Chauri Chaura: ‘చౌరీ చౌరా’ శతాబ్ది ఉత్సవాలు ప్రారంభించిన మోదీ.. దీని ప్రత్యేకత ఏంటి? – pm narendra modi inaugurates chauri chaura centenary celebrations

0
24


ప్రధానాంశాలు:

  • భారత జాతీయోద్యమంలో చౌరీ చౌరాకు ప్రత్యేక స్థానం.
  • చౌరీ చౌరా శతాబ్ది ఉత్సవాలను ప్రారంభించిన మోదీ.
  • స్వాతంత్ర సమరంలో పరీక్షా కాలంగా నిలిచిన ఘటన.

భారత స్వాతంత్ర సంగ్రామంలో మైలురాయిగా నిలిచిన ఘటనల్లో చౌరీ చౌరా ఉదంతం ఒకటి. 1922 ఫిబ్రవరి 4న జరిగిన ఈ సంఘటన భారత జాతీయోద్యమంలో సువర్ణాక్షరాలతో నిలిచిపోయింది. ఈ ఘటన జరిగి నేటికి వందేళ్ల కావడంతో చౌరీ చౌరా శతాబ్ది ఉత్సవాలను ఉత్తర్ప్రదేశ్లోని గోరఖ్పుర్లో ప్రధాని నరేంద్ర మోదీ ప్రారంభించారు. దీనికి గుర్తుగా ఓ పోస్టల్ స్టాంపును కూడా మోదీ ఆవిష్కరించనున్నారు. ఉదయం 11 గంటలకు వీడియో కాన్ఫరెన్స్ ద్వారా ఈ ఉత్సవాలను మోదీ ప్రారంభించగా.. ఉత్తర్ప్రదేశ్ ముఖ్యమంత్రి యోగి ఆదిత్యనాథ్ కూడా పాల్గొన్నారు.

స్వాతంత్రోద్యమంతో సంబంధం ఉన్న 99 మంది వ్యక్తులను మోదీ సన్మానించారు. ఈ సందర్భంగా ప్రధాని నరేంద్ర మోదీ మాట్లాడుతూ.. చౌరీ చౌరా ఘటన ఒక ప్రాంతానికే పరిమితం చేశారు.. కానీ, ఇది దేశ జాతీయోద్యమ పోరాటంలో కీలక ఘట్టమని వ్యాఖ్యానించారు. బడ్జెట్‌లో ప్రజలపై ఏటువంటి పన్నుల భారం వేయలేదని ఈ సందర్భంగా మోదీ గుర్తుచేశారు.

చౌరీ చౌరా ఘ‌ట‌న‌కు వచ్చే ఏడాదికి వందేళ్లు నిండనున్న నేప‌థ్యంలో సంవత్సరం పాటు ఈ వేడుకలను నిర్వహించనున్నారు. యూపీ ప్రభుత్వ ఆధ్వర్యంలో 75 జిల్లాల్లో వ‌చ్చే ఏడాది ఫిబ్ర‌వ‌రి 4 వ‌ర‌కు ఈ కార్యక్రమాలు జరుగుతాయి. చౌరీచౌరా ఘటన జరిగిన స్మారక కేంద్రాన్ని పర్యాటక కేంద్రంగా అభివృద్ధి చేయాలని యోగి సర్కారు నిర్ణయించింది.

దేశ స్వాతంత్ర పోరాటంలో చౌరీ చౌరా ఘ‌ట‌నకు విశిష్ట స్థానం ఉంది. స్వాతంత్ర పోరాటంలో భాగంగా మహాత్మా గాంధీ సహాయ నిరాకరణ ఉద్యమానికి పిలుపునిచ్చారు. దీంతో 1922 ఫిబ్రవరి 4న చౌరీచౌరాలో సహాయ నిరాకరణ ఉద్యమంలో పాల్గొన్న వారిపై నాటి బ్రిటిష్‌ సైన్యం కాల్పులు జరపగా ముగ్గురు ప్రాణాలు కోల్పోయారు. దీనికి ఆగ్రహించిన ఉద్యమకారులు అక్కడి పోలీసు పోస్టుపై దాడి చేసి 24 మంది బ్రిటిష్‌ సైనికులను హతమార్చారు.

దీంతో వందలాది మంది ఆందోళనకారులను బ్రిటిష్ సైన్యం అరెస్ట్ చేయగా.. 228 మందిని దోషులుగా నిర్ధారించింది. విచారణ సమయంలోనే వీరిలో ఆరుగురు చనిపోగా.. 172 మందికి ఉరిశిక్ష, మిగతావారికి జీవితఖైదు విధించింది. అయితే, ఈ తీర్పుపై తీవ్ర దుమారం రేగడంతో అలహాబాద్ హైకోర్టు సమీక్షించింది. 1923లో 19 మందికి మరణ శిక్ష, 110 మందికి యావజ్జీవిత శిక్షను ఖరారుచేసింది. వీరిని అండమాన్ జైలుకు తరలించారు.

LEAVE A REPLY

Please enter your comment!
Please enter your name here