cow urine phenyl: ఆఫీసులను శుభ్రం చేయడానికి గో మూత్రం ఫినాయిలే‌ వాడాలి: ఎంపీ సర్కారు ఆదేశాలు! – madhya pradesh govt an order to offices to be cleaned with cow urine phenyl only

0
21


ప్రధానాంశాలు:

  • గో సంరక్షణపై మధ్యప్రదేశ్ మరో కీలక నిర్ణయం.
  • గో మూత్రం ఫినాయిల్‌ను వాడాలని ఆదేశాలు.
  • గతంలోనే కౌ క్యాబినెట్ నిర్వహించిన చౌహన్ సర్కారు.

గో సంరక్షణకు అత్యంత ప్రాధాన్యత ఇస్తున్న బీజేపీ పాలిత రాష్ట్రాల్లోని ప్రభుత్వాలు.. గో ఉత్పత్తులను కూడా ప్రమోట్ చేస్తున్నాయి. తాజాగా, మధ్యప్రదేశ్ ప్రభుత్వం గోమూత్రంపై సంచలన నిర్ణయం తీసుకుంది. అన్ని ప్రభుత్వ కార్యాలయాలలో గోమూత్రంతో తయారుచేసిన ఫినాయిల్‌ను ఉపయోగించాలని ఆదేశాలు జారీచేసింది. దీంతో మధ్యప్రదేశ్ రాజకీయాల్లో ఒక నినాదంగా మారిన గోసేవ మళ్లీ మారుమోగుతోంది. దేశంలోనే తొలిసారి నవంబరులో కౌ క్యాబినెట్‌కు రూపకల్పన చేసిన చౌహన్ ప్రభుత్వం.. ఇప్పుడు అన్ని ప్రభుత్వ కార్యాలయాలను గోమూత్రం ఫినాయిల్‌తో శుద్ధి చేయాలని ఆదేశాలు జారీ చేయడం గమనార్హం.

తాజాగా ఉత్తర్వులతో రాష్ట్రంలోని పంచాయితీ ఆఫీస్ మొదలుకొని, వివిధ మంత్రిత్వశాఖల కార్యాలయాల వరకూ అన్నింటినీ గోమూత్రం ఫినాయిల్‌తో శుభ్రం చేయనున్నారు. పశుసంవర్ధక శాఖ మంత్రి ప్రేమ్ సింగ్ పటేల్ మాట్లాడుతూ.. గో మూత్రం ప్లాంట్ ఏర్పాటును ప్రోత్సహించడానికి, ఫినాయిల్ పరిశ్రమలను స్థాపించడానికి ఈ నిర్ణయం తీసుకున్నట్టు తెలిపారు. ‘మేము ఉత్పత్తికి ముందు డిమాండ్‌ను కల్పిస్తాం.. అప్పుడు పాలివ్వని ఆవులను వదిలిపెట్టరు. దీని వల్ల మధ్యప్రదేశ్‌లో ఆవుల పరిస్థితి మెరుగుపడుతుంది’ అని వ్యాఖ్యానించారు.

కాగా, మధ్యప్రదేశ్ మంత్రి ఇందర్‌సింగ్ పర్మార్ తన ఇంటిలో గోమూత్రంతో తయారుచేసిన ‘గోనిల్’ను వినియోగిస్తున్నారు. ఈ సందర్భంగా ఆయన మాట్లాడుతూ ఆత్మనిర్భర్ భారత్, ఆత్మనిర్భర్ మధ్యప్రదేశ్‌ రూపకల్పనలో గో సేవ ఒక భాగమని వ్యాఖ్యానించారు. కొద్ది రోజుల కిందట మధ్యప్రదేశ్ ప్రభుత్వం రాష్ట్రంలో వెయ్యి గోశాలలను ఏర్పాటు చేయనున్నట్లు ప్రకటించింది.

అయితే, ప్రభుత్వ నిర్ణయంపై కాంగ్రెస్ నేతలు విమర్శలు గుప్పించారు. ప్రయివేట్ కంపెనీలను ప్రోత్సహించడానికి ప్రభుత్వం ఈ నిర్ణయం తీసుకుందని ఆరోపిస్తున్నారు. కాంగ్రెస్ ఎమ్మెల్యే కునాల్ చౌదరి మాట్లాడుతూ.. ఎటువంటి మౌలిక వసతులు లేకుండా ప్రభుత్వం ఇటువంటి నిర్ణయం తీసుకుంది.. ఒకవేళ నిజంగా గో ఉత్పత్తులను ప్రోత్సహించడం ద్వారా దారితప్పిన గోవుల పరిస్థితిని మెరుగుపరచాలనుకుంటే రాష్ట్రంలో కొన్ని పరిశ్రమలను ఏర్పాటుచేయాలి.. కానీ, ఉత్తరాఖండ్‌లోని ఓ ప్రయివేట్ కంపెనీకి లబ్ది చేకూర్చడానికే గోమూత్రంతో తయారుచేసే ఫినాయిల్ వాడాలని నిర్ణయించింది’ అని దుయ్యబట్టారు.

కాంగ్రెస్ విమర్శలను బీజేపీ తిప్పికొట్టింది. ‘ఇది కాంగ్రెస్ నేతల అస్పష్టమైన ఆలోచనకు నిదర్శనం.. ఎటువంటి డిమాండ్ లేకుండా ఏ ఒక్కరైనా ఎందుకు పరిశ్రమ ఏర్పాటుచేస్తారు.. రాష్ట్ర ప్రభుత్వం మంచి నిర్ణయం తీసుకుంది.. దీనిని మిగతా రాష్ట్రాలు అనుసరిస్తాయి’ అని బీజేపీ అధికారప్రతినిధి రాహుల్ కొఠారీ అన్నారు.

LEAVE A REPLY

Please enter your comment!
Please enter your name here