Driverless Metro train: Delhi: డ్రైవర్ రహిత మెట్రో రైలు ప్రారంభం.. దేశం మరో ఘనత, ప్రత్యేకతలివే – pm narendra modi inaugurates india’s first-ever driverless train operations on delhi metro magenta line

దేశంలో మెట్రో రైలు వ్యవస్థ అరుదైన ఘనత సాధించింది. దేశంలోనే తొలి డ్రైవర్‌ రహిత మెట్రో రైలు ప్రారంభమైంది. ఈ అత్యాధునిక సాంకేతిక పరిజ్ఞానంతో భారత్ మరోసారి అగ్ర రాజ్యాల సరసన నిలిచింది. ఢిల్లీ మెట్రో రైలు వ్యవస్థలో భాగంగా ఈ డ్రైవర్ లేని రైలును ప్రారంభించారు. పశ్చిమ జనక్‌పురి – బొటానికల్‌ గార్డెన్‌ మధ్య 37 కి.మీ. పొడవున్న మెజంటా లైన్‌లో డ్రైవర్ రహిత మెట్రో రైలును ప్రధాని నరేంద్ర మోదీ సోమవారం (డిసెంబర్ 28) ప్రారంభించారు.

విర్చువల్ ద్వారా జరిగిన ఈ కార్యక్రమంలో రైలును ప్రారంభించిన అనంతరం ప్రధాని మోదీ ప్రసంగించారు. స్మార్ట్ వ్యవస్థపై భారత్ ఎంత వేగంగా అభివృద్ధి చెందుతుందో ఈ రైలు ప్రారంభమే తెలియజేస్తోందని పేర్కొన్నారు. పట్టణీకరణను సులభతర జీవన విధానానికి ఒక అవకాశంగా పరిగణించాలని అన్నారు.

ఢిల్లీ వాసులకు డ్రైవర్ రహిత మెట్రో రైలు సేవలు నేటి నుంచే అందుబాటులోకి వచ్చాయి. ‘అధునిక సాంకేతిక పరిజ్ఞానం ద్వారా నడిచే మెరుగైన రవాణా వ్యవస్థకు సంబంధించిన నవ శకానికి ఇది ఆరంభం’ అని ఢిల్లీ మెట్రో రైల్‌ కార్పొరేషన్‌ (DMRC) పేర్కొంది. మజ్లిస్‌ పార్క్‌ – శివ్‌ విహార్‌ మధ్య 57 కి.మీ. పొడవైన పింక్‌ లైన్‌ మార్గంలోనూ డ్రైవర్ రహిత మెట్రో రైలు సేవలను అందుబాటులోకి తీసుకురానున్నట్లు తెలిపింది. 2021 జూన్ నాటికి ఈ సేవలు అందుబాటులోకి వచ్చే అవకాశం ఉందని వెల్లడించింది.

ఆ కొత్త లైన్ కూడా ఢిల్లీ మెట్రోలో మొత్తం 94 కిలోమీటర్ల మేర డ్రైవర్‌ రహిత రైలు సేవలు అందుబాటులోకి వచ్చినట్లు అవుతుంది. అప్పుడు ప్రపంచంలో డ్రైవర్‌ రహిత మెట్రో మార్గంలో 9 శాతం మార్గం కలిగి ఉన్న దేశంగా భారత్ నిలుస్తుందని డీఎంఆర్‌సీ తెలిపింది.

‘స్మార్ట్ విధానంపై ఇండియా ఎంత వేగంగా అభివృద్ధి చెందుతుందో ఈ రైలు ప్రారంభం తెలుపుతోంది. నేషనల్ కామన్‌ మొబిలిటీ కార్డ్ (NCMC) ద్వారా ఢిల్లీ మెట్రో అనుసంధానం అయింది. కొన్నేళ్ల కిందటి వరకు స్మార్ట్ వ్యవస్థపై అంతగా దృష్టి పెట్టలేదు. అప్పట్లో నిరాసక్త వాతావరణం ఉండేది. పట్టణీకరణ, సాంకేతిక అభివృద్ధి విషయంలో చాలా తేడా కనిపించేది. మా ప్రభుత్వం ఆ పరిస్థితిని పూర్తిగా మార్చింది’ అని ప్రధాని మోదీ పేర్కొన్నారు.