ccmb study on mutants: దేశంలో 7,569 కోవిడ్ వేరియంట్స్.. దక్షిణాదిలో కొత్తరకం స్ట్రెయిన్ వ్యాప్తి! – india host to 7,569 coronavirus mutants, says ccmb study

0
29


ప్రధానాంశాలు:

  • దేశంలో కొత్తరకం స్ట్రెయిన్‌ల ఉనికిపై అధ్యయనం.
  • దక్షిణాది రాష్ట్రాల్లో విభిన్నమైన కోవిడ్ వేరియంట్.
  • సీసీఎంబీ అధ్యయనంలో ఆసక్తికర విషయాలు.

తొలిసారిగా 2019 డిసెంబరులో చైనాలోని వుహాన్ నగరంలో వెలుగుచూసిన కరోనా వైరస్ మహమ్మారి ప్రస్తుతం ప్రపంచవ్యాప్తంగా వ్యాపించింది. దీంతో వైరస్ జన్యుమార్పిడికి గురయ్యింది. వేలాది వేరియంట్‌లుగా రూపాంతరం చెందినట్టు పలు అధ్యయనాలు వెల్లడించాయి. ఇక, భారత్‌లో వైరస్ వ్యాప్తి మొదలైన తర్వాత ఇప్పటి వరకు మొత్తం 7,569 వేరియంట్‌లను విశ్లేషించారు. దేశంలో 7,569 వేరియంట్లు ఉనికిలో ఉన్నట్టు సెంటర్ ఫర్ సెల్యులార్ అండ్ మాలిక్యులార్ బయాలజీ (సీసీఎంబీ) అధ్యయనంలో వెల్లడయ్యింది.

సీసీఎంబీ శాస్త్రవేత్తలు 5,000కి పైగా వేరియంట్‌లను విశ్లేషించి, అవి ఎలా అభివృద్ధి చెందాయే వివరించారు. యూకే, బ్రెజిల్, దక్షిణాఫ్రికా వంటి దేశాల్లో వేగంగా విస్తరిస్తూ ఆందోళన కలిగిస్తున్న కొత్త రకం స్ట్రెయిన్ మన దేశంలోనూ వ్యాప్తిలో ఉందని సీసీఎంబీ శాస్త్రవేత్తలు తెలిపారు. రోగనిరోధక వ్యవస్థను తప్పించుకుని వ్యాప్తికి కారణమవుతున్న E484K, అధిక వ్యాప్తికి కారణమవుతున్న N501Y స్ట్రెయిన్‌లు ఇందులో ఉన్నాయి.

ఇక, దక్షిణాది రాష్ట్రాల్లో ప్రస్తుతం N440K అనే కొత్త రకం కోవిడ్‌-19 స్ట్రెయిన్ వ్యాప్తిలో ఉన్నట్లు పరిశోధకులు గుర్తించారు. అది ప్రమాదికారా? అనేది స్పష్టత లేకున్నా, వ్యాప్తికి అవకాశాలు ఎక్కువగా ఉందని పేర్కొన్నారు. సీసీఎంబీ సహా వేర్వేరు సంస్థలు చేపట్టిన కొవిడ్‌ వైరస్‌ 6400 జన్యుక్రమ విశ్లేషణలో 5వేల ఉత్పరివర్తనాలను సీసీఎంబీ శాస్త్రవేత్తలు గుర్తించారు.

ప్రధానంగా కొన్ని మాత్రమే ఎక్కువ వ్యాప్తిలో ఉన్నట్లు తేల్చారు. A3I జూన్‌ 2020 వరకు వ్యాప్తిలో ఉండగా.. తర్వాత A2A విజృంభించింది. ఇందులోని D614G ఉత్పరివర్తనం ఎక్కువ వ్యాప్తికి కారణమైంది. ప్రపంచవ్యాప్తంగానూ ఈ జన్యువే ఎక్కువగా గుర్తించారు. కరోనా వైరస్‌ స్పైక్‌ ప్రొటీన్‌లో జన్యు మార్పుల వల్ల కొత్తరకం వైరస్ వ్యాప్తిలోకి వచ్చింది. మానవ శరీర కణాలకు అతుక్కుపోయే గుణంతో అధిక ఇన్‌ఫెక్షన్‌కు కారణమవుతున్నట్లు తేలింది.

యూకే, బ్రెజిల్, దక్షిణాఫ్రికాలో విజృంభిస్తున్న స్ట్రెయిన్‌ల ఉనికి ప్రస్తుతం భారత్‌లో తక్కువగా ఉన్నట్లు గుర్తించారు. పాజిటివ్‌‌గా నిర్ధారణ అయిన నమూనాలను స్వల్పంగా సేకరించి జీనోమ్‌ సీక్వెన్సింగ్‌ చేస్తుండటం ఇందుకు కారణం కావొచ్చని సీసీఎంబీ డైరెక్టర్‌ డాక్టర్‌ రాకేశ్‌మిశ్రా అన్నారు.

సాధ్యమైనంత ఎక్కువగా జన్యుక్రమాలను కనుగొనడం వల్ల కొత్తరకం స్ట్రెయిన్ పుట్టుక, వ్యాప్తి గురించి కచ్చితమైన సమాచారం తెలుసుకోవచ్చని తెలిపారు. తద్వారా రోగనిరోధక వ్యవస్థ నుంచి తప్పించుకుంటున్న, రోగ లక్షణాలు, ఎక్కువ విస్తరణకు కారణమవుతున్న కొత్త రకాలను సకాలంలో గుర్తించి నివారించడానికి వీలవుతుందని వివరించారు.

LEAVE A REPLY

Please enter your comment!
Please enter your name here