చెప్పారు. దీంతో చర్చలు మరోసారి అసంపూర్తిగానే ముగిశాయి.

అసలు మళ్లీ చర్చలు జరుగుతాయా? లేదా? అనే అంశంపై సందిగ్ధత నెలకొంది. ఇక చర్చలు ఉండవనే కేంద్రం సంకేతాలు ఇచ్చిందని రైతు సంఘాల నేతలు ఆరోపించారు. సమావేశం అనంతరం వారు మీడియాతో మాట్లాడారు. భవిష్యత్ కార్యాచరణపై చర్చించి నిర్ణయం తీసుకుంటామన్నారు.

ఢిల్లీలోని విజ్ఞాన్ భవన్‌లో శుక్రవారం (జనవరి 22) మధ్యాహ్నం రైతు సంఘాల ప్రతినిధులతో కేంద్ర మంత్రులు నరేంద్ర సింగ్‌ తోమర్‌, పీయూష్‌ గోయల్‌ 11వ విడత చర్చల్లో పాల్గొన్నారు. ఈ సమావేశంలో రైతుల వ్యవహార శైలిపై కేంద్ర మంత్రులు అసంతృప్తి వ్యక్తంచేశారు. వ్యవసాయ చట్టాలను ఏడాదిన్నరపాటు తాత్కాలికంగా నిలిపివేస్తామంటూ తాము చేసిన ప్రతిపాదనపై సమావేశంలో అభిప్రాయం చెప్పకుండా, మీడియాకు చెప్పడమేంటని నరేంద్ర సింగ్ తోమర్ ఆగ్రహం వ్యక్తం చేశారు. సమావేశం ప్రారంభం కాగానే ఈ అంశంపై నిలదీశారు.

చట్టాల్లో ఎలాంటి లోపం లేకపోయినా ప్రతిపాదనలు చేశామన్న వ్యవసాయ మంత్రి తోమర్‌ స్పష్టం చేశారు. 18 నెలల పాటు ఈ చట్టాలను ప్రతిష్టంబింపజేసే ప్రతిపాదనను మించింది ఏదీ తమవద్ద లేదన్నారు. దీనిపై రైతులే నిర్ణయం తీసుకోవాలని సూచించారు. రైతులు తమ నిర్ణయం చెబితే మళ్లీ చర్చించేందుకు సిద్ధమని తెలిపారు.

తొలుత జరిగిన సమావేశం 10 నిమిషాలకు మించి జరగలేదని రైతు సంఘాల ప్రతినిధులు తెలిపారు. అనంతరం రెండు గంటల వ్యవధి తర్వాత మళ్లీ చర్చలు ప్రారంభమయ్యాయని చెప్పారు. కేంద్రం మొండిగా వ్యవహరిస్తోందని ఆరోపించారు. ఇక చర్చలు కొనసాగుతాయని కూడా తాము భావించడంలేదన్నారు.

గణతంత్ర దినోత్సవం రోజున తలపెట్టిన ర్యాలీ కోసం పోలీసులతో సంప్రదింపులు చేస్తున్నామని రైతు సంఘాల నేతలు తెలిపారు. ఆ రోజు శాంతియుతంగా పరేడ్‌ నిర్వహిస్తామని చెప్పారు. జనవరి 26 తర్వాత ఎలాంటి కార్యాచరణ చేపట్టాలనే అంశంపై చర్చించి నిర్ణయం తీసుకుంటామని తెలిపారు.

LEAVE A REPLY

Please enter your comment!
Please enter your name here