Covid Second Wave in India: ఆ రాష్ట్రాల్లో అనూహ్యంగా పెరిగిన కరోనా కేసులు.. దేశంలో సెకెండ్ వేవ్? – india on brink of second coronavirus wave? at least 4 states witness fresh surge

0
15


ప్రధానాంశాలు:

  • కరోనా వైరస్ రెండో దశ మొదలైనట్టు సంకేతాలు.
  • నాలుగు రాష్ట్రాల్లో పెరుగుతున్న కేసులు.
  • మరోసారి లాక్‌డౌన్ దిశగా ముంబయి నగరం.

దేశంలో మరోసారి రోజువారీ కరోనా వైరస్ కేసులు పెరగడం కలవరానికి గురిచేస్తోంది. ముఖ్యంగా పంజాబ్, మహారాష్ట్ర, కేరళ, మధ్యప్రదేశ్‌లో పాజిటివ్ కేసుల్లో భారీ పెరుగుదల నమోదయ్యింది. మహారాష్ట్రలో కొత్త వేరియంట్స్‌ను గుర్తించడంతో వీటి ద్వారా వైరస్ వ్యాప్తి వేగంగా జరుగుతున్నట్టు భావిస్తున్నారు. విదర్భ రీజియన్, ముంబయిలో కొత్త వేరియంట్ బయటపడటంతో అధికారులు అప్రమత్తమయ్యారు. వారాంతపు లాక్‌డౌన్‌లు, కొత్తగా నిబంధనలు అమల్లోకి వచ్చాయి.

దేశంలో 27 రోజుల తర్వాత శుక్రవారం పాజిటివ్ కేసులు పెద్ద సంఖ్యలో నిర్ధారణ అయ్యాయి. దేశవ్యాప్తంగా 14 వేల కేసులు బయటపడగా.. 101 మంది ప్రాణాలు కోల్పోయారు. ఇక, వరుసగా ఐదు రోజుల నుంచి క్రమంగా పాజిటివ్ కేసులు పెరుగుతున్నాయి. ఫిబ్రవరి 16న 9,121, ఫిబ్రవరి 17 11,610, ఫిబ్రవరి 18న 12,881, ఫిబ్రవరి 19న 13,193, ఫిబ్రవరి 20న 13,993 కేసులు నమోదయ్యాయి.

సెప్టెంబరు 17న దేశంలో అత్యధికంగా 97,894 కేసులు నమోదు కాగా.. తర్వాత నుంచి తగ్గుముఖం పట్టాయి. ఆ తర్వాత నవంబరు 17-21 మధ్య మాత్రమే ఐదు రోజులు కోవిడ్ కేసులు పెరిగాయి. ప్రస్తుతం నమోదవుతున్న కేసులను బట్టి దేశంలో మహమ్మారి రెండో దశ మొదలయ్యిందనే ఆందోళన వ్యక్తమవుతోంది.

గత ఐదు రోజుల నుంచి కేరళ, మహారాష్ట్ర, పంజాబ్, మధ్యప్రదేశ్‌లో రోజువారీ కేసులు పెరుగుదల నమోదయ్యింది. దేశంలో కోవిడ్-19 మొదలైన తొలినాళ్లలో వైరస్‌ వ్యాప్తిని సమర్ధంగా ఎదుర్కొన్న కేరళ.. తర్వాత విఫలమయ్యింది. ప్రస్తుతం దేశంలో అత్యధిక కేసులు నమోదయిన రాష్ట్రాల జాబితాలో మహారాష్ట్ర తర్వాతి స్థానంలో కేరళ ఉంది. ప్రస్తుతం అక్కడ 60వేల యాక్టివ్ కేసులు ఉండగా.. దేశంలోని మొత్తం యాక్టివ్ కేసుల్లో ఇవి 42 శాతం.

మహారాష్ట్రలో కొత్త స్ట్రెయిన్‌ను పరిశోధకులు గుర్తించారు. వరుసగా రెండో రోజు అక్కడ 6వేలకుపైగా కేసులు నమోదయ్యాయి. ఆరు నెలల తర్వాత 6వేల కేసులు నమోదుకావడం ఇదే తొలిసారి. శనివారం 6,281 మందికి కొత్తగా వైరస్ నిర్ధారణ కాగా.. ముంబయిలో 1,700 మంది వైరస్ బారినపడ్డారు. పంజాబ్‌లోనూ మహారాష్ట్ర పరిస్థితులే నెలకున్నాయి. అక్కడ గడచిన 24 గంటల్లో 383 మంది వైరస్ బారినపడ్డారు. మధ్యప్రదేశ్‌లోనూ 297 మందికి కొత్తగా వైరస్ నిర్ధారణ అయ్యింది.

LEAVE A REPLY

Please enter your comment!
Please enter your name here