china on India: సరిహద్దు వివాదం: భారత్‌పై మరోసారి నోరుపారేసుకున్న డ్రాగన్ – indi china border: china on minister vk singh’s transgressed take

నిరంతం భారత్‌పై అక్కసు వెళ్లగక్కుతూ విస్తరణవాద కాంక్షతో రగిలిపోతున్న చైనా.. మరోసారి అడ్డగోలు వ్యాఖ్యలు చేసింది. సరిహద్దుల్లో నెలకున్న ప్రతిష్టంభనకు భారత్ కారణమని ఆరోపించింది. సరిహద్దులో అతిక్రమణలకు పాల్పడినట్లు భారత్ తనకు తెలియకుండానే అంగీకరించిందని వ్యాఖ్యానించింది. ఈ మేరకు ఆదివారం కేంద్ర మంత్రి వీకే సింగ్ చేసిన వ్యాఖ్యలను పరోక్షంగా ప్రస్తావించింది. భారత్‌, చైనా సరిహద్దులను అధికారికంగా గుర్తించలేదని వీకే సింగ్ వ్యాఖ్యలు చేసిన విషయం తెలిసిందే.

‘చైనాతో మన సరిహద్దులు ఎప్పుడూ గుర్తించలేదు. చైనా ఎల్ఏసీపై నా అవగాహన ప్రకారం కాలక్రమేణా, అతిక్రమణలు జరిగాయి.. మన అవగాహన ప్రకారం మనం ఎన్నిసార్లు అతిక్రమించామో మీలో ఎవరికీ తెలియదు. మేము దానిని ప్రకటించం.. చైనా మీడియా దానిని కవర్ చేయదు.. చైనా 10 సార్లు అతిక్రమించినట్లయితే, మన అవగాహన ప్రకారం మేము కనీసం 50 సార్లు చేసి ఉండాలి’ అని విమర్శించారు.

ఈ విమర్శలపై చైనా విదేశాంగ శాఖ ప్రతినిధి వాంగ్‌ వెన్‌బిన్‌ మాట్లాడుతూ.. భారత్‌ తెలియకుండానే సరిహద్దు ఉద్రిక్తతల్లో తన ప్రమేయాన్ని అంగీకరించింది. చైనా భూభాగాన్ని ఆక్రమించే ప్రయత్నంలో భాగంగా ఆ దేశం తరచూ దురాక్రమణలకు పాల్పడుతోంది.. నిరంతరం వివాదాలు, ఘర్షణలను సృష్టించింది.. ఇది చైనా-ఇండియా సరిహద్దు వద్ద ఉద్రిక్తతలకు మూల కారణం’ అని నోరుపారేసుకున్నారు.

చైనాతో కుదిరిన ఏకాభిప్రాయం, ఒప్పందాలు, ఒప్పందాలను అనుసరించాలి.. సరిహద్దు ప్రాంతంలో శాంతి, స్థిరత్వాన్ని దృఢమైన చర్యలతో సమర్థించాలని మేము భారతదేశాన్ని కోరుతున్నాం’ అని వాంగ్ అన్నారు. గతేడాది మే నుంచి తూర్పు లడఖ్ సరిహద్దుల్లో భారత్‌, చైనా మధ్య ప్రతిష్టంభన కొనసాగుతోంది. జూన్‌ 15న గల్వాన్‌ లోయలో భారత్-చైనా సైనికుల మధ్య జరిగిన ఘర్షణలో 20 మంది భారతీయ సైనికులు అమరులయ్యారు. సరిహద్దుల్లో ఉద్రిక్తతలపై భారత్-చైనాలు చర్చలు జరిగినప్పటికీ..ఆశించిన ఫలితం దక్కలేదు.