cobra women commandos: కోబ్రా దళంలోకి మహిళా కమాండోలు – 34 women commandos inducted into crpf elite anti-naxal cobra unit for the first time

0
39


కోబ్రా కమాండోలు.. నక్సల్స్ ఏరివేత కోసం ప్రత్యేకంగా ఏర్పాటు చేసిన దళం ఇది. ఇప్పటివరకు ఈ దళంలో అందరూ పురుషులే ఉండగా.. తొలిసారిగా ఈ దళంలోకి మహిళ కమాండోలను ప్రవేశపెట్టారు. దీంతో ఈ కోబ్రా దళం మరోసారి వార్తల్లో ప్రముఖంగా నిలిచింది. 34 మంది సీఆర్పీఎఫ్‌ మహిళల బృందం శనివారం (ఫిబ్రవరి 6) లాంఛనంగా కోబ్రా యూనిట్‌లో చేరింది.

గురుగ్రామ్‌లోని కదార్‌పుర్‌లో గల CRPF క్యాంప్‌లో ఈ కార్యక్రమం జరిగింది. సీఆర్పీఎఫ్‌ డీజీ ఏపీ మహేశ్వరి ఆధ్వర్యంలో ఈ మహిళల బృందాన్ని కోబ్రా యూనిట్‌లోకి తీసుకున్నారు. ఈ సందర్భంగా కోబ్రాకు ఎంపికైన మహిళలు ప్రదర్శించిన యుద్ధ విన్యాసాలు ఆకట్టుకున్నాయి.

అటవీ ప్రాంతాల్లో అత్యంత కఠినమైన మావోయిస్టు వ్యతిరేక ఆపరేషన్లు చేపట్టేందుకు సీఆర్పీఎఫ్‌ 2009లో కోబ్రా యూనిట్‌ను ఏర్పాటు చేసింది. కోబ్రా (CoBRA) పూర్తి రూపం ‘కమాండ్‌ బెటాలియన్‌ ఫర్‌ రెజల్యూట్‌ యాక్షన్‌’. సీఆర్పీఎఫ్‌ 88వ మహిళా బెటాలియన్‌ ఆవిర్భావ దినోత్సవం సందర్భంగా ప్రత్యేక శిక్షణ పొందిన మహిళా కమెండోలను మావోయిస్టు ప్రాబల్య ప్రాంతాల్లో విధి నిర్వహణకు పంపించాలని నిర్ణయించినట్లు సీఆర్‌పీఎఫ్‌ పేర్కొంది. ప్రపంచంలోనే మొట్టమొదటి మహిళా బెటాలియన్‌ ఏర్పాటు చేసిన ఘనత సీఆర్‌పీఎఫ్‌కే దక్కిందని ప్రకటించింది.

సీఆర్పీఎఫ్‌‌లోని 6 మహిళా బెటాలియన్ల నుంచి ఈ 34 మందిని ఎంపిక చేశారు. వీరికి మూడు నెలల పాటు కఠోర శిక్షణ ఇవ్వనున్నారు. ఈ యోధురాళ్లు ఇకపై ఛత్తీస్‌గఢ్‌లోని సుక్మా, దంతెవాడ, బీజాపూర్‌ లాంటి ప్రాంతాల్లో విధులు నిర్వహించనున్నారు. దట్టమైన అడవులను జల్లెడ పట్టనున్నారు. దేశానికి సేవ చేయాలనుకునే ఎంతో మంది యువతులకు ఈ మహిళా వారియర్స్‌ ఆదర్శప్రాయమని ఏపీ మహేశ్వరి అన్నారు.

LEAVE A REPLY

Please enter your comment!
Please enter your name here