delhi garbage collectors: చెత్త తీసుకెళ్తారా.. ఎంత స్వీట్ వాయిస్! – delhi garbage collectors win hearts with sweet singing, anand mahindra wants to help them get music training

0
25


సోషల్ మీడియాలో ఇంట్రెస్టింగ్ వీడియోలు షేర్ చేసే ప్రముఖ పారిశ్రామికవేత్త ఆనంద్ మహీంద్రా ఈసారి మనసును హత్తుకునే విషయాన్ని నెటిజన్లతో పంచుకున్నారు. ఆయన షేర్ చేసిన రెండు వేర్వేరు వీడియోల్లో ఇద్దరు వ్యక్తులు తమ వాయిస్‌తో మెస్మరైజ్ చేశారు. ఆశ్చర్యకరమైన విషయం ఏమిటంటే వారిద్దరూ చెత్త సేకరిస్తూ జీవనం సాగిస్తున్నారు. ఆ మట్టిలో మాణిక్యాలను ప్రపంచానికి పరిచయం చేసిన ఆనంద్ మహీంద్రా.. ఎప్పటిలాగే తన మంచి మనసును చాటుకున్నారు. వారికి అండగా నిలిచేందుకు ముందుకొచ్చారు.

హఫీజ్, హబిబుర్.. ఢిల్లీలోని న్యూ ఫ్రెండ్స్ కాలనీలో వీళ్లిద్దరూ క్రమం తప్పకుండా ఇళ్ల నుంచి చెత్త సేకరించి తీసుకెళ్తారు. నిబద్ధతతో తమ విధులు నిర్వహిస్తారు. ఆ పనిలో ఆటవిడుపుగా పాటలు పాడుతుంటారు. అలా తమ కష్టాన్ని మరిచిపోతుంటారు. కాలనీ వాసులను వారి పాటలు మైమరపింపజేస్తాయి.

స్థానికులు కొందరు వారి పాటలను వీడియోలు తీసి సోషల్ మీడియాలో షేర్ చేశారు. దీంతో ఆ వీడియోలు వైరల్‌గా మారాయి. అలా ఆనంద్ మహీంద్రా స్నేహితుడు రోహిత్ ఖట్టర్ కంటపడ్డాయి. ఆయనే వెంటనే వాటిని ఆనంద్ మహీంద్రాకు షేర్ చేశారు. ఆనంద్ మహీంద్రా వాటిని ప్రపంచానికి పరిచయం చేశారు.

వారి గళానికి ప్రకృతి కూడా పరవశించింది..!
వారిలో ఒకరు ఆ పాతమధురం 1969లో విడుదలైన అన్‌మోల్ మోతీ చిత్రంలోని ‘హే జాన్.. ఈ చమాన్’ పాటతో అలరిస్తే.. మరొకరు షారుక్ ఖాన్ సూపర్ హిట్ సాంగ్‌ ‘సాజ్దా’ (మై నేమ్ ఈజ్ ఖాన్, 2010)తో ఆకట్టుకున్నారు. ఆ పేదింటి యువకులు మ్యూజిక్ లేకుండానే తమ గళాన్ని వినిపిస్తున్నారనుకున్నాయేమో.. వారి వెనకాల ఉన్న చెట్లపై పక్షులు తమ కిలాకిలా రావాలతో, ఉడుతలు తమ చిందులతో వీడియోలకు మరింత వన్నె తెచ్చాయి.

‘ఇన్‌క్రెడిబుల్ ఇండియా. ప్రతిభకు హద్దులు లేవు. అది ఎక్కడి నుంచైనా పుడుతుంది. దానికి ఇదే ఉదాహరణ. పాడటంలో వీరికి ఎలాంటి శిక్షణా లేదు. అయినప్పటికీ ఎంతో చక్కగా పాటలు పాడుతున్నారు. నా మిత్రుడు రోహిత్ ఖట్టర్ ఈ వీడియోలను షేర్ చేశాడు’ అని ఆనంద్ మహీంద్రా ట్వీట్ చేశారు.

ఆ అన్నదమ్ములకు సంగీతంలో శిక్షణ ఇప్పేంచేందుకు టీచర్లు ఎవరైనా ఉంటే.. తమకు తెలపాలని ఆనంద్ మహీంద్రా తన అభిమానులు, ఫాలోవర్లను కోరారు. ‘వారి ప్రతిభ అసాధారణం. వారికి మ్యూజిక్‌లో శిక్షణ ఇప్పించాలని నేను, రోహిత్‌ అనుకుంటున్నాం. వారికి సాయంత్రం పూట మ్యూజిక్‌ నేర్పించే టీచర్లు ఢిల్లీలో ఎవరైనా ఉంటే చెప్పండి. ఎందుకంటే వాళ్లు ఉదయమంతా పనిలో ఉంటారు’ అని ఆనంద్ మహీంద్రా రాసుకొచ్చారు.

‘వావ్.. నిజమే సార్.. వారి గళంలో ఏదో తెలియని మాధుర్యం ఉంది. వారికి మీరు సాయం చేయడానికి ముందుకురావడం పట్ల నాకు ఆనందంగానూ, గర్వకారణంగానూ ఉంది’ అని ఓ నెటిజన్ ట్వీట్ చేశారు. ‘చాలా సహజసిద్ధమైన వాయిస్.. హిడెన్ టాలెంట్ ఆఫ్ హిందుస్థాన్’ అంటూ మరో యూజర్ కామెంట్ పెట్టారు. వారి పాటలను మీరూ వినండి మరి.

LEAVE A REPLY

Please enter your comment!
Please enter your name here