COVID Cases in India: 27 రోజుల తర్వాత భారీగా కోవిడ్ కేసులు.. ఆ రాష్ట్రాలకు కేంద్రం హెచ్చరికలు! – coronavirus cases up in 5 states, must stick to safety measures, says centre

జనవరి 15న ప్రారంభమైన కోవిడ్ వ్యాక్సినేషన్ ప్రక్రియ శరవేగంగా సాగుతోంది. ఇప్పటి వరకు 1.07 కోట్ల మంది ఫ్రంట్‌లైన్ వర్కర్లు టీకా తీసుకున్నారు. ఇదిలా ఉండగా, 27 రోజుల తర్వాత పాజిటివ్ కేసులో మళ్లీ పెరగడం ఆందోళనకు గురిచేస్తోంది. జనవరి 23 తర్వాత గత 24 గంటల్లో 14వేల మందికి వైరస్ నిర్ధారణ కాగా.. మరో 101 మంది ప్రాణాలు కోల్పోయారు. కేరళ, మహారాష్ట్ర, పంజాబ్, చత్తీస్‌గఢ్, మధ్యప్రదేశ్‌లో రోజువారీ కేసులు భారీగా పెరిగినట్టు కేంద్రం పేర్కొంది.

గత వారం రోజుల నుంచి మహారాష్ట్రలో కేసులు పెద్ద సంఖ్యలో నమోదవుతున్నాయి. గడచిన 24 గంటల్లో అత్యధిక కేసులు మహారాష్ట్రలోనే నిర్ధారణ అయ్యాయి. అక్కడ మొత్తం 6,112 కేసులు బయటపడ్డాయి. మహారాష్ట్ర మాదిరిగా పంజాబ్‌లోనూ ఒక్కసారి పాజిటివ్ కేసులు పెరగినట్టు కేంద్రం తెలిపింది. మహారాష్ట్రలో పాజిటివ్ కేసులు పెరగడంతో అధికారులు అప్రమత్తమయ్యారు.

కరోనా కేసుల తీవ్రత ఎక్కువగా ఉన్న అమరావతి, యావత్మల్‌ జిల్లాల్లో కఠిన ఆంక్షలు అమలు చేస్తున్నారు. వారాంతాల్లో పూర్తి లాక్‌డౌన్‌ విధించారు. శనివారం రాత్రి 8 గంటల నుంచి సోమవారం ఉదయం 7 గంటల వరకు కర్ఫ్యూ అమల్లో ఉంటుంది.

బృహన్‌ ముంబై కార్పొరేషన్‌ (బీఎంసీ) ఫిబ్రవరి 18న కొత్త మార్గదర్శకాలు జారీ చేసింది. బహిరంగ ప్రదేశాల్లో మాస్క్‌ ధరించకపోతే రూ.200 జరిమానా విధిస్తామని హెచ్చరించింది. స్థానిక బస్సులు, లోకల్‌ రైళ్లలో ప్రయాణించేవారితో పాటు పని ప్రదేశాల్లోనూ తప్పనిసరిగా మాస్కులు ధరించాలని ఆదేశాల్లో పేర్కొన్నారు. ఈ నిబంధనలు ఉల్లంఘించిన వారికి అప్పటికప్పుడు జరిమానా విధించి వసూలు చేస్తామని స్పష్టం చేసింది. ఆంక్షల అమలు విషయంలో అధికారులు, సిబ్బంది కఠినంగా వ్యవహరించాలని పేర్కొంది.

మధ్యప్రదేశ్‌లోనూ గత వారం నుంచి కొత్త కేసులు పెరుగుతూ వస్తున్నాయి. గడచిన 24 గంటల్లో కొత్తగా 297 మందికి ఆ రాష్ట్రంలో కోవిడ్ నిర్ధారణ అయ్యింది. అటు, చత్తీస్‌గఢ్‌లోనూ ఇదే పరిస్థితి. కొత్తగా 259 కేసులు బయటపడ్డాయి. ఈ నేపథ్యంలో వైరస్ వ్యాప్తిని అడ్డుకునేలా రాష్ట్ర ప్రభుత్వాలు కఠిన చర్యలు తీసుకోవాలని కేంద్రం సూచించింది. మహమ్మారిని నిరోధించి, ఛైన్‌ను విచ్ఛిన్నం చేయాలని పేర్కొంది.